Kouma Jéhovah Trouv Mwa?
1. Dan ki fason Labib li parey kouma enn laglas?
1 Komie fwa par zour to get twa dan laglas? Laplipar parmi nou fer sa omwin enn fwa toulezour. Kifer? Parski sa ed nou pou trouv diferan kitsoz ki nou bizin ameliore dan nou laparans. Labib li parey kouma enn laglas. Kan nou lir Parol Bondie toulezour, sa ed nou pou trouv seki nou ete o-fon noumem, sa dimounn ki Jéhovah trouve la. (1 Sam. 16:7; Jacq. 1:22-24) Parol Bondie kapav “dekouver bann panse ek bann lintansion ki ena dan leker.” (Héb. 4:12) Kan nou lir ek medit lor Labib toulezour, kouma sa kapav ed nou pou trouve dan ki domenn nou bizin amelior noumem pou vinn bann proklamater pli efikas?—Ps. 1:1-3.
2. Kouma Labib kapav ed nou pou examinn noumem?
2 Servi Labib Kouma enn Laglas: Labib rakont nou zistwar bann fidel serviter Jéhovah, ek zot lexanp fer nou konpran ki bann kalite ki zoli devan lizie Jéhovah. Par exanp, David ti ena zel pou nom Bondie. (1 Sam. 17:45, 46) Avek kouraz, Isaïe ti dispoze pou al pres dan enn teritwar bien difisil. (Is. 6:8, 9) Profon lamour ki Jésus ti ena pou so Papa inn ed li pou trouv so minister kouma enn kitsoz ki donn li lafors ek lazwa olie ki li trouv sa kouma enn fardo ki pez lour. (Jean 4:34) Bann Kretien dan premie siek ti pres avek zel, ti kont lor Jéhovah, ek ti determine pou pa bes lebra. (Actes 5:41, 42; 2 Cor. 4:1; 2 Tim. 4:17) Kan nou medit lor sa bann lexanp-la, sa ed nou pou examinn noumem avek lobzektif pou vinn pli efikas dan nou minister.
3. Kifer fode pa nou atann plitar pou fer bann sanzman neseser?
3 Koriz Bann Defo: Biensir, sa pa pou servi nanye si nou get dan laglas ek inior enn defo. Nou kapav demann Jéhovah ed nou pou trouv noumem dan enn fason realist ek apre, ed nou pou fer bann sanzman ki bizin. (Ps. 139:23, 24; Luc 11:13) Pa res boukou letan, anplis se lavi bann dimounn ki inplike. Alor, se asterla mem ki nou bizin fer bann sanzman neseser, fode pa nou atann plitar.—1 Cor. 7:29; 1 Tim. 4:16.
4. Ki arive kan enn dimounn examinn an profonder Parol Bondie ek apre azir dapre seki li dekouver?
4 Seki nou ete o-fon noumem, se sa ki Jéhovah gete ek sa li boukou pli inportan ki nou laparans fizik. (1 Pierre 3:3, 4) Ki arive kan enn dimounn examinn an profonder Parol Bondie ek apre azir dapre seki li dekouver? Li “vinn enn dimounn ki pa bliye seki li’nn tande, me ki met sa an pratik, ek li pou ere dan seki li fer.” (Jacq. 1:25) An realite, nou pou pli ere ek nou pou pli efikas dan nou minister parski “parey kouma bann laglas, nou reflet laglwar Jéhovah.”—2 Cor. 3:18.