DAN ENN LEMOND KI ANBA-LAO

4 | Kontign Ena Lespwar

KIFER LI INPORTAN?

Bann problem ek bann traka ki ena dan sa lemond-la kapav afekte bann dimounn lor plan fizik ek emosionel. Boukou ki’nn afekte par sa bann problem-la panse ki pena okenn lespwar ki enn zour sitiasion pou ameliore. Ki zot reaksion lerla?

Sertin refiz pou pans lor zot lavenir.
Lezot tom dan ladrog ouswa dan lalkol pou nway zot bann traka.
Sertin panse ki li pa vo lapenn kontign viv ek zot mem pans pou swisid zot.

Seki Ou Bizin Kone

Sertin ou bann problem tanporer ek ou sitiasion kapav ameliore san ki ou atann.
Mem si ou sitiasion pa sanze, ena bann kitsoz ki ou kapav fer pou sirmont sa bann problem-la.
Labib donn nou enn vre lespwar ek li promet ki ena enn solision pou tou bann problem ki bann dimounn gagne.

Seki Ou Kapav Fer

Labib dir: “Alor, pa bizin trakase pou dime, les dime get so zafer. Traka enn zour li ase pou zordi.”—Matie 6:34.

“Traka enn zour li ase.” Pa les bann traka demin anpes ou fer bann kitsoz ki ou sipoze fer zordi.

Si ou tro reflesi lor bann kitsoz negatif ki ou panse pou arive, sa kapav stres ou ek afebli lespwar ki ou ena dan enn pli bon lavenir.

KI OU KAPAV FER?—Esey Sa:

KONSANTRE LOR BANN KITSOZ POZITIF

Labib dir: “Okenn zour pa bon pou enn dimounn ki sagrin, me enn dimounn ki ena enn leker zwaye, li touletan pe fete.” (Proverb 15:15) Bien souvan, kan nou tro konsantre lor nou bann problem, nou pa trouve ki ena enn solision. Parkont, enn latitid pozitif kapav ed nou pou trouve kouma nou kapav fer fas ar nou bann problem.

Diminie letan ki ou pase pou get ouswa ekout bann linformasion.
Alafin lazourne, not de-trwa kitsoz ki ou finn bien kontan ek remersie Bondie.
Fer enn lalis bann kitsoz ki ou kapav fer dan enn zourne. Ek apre sa, kas bann gro travay ek fer zot bout par bout pou ki alafin lazourne, ou trouv rezilta ou bann zefor.

DEMANN LED

Labib dir: “Enn kikenn ki res dan so kwin . . . rezet lasazes ki pratik.” (Proverb 18:1) Si enn zour ou tom dan enn trou bien fon, ou pa pou kapav sorti ladan par oumem. Me si enn dimounn ed ou, ou pou kapav sorti ladan.

Demann ou bann fami ek ou bann kamarad pou ed ou.
Esey rod bann kitsoz ki ou kapav fer pou ed zot. Kan ou ed lezot, sa kapav ed ou pou pa res konsantre lor ou bann problem.
Si ou nepli ena lespwar ouswa ou santi ki li pa vo lapenn kontign viv, pa ezite pou al get enn dokter. Parfwa, kan nou santi nou tro afekte par bann problem, li kapav enn sign ki nou ena enn problem lasante, kouma depresion. Boukou dimounn finn geri apre ki zot inn swiv enn tretman medikal.a

a Leve! pa rekomann okenn tretman an partikilie.

Labib Donn Nou enn Vre Lespwar

Enn ekrivin Psom ti dir Bondie dan enn lapriyer: “To lalwa li enn lalanp ki ekler mo sime; enn far ki diriz mwa dan nwar.” (Psom 119:105) Se enn zoli fason pou dekrir Parol Bondie, Labib.

Kan nou pe marse aswar dan nwar, enn lalanp ouswa enn tors li ed nou pou trouv bien kotsa nou pe marse. Parey, dan Labib ena bann konsey bien saz ki gid nou kan nou ena pou pran bann desizion bien inportan.

Enn lalimier li ekler nou semin pou nou trouv devan nou. Dan mem fason, Labib li ekler nou ek ed nou pou trouve ki ena enn zoli lavenir pli devan.