Ki ou bann la priere montré lor ou?

“Toi ki ecoute la priere, oui tou dimoune pou vinn vers toi.”—PS. 65:2.

1, 2. Kifer bann serviteur Jéhovah kapav prié Li avek confiance?

JÉHOVAH jamais pa bouche so zoreille kan so bann serviteur fidele suppliye Li. Nou kapav sur ki Li tann nou. Mem si plusieurs million Témoins de Jéhovah prié Li en mem temps, Li pou kapav ecoute sakenn parmi zot.

² David ti ena confiance ki Bondié ti tann so bann supplication, alors li ti chante sa cantik-la: “Toi ki ecoute la priere, oui tou dimoune pou vinn vers toi.” (Ps. 65:2) Bondié ti reponn bann la priere David, parski li ti enn serviteur fidele Jéhovah. Alors, nou bizin demann nou-mem: ‘Eski mo bann supplication montré ki mo ena confiance en Jéhovah ek ki vrai l’adoration ena priorité dan mo la vie? Ki mo bann la priere montré lor moi?’

Prié Jéhovah avek humilité

3, 4. (a) Avek ki l’attitude nou bizin prié Jéhovah? (b) Ki nou bizin faire si nou troublé par bann “pensée ki pé fatigue nou” a cause enn peché grave?

³ Si nou envie ki Bondié reponn nou la priere, nou bizin prié Li avek humilité. (Ps. 138:6) Nou bizin demann Jéhovah pou examine nou, pareil couma David ti faire kan li ti dire: “Ah Bondié, examine moi bien, ek konn mo leker. Examine moi, ek konn bann pensée ki pé fatigue moi, ek guetté si pena kit mauvais chemin dan moi, ek conduire moi dan chemin l’eternité.” (Ps. 139:23, 24) Fodé pa nou zis prié, nou bizin aussi laisse Bondié examine nou ek soumette-nou ar bann conseil ki trouve dan so Parole. Jéhovah kapav conduire nou dan “chemin l’eternité,” setadir aide nou pou ena enn conduite ki pou faire nou gagne la vie eternel.

⁴ Ki nou pou faire si nou troublé par bann “pensée ki pé fatigue” nou a cause enn peché grave? (Lire Psaume 32:1-5.) Si nou essaye touffe enn conscience ki pé reproche nou, tigit-tigit sa kapav faire nou perdi nou la force; nou pou ressemblé enn pié ki doucement-doucement pé sec a cause chaleur. A cause peché ki li ti faire, David ti perdi so la joie ek kitfois li ti tombe malade. Mais li ti vrai-mem bien soulagé kan li ti confesse so peché ar Bondié! Mazinn la joie ki li ti ena kan li ti comprend ki li ti’nn “gagne pardon pou so rebellion” ek ki Jéhovah ti’nn pardonne li. Kan enn dimoune confesse so peché ar Bondié, sa kapav soulage li, ek l’aide bann ancien pou aussi aide li pou regagne enn bon la santé lor plan spirituel.—Prov. 28:13; Jacq. 5:13-16.

Suppliye Bondié ek remercié Li

5. Ki sa vedir “faire enn supplication”?

⁵ Si nou tracassé pou n’importe ki raison, nou bizin applik conseil ki Paul ti donné: “Pa tracassé pou okenn kitsoz, mais dan tou kitsoz, par la priere, supplication avek bann remerciement, demann Bondié seki zot bizin.” (Phil. 4:6) Kan nou faire enn “supplication” sa vedir ki “nou suppliye Bondié avek humilité.” Nou bizin suppliye Jéhovah pou aide nou ek pou guide nou surtout kan nou en danger ou-soit kan nou gagne persecution.

6, 7. Ki bann bon raison nou ena pou remercié Bondié dan nou la priere?

⁶ Si nou habitué prié zis kan nou bizin enn kitsoz, ki sa montré lor nou bann mobile? Paul ti dire ki nou bizin suppliye Bondié “avek bann remerciement.” Nou ena bann bon raison pou ena reconnaissance envers Bondié, pareil couma David ki ti dire: “Ah Jéhovah, grandeur, puissance, beauté, superiorité ek dignité, zot pou toi; parski tou seki dan le ciel ek lor la terre pou toi. Royaume pou toi, ah Jéhovah, toi ki aussi eleve-toi en tant ki chef lor tou. . . . Ah nou Bondié, nou pé remercié toi ek nou pé donne l’honneur to nom ki bien joli.”—1 Chron. 29:11-13.

⁷ Jésus ti ena l’habitude pou remercié Bondié pou mangé ki li ti gagné; c’est seki li ti faire kan li ti remercié Bondié pou di-pain ek di-vin ki li ti servi pendant Repas du Seigneur. (Mat. 15:36; Marc 14:22, 23) Nou aussi, nou exprime nou reconnaissance pou sa bann mem kitsoz-la, mais a part sa, nou bizin “remercié Jéhovah” pou “bann travail extraordinaire ki Li faire pou bann dimoune,” pou “bann bon jugement ki [Li]’nn rendé,” ek pou so parole, setadir, so message ki nou ena zordi dan la Bible.—Ps. 107:15; 119:62, 105.

Prié pou lezot

8, 9. Kifer nou bizin prié pou nou bann frere ek soeur spirituel?

⁸ Pena doute ki nou prié pou nou-mem, mais nou bizin aussi prié pou lezot—mem pou bann chretien ki nou pa koné par zot nom. Mem si kitfois l’apotre Paul pa ti konn tou bann chretien dan congregation Colosses, li ti ecrire: “Nou remercié Bondié, Papa nou Seigneur Jésus Christ touletan kan nou prié pou zot, depuis ki nou finn tann koz lor zot la foi en rapport avek Christ Jésus ek lor l’amour ki zot ena pou tou bann saint.” (Col. 1:3, 4) Paul ti prié aussi pou bann chretien dan Thessalonique. (2 Thess. 1:11, 12) Bann la priere coumsa faire konn beaucoup kitsoz lor nou ek montré couma nou considere nou bann frere ek soeur spirituel.

⁹ Nou bann la priere pou bann chretien oint ek pou zot bann compagnon “bann lezot brebis” montré ki nou interesse-nou ar l’organisation Bondié. (Jean 10:16) Paul ti demann so bann frere ek soeur spirituel pou prié pou ki li ‘gagne capacité pou koné ki pou dire pou faire konn saint secret la bonne nouvelle.’ (Éph. 6:17-20) Eski personnellement nou aussi nou prié dan sa fason-la pou bann lezot chretien?

10. Kan nou prié pou lezot, ki l’effet sa kapav ena lor nou?

¹⁰ Kan nou prié pou lezot, sa kapav change nou l’attitude lor zot. Si nou prié pou enn dimoune ki nou pa trop content, kitfois nou l’attitude envers sa dimoune-la kapav changé. (1 Jean 4:20, 21) Bann la priere coumsa, zot encourageant ek favorise l’unité avek nou bann frere. En plus, sa qualité la priere-la montré ki nou content nou bann frere pareil couma Christ aussi content zot. (Jean 13:34, 35) Sa qualité-la forme partie dan fruit l’esprit saint Bondié. Eski personnellement nou prié pou gagne l’esprit saint, ek nou demann Jéhovah pou aide nou pou manifesté so fruit, setadir l’amour, la joie, la paix, patience, bienveillance, bonté, la foi, douceur, ek maitrise de soi? (Luc 11:13; Gal. 5:22, 23) Si oui, nou bann parole ek nou bann action pou montré ki nou pé marche ek nou pé vive par l’esprit.—Lire Galates 5:16, 25.

11. Kifer ou kapav dire ki li bon nou demann lezot pou prié pou nou?

¹¹ Si nou aprann ki dan lekol ki nou bann zenfant tenté pou goré ou-soit pou triké dan bann l’examen, nou bizin prié pou zot ek aussi servi la Bible pou aide zot, pou ki zot kapav agir dan enn fason honnete ek pa faire nanyin ki mauvais. Paul ti dire bann chretien dan Corinthe: “Nou prié Bondié pou ki zot pa faire nanyin ki mauvais.” (2 Cor. 13:7) Sa qualité la priere ki nou faire avek humilité-la, faire Jéhovah plaisir ek montré bann bon kitsoz lor nou. (Lire Proverbes 15:8.) Nou kapav demann lezot pou prié pou nou, pareil couma l’apotre Paul ti faire. Li ti ecrire: “Contigne prié pou nou, parski nou sur ki nou ena enn conscience droite, a cause nou envie reste honnete dan tou kitsoz.”—Héb. 13:18.

Nou la priere dire plus encore

12. Ki bann kitsoz principal nou bizin mentionné dan nou la priere?

¹² Eski nou bann la priere montré ki nou bann Témoins de Jéhovah heureux ek zelé? Ki kitsoz ki vinn en premier dan nou la priere? Eski nou suppliyé Jéhovah pou aide nou faire so volonté? Eski nou mentionne d’abord predication so Royaume, justification so souveraineté, ek sanctification so nom? C’est sa bann kitsoz principal-la ki nou bizin mentionné dan nou la priere. C’est seki Jésus ti montré dan la priere modele ki commence par sa bann parole-la: “Nou Papa ki dan le ciel, ki to nom sanctifié. Ki to royaume vini. Ki to volonté faire lor la terre pareil couma dan le ciel.”—Mat. 6:9, 10.

13, 14. Ki nou bann la priere montré lor nou?

¹³ Nou bann la priere montré ki mobile nou ena, ki kitsoz ki interesse-nou, ek ki desir nou ena. Jéhovah koné ki qualité dimoune nou été vrai-mem. Proverbes 17:3 dire: “Recipient ki servi pou purifié, li pou l’argent, ek four pou l’or, mais c’est Jéhovah ki examine bann leker.” Bondié trouve seki ena dan nou leker. (1 Sam. 16:7) Li koné ki nou pensé lor nou bann reunion, nou ministere, ek lor nou bann frere ek soeur spirituel. Jéhovah koné ki nou pensé lor “bann frere” Christ. (Mat. 25:40) Li koné si vrai-mem nou envie gagne bann kitsoz ki nou demandé dan nou la priere ou-soit si nou pé zis repete enn quantité mot. Jésus ti dire: “Kan zot prié, pa repete toujours bann mem kitsoz, couma tou bann nation faire, parski zot pensé [mais zot ena tort] ki si zot dire beaucoup parole, Bondié pou ecoute zot.”—Mat. 6:7.

¹⁴ Seki nou dire dan nou la priere montré aussi ki quantité nou compte lor Bondié. David ti dire: “[Jéhovah] finn vinn enn refuge pou moi, enn la tour ki fort devant mo bann l’ennemi. Mo envie vinn enn l’invité dan to la tente pou touletan; mo envie rod protection dan enn place cachiette enba to lezel.” (Ps. 61:3, 4) Kan Bondié coumadir ‘tal so la tente lor nou,’ nou senti-nou en securité ek nou gagne so protection. (Rév. 7:15) Sa reconforte nou vrai-mem pou approche-nou ar Jéhovah dan la priere avek l’assurance ki Li ‘avek nou’ kan nou pé gagne n’importe ki probleme ki testé nou la foi!—Lire Psaume 118:5-9.

15, 16. Grace a la priere, ki nou kapav trouvé lor nou bann desir pou gagne plus privilege dan congregation?

¹⁵ Bann la priere sincere ki nou dire Jéhovah en rapport avek nou bann mobile kapav aide nou pou trouvé ki qualité mobile nou ena vrai-mem. Par exemple, si nou envie gagne privilege pou ena enn responsabilité parmi bann serviteur Bondié, eski c’est vrai-mem parski nou envie aide lezot ek faire tou seki nou kapav pou faire l’interet Royaume Bondié avancé? Ou-soit eski li possible ki c’est parski nou envie occupe “premier place,” ou-soit mem ki nou envie “commann lor [lezot] couma bann chef ”? C’est pa coumsa ki bann kitsoz bizin passé parmi bann serviteur Jéhovah. (Lire 3 Jean 9, 10; Luc 22:24-27.) Si nou ena bann mauvais desir, nou bizin prié Jéhovah avek sincerité. Sa kapav aide nou pou trouve sa bann desir-la pli bien ek aide nou pou changé avant ki zot prend racine dan nou leker.

¹⁶ Bann femme chretien kitfois ena enn grand desir ki zot mari vinn assistant ministeriel ek kitfois plitar ancien. Sa bann soeur-la kapav agir en accord avek bann sentiment ki zot dire dan zot la priere kan zot faire tou seki zot kapav pou donne enn bon l’exemple. C’est enn kitsoz important, parski bann parole ek conduite famille enn frere kapav ena enn l’effet lor fason ki bann membre congregation considere li.

Represente lezot dan la priere publik

17. Kifer li bon ki nou tousel kan nou prié en privé?

¹⁷ Souvent Jésus ti al loin ar la foule pou li kapav prié so Papa en privé. (Mat. 14:13; Luc 5:16; 6:12) Nou aussi nou bizin bann moment kot nou tousel coumsa pou nou pa tann bann tapaz ki autour nou. Kan nou calme ek nou dan enn trankilité coumsa, nou pou pli kapav prend bann decision ki faire Jéhovah plaisir ek ki pou aide nou pou reste fort lor plan spirituel. Mais, Jésus ti prié aussi en publik, ek li bon ki nou guetté couma nou kapav faire sa dan enn bon fason.

18. Cite certain point ki bann frere bizin rappel kan zot pé represente la congregation dan enn la priere publik.

¹⁸ Dan nou bann reunion, bann zom fidele represente congregation dan bann la priere publik. (1 Tim. 2:8) Bann chretien ki pé ecouté bizin kapav dire “amen,” setadir “ki sa realisé,” a la fin sa bann la priere-la. Mais pou zot kapav faire sa, zot bizin d’accord avek seki’nn dire. Dan la priere modele ki Jésus ti montré nou, pa ti ena nanyin choquant ou-soit ki mank tact. (Luc 11:2-4) En plus, li pa ti mentionne en detail tou bann besoin ou-soit probleme chaque dimoune ki ti la. Nou kapav mentionne bann kitsoz personnel dan la priere ki nou faire en privé, pa en publik. Ek kan nou represente enn groupe dimoune dan la priere, fodé ki nou evite mentionne bann kitsoz confidentiel.

19. Ki comportement nou bizin ena pendant enn la priere publik?

¹⁹ Kan enn kikenn pé represente nou dan enn la priere publik nou bizin manifesté “la crainte pou Bondié.” (1 Pierre 2:17) Ena kitsoz ki ena so place ek so ler pou faire, mais ki pa approprié ki nou faire pendant reunion. (Eccl. 3:1) Par exemple, supposé ki enn kikenn envie ki tou dimoune dan enn groupe maille lé-bras ou-soit attrape la main pendant enn la priere publik. Sa kapav mette certain mal a l’aise, ou-soit mem distraire zot, parmi kapav ena bann visiteur ki pa Témoin. Bann couple kapav attrape zot la main dan enn fason discret, mais si zot maille zot camarade pendant enn la priere publik, bann ki remark sa qualité conduite-la kapav soké. Zot kapav pensé ou-soit ena l’impression ki sa couple-la pé concentré lor zot relation amoureux mais pa lor respé ki zot bizin ena pou Jéhovah. Alors, parski nou ena enn grand respé pou Li, anou “faire tou pou la gloire Bondié” ek evite pou ena enn conduite ki kapav distraire certain, sok zot ou-soit faire zot tombé lor plan spirituel.—1 Cor. 10:31, 32; 2 Cor. 6:3.

Prié pou ki kitsoz?

20. Couma ou pou explik Romains 8:26, 27?

²⁰ Parfois li kapav arrivé ki nou pa koné ki pou dire dan nou la priere personnel. Paul ti ecrire: “Probleme-la c’est: nou pa koné couma pou prié pou sa kitsoz ki nou bizin prié-la, mais l’esprit saint li-mem plaide pou nou avek bann soupir ki nou pa kapav exprimé en parole. Mais [Bondié] ki examine leker . . . konn bann pensée ki dan nou l’esprit.” (Rom. 8:26, 27) Jéhovah inn faire ecrire beaucoup la priere dan la Bible. Li accepté sa bann la priere inspiré-la coumadir c’est nou ki pé dire sa ek Li exauce zot. Bondié konn nou ek Li konn signification bann kitsoz ki Li’nn faire so l’esprit dire a travers bann ecrivain la Bible. Jéhovah reponn nou bann supplication kan l’esprit “plaide” pou nou. Mais, a mesure ki nou konn Parole Bondié pli bien, seki nou bizin demandé dan nou la priere pou vinn pli facile dan nou l’esprit.

21. Ki nou pou examiné dan prochain lartik?

²¹ Alors, couma nou finn trouvé, nou la priere dire beaucoup kitsoz lor nou. Par exemple, zot kapav montré ki quantité nou finn vinn proche ar Jéhovah ek ki quantité nou konn so Parole. (Jacq. 4:8) Dan prochain lartik, nou pou examine certain la priere ek expression ki bann dimoune inn servi dan zot la priere, ki la Bible mentionné. Ki l’effet sa bann kitsoz ki nou pou examiné dan la Bible-la kapav ena lor fason ki nou approche Bondié dan la priere?

Couma ou pou reponn?

• Ki qualité l’attitude nou bizin ena kan nou prié Jéhovah?

• Kifer nou bizin prié pou nou bann frere ek soeur spirituel?

• Ki nou la priere kapav montré lor nou ek lor nou bann mobile?

• Ki comportement nou bizin ena pendant bann la priere publik?

[Zimage page 11]

Eski regulierement ou loué ek remercié Jéhovah?

[Zimage page 13]

Nou comportement pendant bann la priere publik bizin toujours honore Jéhovah