“L’esprit ek la marié contigne dire: ‘Vini!’”
“L’esprit ek la marié contigne dire: ‘Vini!’ . . . Ki tou seki soif, vini; ki tou seki envie, prend de l’eau la vie sans payé.”—RÉV. 22:17.
1, 2. Ki place Royaume Bondié bizin ena dan nou la vie, ek kifer?
KI PLACE bann l’interet Royaume Bondié bizin ena dan nou la vie? Jésus ti encourage so bann disciple pou ‘contigne rod le royaume avant tou kitsoz’ ek li ti donne zot l’assurance ki si zot faire sa, Bondié pou donne zot seki zot bizin. (Mat. 6:25-33) Li ti compare Royaume Bondié ar enn perle ki ena tellement enn grand valeur ki, kan enn marchand ki habitué voyagé ti trouve sa, li “ti al vann tou seki li ti ena, ek li ti acheté [li].” (Mat. 13:45, 46) Eski fodé pa ki nou aussi, nou attache pli grand l’importance ki kapav ar l’activité pou preche Royaume Bondié ek pou faire bann disciple?
2 Pareil couma nou finn trouvé dan deux lartik avant, kan nou koz avek courage ek kan nou servi la Bible dan enn fason efficace dan nou ministere, nou montré ki l’esprit saint Bondié pé dirige nou. Sa l’esprit-la bien important pou ki nou kapav preche Royaume Bondié regulierement. Anou guetté couma.
Enn l’invitation pou tou dimoune!
3. Ki qualité de l’eau tou dimoune inn gagne l’invitation pou ‘vinn’ boire?
3 Par moyen l’esprit saint, chaque dimoune pé gagne enn l’invitation. (Lire Révélation 22:17.) C’est enn l’invitation pou “vini” ek pou boire enn de l’eau special ki faire enn dimoune arrete soif. C’est pa enn de l’eau ordinaire avek deux atome hydrogène ek enn atome oxygène. Mem si de l’eau important pou la vie lor la terre, Jésus ti pé pense enn de l’eau different kan li ti dire enn madame samaritaine ki ti pré kot enn puit: “N’importe kisannla ki boire de l’eau ki mo pou donne li, jamais li pa pou soif encore, mais de l’eau ki mo pou donne li pou vinn en li-mem enn la source kot de l’eau sorti avek la force, pou donne la vie eternel.” (Jean 4:14) Sa de l’eau extraordinaire ki bann dimoune invité pou boire-la, donne la vie eternel.
4. Kifer li ti necessaire pou Bondié donne de l’eau la vie, ek ki sa de l’eau-la representé?
4 Kan premier zom, Adam, ti suive so femme, Ève, pou desobeir Jéhovah, zot Createur, lerla li ti vinn necessaire pou gagne sa de l’eau ki faire gagne la vie-la. (Gen. 2:16, 17; 3:1-6) Bondié ti pousse sa premier couple-la ek ti tire zot dan jardin kot zot ti pé vive, “pou ki [Adam] pa avance so la main ek vrai-mem li prend aussi fruit ki lor pié la vie ek mangé ek vive pou touletan.” (Gen. 3:22) En tant ki ancetre tou dimoune, Adam finn transmette la mort tou bann dimoune. (Rom. 5:12) De l’eau la vie represente tou bann disposition ki Bondié inn prend pou gueri bann dimoune obeissant ar peché ek la mort ek pou donne zot la vie eternel ek enn la vie parfait, dan Paradis lor la terre. Sa bann disposition-la finn vinn possible grace a sacrifice Jésus Christ.—Mat. 20:28; Jean 3:16; 1 Jean 4:9, 10.
5. Kisannla ki invite bann dimoune pou vini ek pou “prend de l’eau la vie sans payé”? Expliké.
5 Kisannla ki donne l’invitation pou vini ek pou “prend de l’eau la vie sans payé”? Tou bann disposition pou gagne la vie grace a Jésus ek ki l’humanité pou kapav profité dan enn fason complet pendant Regne mille an, zot comparé ar “enn la riviere de l’eau la vie ki clair couma cristal.” Sa la riviere-la “sorti dan trone Bondié ek l’Agneau.” (Rév. 22:1) Jéhovah, sa Kikenn ki donne la vie-la, c’est Li-mem ki la Source de l’eau ki donne la vie. (Ps. 36:9) C’est Li-mem ki permette bann dimoune pou gagne sa de l’eau-la grace a “l’Agneau,” Jésus Christ. (Jean 1:29) Sa la riviere symbolik-la represente moyen ki Jéhovah servi pou repare tou di-tort ki desobeissance Adam inn amenn lor l’humanité. Oui, c’est Jéhovah ki invite bann dimoune pou “vini.”
6. Kan eski “la riviere de l’eau la vie” inn commence coulé?
6 Mem si “la riviere de l’eau la vie” pou coulé dan enn sens complet pendant Regne mille an Christ, li’nn commence coulé pendant “jour du Seigneur” ki ti commencé kan “l’Agneau,” ti vinn le roi en 1914. (Rév. 1:10) Sa vedir ki apré sa, bann dimoune ti kapav profite certain disposition pou gagne la vie. Sa bann disposition-la ena enn rapport avek Parole Bondié, la Bible, parski message ki sorti dan la Bible comparé ar “de l’eau.” (Éph. 5:26) Tou dimoune gagne l’invitation pou “prend de l’eau la vie” kan zot ecouté ek accepté la bonne nouvelle lor Royaume Bondié. Mais zordi pendant jour du Seigneur, kisannla ki pé donne sa l’invitation-la bann dimoune?
“La marié” dire: “Vini!”
7. Pendant “jour du Seigneur,” kisannla ki ti premier pou donne l’invitation pou “vini,” ek kisannla zot invité?
7 Bann ki forme partie dan groupe la marié, setadir bann chretien oint, zot-mem premier pou donne l’invitation pou “vini.” Kisannla zot invité? Bien sur, sa la marié-la pa dire: “Vini!” ar li-mem. Zot dire sa bann parole-la ar bann ki ena l’esperance pou gagne la vie eternel lor la terre apré “la guerre grand jour Bondié Tout-Puissant.”—Lire Révélation 16:14, 16.
8. Ki montré ki bann chretien oint finn transmette l’invitation Jéhovah depuis 1918?
8 Bann disciple Jésus Christ ki oint ar l’esprit saint, finn donne sa l’invitation-la depuis 1918. Sa l’année-la, ti ena enn discours publik ki ti appel “ Des millions de personnes actuellement vivantes peuvent ne jamais mourir ! ” ki ti expliké ki beaucoup pou kapav ena l’esperance pou vive dan enn paradis lor la terre apré la guerre Har-Maguédôn. En 1922, dan l’assemblée bann Etudiant la Bible ki ti faire Cedar Point, dan Ohio, en Amérique, ti ena enn discours ki ti encourage bann assistant pou ‘annonce le Roi ek so royaume.’ Sa l’appel-la ti aide groupe la marié, setadir le reste bann chretien oint, pou donne sa l’invitation-la pli beaucoup dimoune. Dan La Tour de Garde juin 1929, en français, ti ena enn lartik ki ti appel “ Invitation bienveillante, ” ek verset-clé sa lartik-la ti Révélation 22:17. Sa lartik-la ti dire en partie: “L’esclave fidele uni avek [Bondié Tout-Puissant] pou invite [bann dimoune] ek pou dire: ‘Vini.’ Bizin annonce sa message-la ar bann ki content la justice ek la verité. Bizin faire sa asterla.” Ziska zordi, bann chretien oint pé contigne donne sa l’invitation-la.
“Ki tou seki tendé, dire: ‘Vini!’ ”
9, 10. Couma bann ki finn tann l’invitation pou “vini,” zot aussi zot finn dire: “Vini!”?
9 Bann ki tann l’invitation pou “vini,” ki zot bizin faire? Zot aussi zot bizin dire: “Vini!” Par exemple, La Tour de Garde novembre 1932, en français, ti dire dan page 167: “Bann chretien oint . . . bizin encourage tou bann ki envie preche la bonne nouvelle lor royaume [Bondié]. Li pa necessaire ki sa bann [proclamateur-la] zot oint ar l’Eternel pou zot kapav annonce so message. C’est enn grand l’encouragement pou bann temoin Jéhovah pou koné ki zordi zot ena privilege pou offert de l’eau la vie ar enn groupe dimoune ki kapav traverse Harmaguédon ek gagne la vie eternel lor la terre.”
10 Bann dimoune ki tendé, ena responsabilité pou dire: “Vini!” Pou mette l’accent lor sa responsabilité ki zot ena-la, La Tour de Garde 15 novembre 1934, en français, page 345 ti dire: “Bann ki faire partie groupe Jonadab bizin accompagne bann membre groupe ki represente Jéhu, setadir bann chretien oint, ek annonce message royaume [Bondié], mem si zot pa bann temoin ki Jéhovah inn oint.” En 1935, li ti vinn clair kisannla ki sa “grand la foule” ki mentionné dan Révélation 7:9-17. Sa ti donne enn grand l’elan dan l’activité pou transmette l’invitation Bondié. Depuis sa lepok-la, bann vrai adorateur Jéhovah ki forme partie dan la grande foule ki pé augmenté—zordi zot plus ki sept million—finn accepté sa l’invitation-la. Zot ena reconnaissance pou message la verité ki zot finn tendé, ek sa finn pousse zot pou voué-zot ar Bondié, zot inn prend bapteme, ek ensam avek bann chretien oint, zot invite avek zele lezot dimoune pou ‘vini ek pou boire de l’eau la vie sans payé.’
“L’esprit” dire “Vini!”
11. Dan premier siecle nou lepok, ki role l’esprit saint ti joué dan l’activité predication?
11 Kan li ti preche dan enn synagogue dan Nazareth, Jésus ti ouvert rouleau prophete Isaïe ek li ti lire: “L’esprit Jéhovah lor moi, parski Li finn choisir moi pou annonce bann bon nouvelle ar bann pauvre, Li’nn envoye moi pou preche avek bann prisonnier ki zot pou liberé ek bann aveugle ki zot pou retrouve clair, pou libere bann ki souffert, pou preche l’année ki Jéhovah approuvé.” Lerla, Jésus ti applik sa bann parole-la ar li-mem kan li ti dire: “Zordi, sa parole l’Ecriture ki zot finn tendé-la, finn realisé.” (Luc 4:17-21) Avant li monte dan le ciel, Jésus ti dire so bann disciple: “Zot pou gagne pouvoir kan l’esprit saint pou vinn lor zot, ek zot pou vinn mo bann temoin . . . ziska dan region pli loin lor la terre.” (Actes 1:8) Dan premier siecle, l’esprit saint ti joué enn role bien important en rapport avek l’activité predication.
12. Ki role l’esprit saint joué pou invite bann dimoune dan nou lepok?
12 Ki role l’esprit saint joué pou donne l’invitation bann dimoune dan nou lepok? Jéhovah Li-mem la Source l’esprit saint. Li servi l’esprit saint pou ouvert leker ek l’esprit bann membre la marié symbolik pou zot comprend so Parole, la Bible. Sa l’esprit-la pousse zot pou transmette l’invitation ek pou explik bann verité ki trouve dan la Bible ar bann ki ena l’esperance pou vive pou touletan dan Paradis lor la terre. Ki nou kapav dire lor bann ki accepté sa l’invitation-la, ki vinn bann disciple Jésus Christ, ek ki zot aussi invite lezot? L’esprit saint agir lor zot aussi. Parski zot finn baptisé ‘au nom l’esprit saint,’ zot coopere avek sa l’esprit-la ek compte lor la pou aide zot. (Mat. 28:19) Mazinn aussi message ki pé preché par bann chretien oint ek la grande foule ki pé augmenté. Sa message-la sorti dan la Bible, enn livre ki finn ecrire grace a l’influence direct l’esprit Bondié. Sa vedir ki c’est grace a l’esprit saint ki sa l’invitation-la pé transmette. En realité, c’est sa l’esprit-la ki pé dirige nou. Couma sa bizin influence quantité le temps ki nou passé dan l’activité pou invite bann dimoune?
Zot “contigne dire: ‘Vini!’ ”
13. Ki nou aprann ar l’expression “l’esprit ek la marié contigne dire: ‘Vini!’”?
13 “L’esprit ek la marié” pa zis dire: “Vini!” Dan langue original, verbe ki servi ici donne l’idée enn action ki contigné. C’est a cause sa ki Traduction du monde nouveau mette: “L’esprit ek la marié contigne dire: ‘Vini!’ ” Sa montré ki zot pé contigne donne sa l’invitation-la dan enn fason regulier. Ki nou kapav dire lor bann ki tendé ek ki accepté sa l’invitation-la? Zot aussi zot dire: “Vini!” La Bible decrire sa grand la foule bann vrai adorateur-la couma bann dimoune ki ‘pé rann enn service sacré la-nuit li-jour dan temple Jéhovah.’ (Rév. 7:9, 15) Dan ki sens zot pé ‘servi la-nuit li-jour’? (Lire Luc 2:36, 37; Actes 20:31; 2 Thessaloniciens 3:8.) L’exemple prophetesse Anne ki ti agé, ek l’exemple l’apotre Paul montré ki ‘servi la-nuit li-jour’ vedir servi dan enn fason regulier ek avek bann zeffort serieux dan nou ministere.
14, 15. Couma Daniel ti montré l’importance ki nou regulier dan nou l’adoration?
14 Prophete Daniel aussi ti montré l’importance ki nou regulier dan nou l’adoration. (Lire Daniel 6:4-10, 16.) Li pa ti change so bann l’habitude spirituel—so l’habitude pou prié Bondié “trois fois par jour, . . . pareil couma li ti faire dan enn fason regulier”—mem zis pou enn mois ek mem si ti pou jette li dan enn la fosse kot ena lion. Dan enn fason clair, so bann action ti montré bann ki ti pé observe li ki pa ti ena nanyin ki pli important ki adore Jéhovah dan enn fason regulier!—Mat. 5:16.
15 Apré ki Daniel ti passe enn la-nuit dan la fosse avek bann lion, le roi li-mem ti al la-bas ek ti criyé: “Ah Daniel, serviteur Bondié ki vivant, eski to Bondié ki to servi dan enn fason regulier finn reussi sauve toi ar bann lion?” Desuite Daniel ti reponn: “O mo le roi, vive pou touletan. Mo Bondié finn envoye so ange ek finn ferme la gueule bann lion, ek zot pa finn devore moi, parski Li finn trouvé ki mo innocent; ek devant toi aussi o mo le roi, mo pa’nn faire okenn mauvais kitsoz.” Jéhovah ti beni Daniel parski li ti servi Li dan “enn fason regulier.”—Dan. 6:19-22.
16. Ki bann question l’exemple Daniel bizin pousse nou pou pose-nou-mem lor nou ministere?
16 Daniel ti disposé pou mort plutot ki li neglige so bann l’habitude spirituel. Ki nou kapav dire lor nou? Ki bann sacrifice eski nou pé faire ou-soit ki nou disposé pou faire pou ki nou kapav annonce la bonne nouvelle lor Royaume Bondié dan enn fason regulier? En realité, fodé pa ki nou laisse enn mois passé sans ki nou koz lor Jéhovah avek lezot! Eski nou pa bizin participe dan nou ministere chaque semaine, dapré nou possibilité? Mem si nou bien limité lor plan physik ek ki nou preché zis 15 minute pendant enn mois, nou bizin donne enn rapport pou sa. Kifer? Parski ensam avek l’esprit ek la marié, nou envie contigne dire: “Vini!” Oui, nou envie faire tou seki nou kapav pou reste bann proclamateur regulier ki preche Royaume Bondié.
17. Ki bann l’occasion pou transmette l’invitation Jéhovah fodé pa nou manké?
17 Nou bizin rod tou l’occasion pou transmette l’invitation Jéhovah ek pa faire sa zis dan bann moment ki nou finn reservé pou predication. C’est vrai-mem enn grand privilege ki nou ena pou invite dan bann lezot moment, tou dimoune ki soif, pou ‘vini ek pou prend de l’eau la vie sans payé’! Par exemple nou kapav faire sa kan nou faire shopping, kan nou pé voyagé, kan nou en vacance, dan travail ou-soit kan nou pé al lekol. Mem si gouvernement empeche nou preché, nou contigne preché dan enn fason ki lezot pa remark nou—kitfois nou kapav faire deux-trois lakaz dan enn territoire ek apré, al preche dan enn lot territoire, ou-soit nou kapav augmente nou temoignage informel.
Contigne dire: “Vini!”
18, 19. Couma ou montré ki sa privilege pou travail ensam avek Bondié-la ena valeur pou ou?
18 Inn gagne plus ki 90 an asterla depuis ki l’esprit ek la marié pé dire: “Vini!” ar n’importe kisannla ki soif de l’eau la vie. Eski ou finn tann zot l’invitation ki bien encourageant? Alors, nou encourage ou pou donne sa l’invitation-la lezot dimoune.
19 Nou pa koné comié le temps encore nou pou annonce sa l’invitation ki Jéhovah pé donné avek amour-la. Mais kan nou reponn sa l’invitation-la ek ki nou aussi nou dire: “Vini!” sa faire nou vinn bann ki travail ensam avek Bondié. (1 Cor. 3:6, 9) C’est vrai-mem enn grand privilege! Anou montré ki sa privilege-la ena enn grand valeur pou nou ek anou “touletan offert Bondié enn sacrifice louange” kan nou preché regulierement. (Héb. 13:15) Ensam avek groupe la marié, ki tou bann ki ena l’esperance pou vive lor la terre contigne dire: “Vini!” ek nou souhaité ki beaucoup lezot dimoune pou “prend de l’eau la vie sans payé”!
Ki ou finn aprann?
• Kisannla ki gagne l’invitation pou “vini”?
• Kifer nou kapav dire ki c’est Jéhovah ki donne l’invitation pou “vini”?
• Ki role l’esprit saint ena par rapport avek l’invitation pou “vini”?
• Kifer nou bizin faire zeffort pou participe regulierement dan ministere?
[Zimage page 25]
(Guette publication)
Contigne dire: “Vini!”
1914
5,100 proclamateur
1918
Beaucoup pou gagne la vie dan Paradis lor la terre
1922
“Annonce, annonce, annonce le Roi ek so royaume”
1929
Le reste bann chretien oint dire: “Vini!”
1932
Pa zis bann chretien oint ki donne l’invitation pou “vini”
1934
Bann ki faire partie dan groupe Yehonadab invité pou preché
1935
Nou koné kisannla sa ‘grand la foule-la’ été
2009
7,313,173 proclamateur