Kan bann espion Izraelit ti al dan lavil Zeriko, zot ti res dan lakaz enn madam ki ti apel Raab. Kan lerwa Zeriko ti konn sa, li ti avoy bann solda dan lakaz Raab. Raab ti kasiet de espion-la lao so lakaz ek li ti fer bann solda-la al dan enn lot direksion. Li ti dir bann espion-la: ‘Mo pou ed zot parski mo kone ki Zeova avek zot ek ki zot pou pran sa pei-la. Silvouple, promet mwa ki zot pou sov mo fami.’

Bann espion-la ti dir Raab: ‘Nou promet twa ki personn dan to lakaz pa pou blese.’ Lerla, zot ti dir Raab: ‘Atas enn lakord rouz ar to lafnet, ek to fami pou sape.’

Raab ti servi enn lakord pou fer bann espion-la desann depi so lafnet. Zot ti al lor bann montagn ek zot ti kasiet laba pandan trwa zour. Apre sa, zot ti retourn kot Zozwe. Lerla, bann Izraelit ti travers Larivier Zourdin ek zot ti prepar zot pou pran pei-la. Zeriko ti premie lavil ki zot ti pran. Zeova ti dir zot fer letour lavil-la enn fwa par zour. Zot ti bizin fer sa pandan sis zour. Lor setiem zour, zot ti bizin fer set fwa letour lavil-la. Apre sa, bann pret ti sonn bann tronpet, ek bann solda ti kriy pli for ki zot ti kapav. Lerla, bann miray lavil Zeriko ti grene! Me lakaz Raab, ki ti lor miray, ti res anplas. Raab ek so fami ti sape parski zot ti ena konfians an Zeova.

Bann abitan lezot lavil Kanaan ti aprann seki ti ariv Zeriko. Zot bann lerwa ti desid pou lager ansam kont bann Izraelit. Me bann Gabaonit ti ena enn lot lide. Zot ti met bann linz desire lor zot, zot ti al get Zozwe ek zot ti dir li: ‘Nou sorti bien lwin. Nou’nn tann koz lor Zeova ek lor tou seki Li’nn fer pou zot dan Lezip ek dan Moab. Promet nou ki zot pa pou atak nou, ek nou pou vinn zot bann serviter.’

Zozwe ti krwar zot ek li ti promet pou pa atak zot. Me trwa zour apre, Zozwe ti aprann ki zot pa ti res tro lwin. Zot ti bann abitan Kanaan. Lerla, Zozwe ti demann bann Gabaonit: ‘Kifer zot finn koz manti ar nou?’ Zot ti reponn: ‘Nou’nn gagn per! Nou kone ki Zeova zot Bondie pe lager pou zot. Silvouple, pa touy nou.’ Zozwe ti tini so promes ek li pa ti touy zot.

Inpe apre, sink lerwa Kananeen ek zot larme ti menas bann Gabaonit. Zozwe ek so larme ti mars enn lanwit pou al sap zot. Zot ti koumans lager gramatin boner. Bann Kananeen ti koumans sove dan tou direksion. Me partou kot zot ti pe sove, Zeova ti fer bann gro lagrel tom lor zot. Lerla, Zozwe ti demann Zeova pou fer soley res anplas. Me soley zame pa finn res anplas avan! Alor, kifer li ti demann sa Zeova? Parski Zozwe ti ena konfians an Zeova. Pandan enn zour antie, soley pa ti al kouse, tanki bann Izraelit pa ti gagn laviktwar lor bann lerwa Kananeen ek zot larme.