Eski To Ena Konfians ki Zeova Touletan Azir dan Bon Fason?

1-2. (a) Azordi, kifer boukou dimounn trouv sa difisil pou fer konfians bann dimounn ki ena lotorite? (b) Ki nou pou examine dan sa lartik-la?

AZORDI, boukou dimounn trouv sa difisil pou fer konfians bann ki ena lotorite. Zot finn remarke ki bann gouvernman ek bann lalwa souvan protez bann dimounn ki ris ek ki ena pouvwar. Parkont, zot negliz bann dimounn ki mizer. Akoz samem, Labib dir: “Dimounn finn dominn dimounn pou zot prop maler.” (Ekle. 8:9) Anplis, sertin dimounn nepli ena konfians dan Bondie akoz fason ki sertin sef relizie azir. Alor, si nou pe etidie Labib avek enn kikenn, nou bizin ed li pou ena konfians dan Zeova ek dan bann frer ki pran latet dan lorganizasion.

² Me pa zis bann etidian Labib ki bizin ena konfians dan Zeova ek So lorganizasion. Mem si nou pe servi Zeova depi bien lontan, nou osi nou bizin ena konfians ki Zeova touletan azir dan enn bon fason. Me parfwa, sertin sitiasion kapav teste nou konfians an Zeova. Dan sa lartik-la, nou pou get trwa sitiasion ki kapav fer sa: (1) kan nou lir sertin zistwar dan Labib, (2) kan lorganizasion Zeova donn nou bann instriksion, ek (3) kan nou pou bizin fer fas ar bann difikilte dan lavenir.

FER ZEOVA KONFIANS KAN TO LIR LABIB

3. Kouma sertin zistwar dan Labib kapav teste nou konfians an Zeova?

³ Kan nou lir Labib, kitfwa nou kapav demann noumem kifer Zeova finn tret sertin dimounn dan enn sertenn fason ek kifer Li’nn pran sertin desizion. Par exanp, dan liv Nonb, nou trouve ki Zeova ti kondann enn Izraelit amor parski li ti ramas dibwa zour Saba. Ek dan liv 2 Samiel, nou trouve ki plizir lane plitar, Zeova ti pardonn Lerwa David mem si li ti komet limoralite ek ki li ti fer touy enn kikenn. (Nonb 15:32, 35; 2 Sam. 12:9, 13) Alor, nou kapav demann noumem, ‘Kifer Zeova finn pardonn David, me Li’nn kondann amor enn zom ki ti fer enn pese ki ti paret mwin grav?’ Pou nou gagn repons sa kestion-la, nou bizin rapel trwa kitsoz kan nou lir Labib.

4. Kouma Zenez 18:20, 21 ek Deteronom 10:17 fer nou ena plis konfians dan bann desizion ki Zeova pran?

⁴ Labib pa donn tou bann detay lor bann zistwar. Par exanp, nou kone ki David ti vremem repanti pou so bann pese. (Ps. 51:2-4) Me sa zom ki ti dezobeir lalwa lor Saba-la, ki kalite dimounn li ti ete? Eski li ti regret seki li ti fer? Eski li ti dezobeir bann lalwa Zeova dan lepase? Eski li ti deza rezet bann lavertisman ki li ti gagne? Labib pa dir nanye lor la. Selman, nou kapav sir ki Zeova “zame fer linzistis.” (Det. 32:4) Zeova ena tou bann linformasion. Ek Li pran bann desizion dapre tou bann linformasion ki Li ena. Zeova pa parey kouma bann imin ki baz zot desizion lor seki dimounn dir, lor bann prezize, ouswa lor lezot kitsoz ki kapav fos enn zizman. (Lir Zenez 18:20, 21; Deteronom 10:17.b) Plis nou aprann lor Zeova ek so bann prinsip, plis nou pou ena konfians dan so bann zizman. Alor, kan nou ena bann kestion lor enn zistwar Biblik ek ki nou pena zot repons pou linstan, nou konn nou Bondie ase bien pou ki nou sir ki Li “zis dan tou seki li fer.”​—Ps. 145:17.

5. Kouma nou linperfeksion kapav fer nou mal konpran enn sitiasion? (Get lankadre “Nou Linperfeksion Anpes Nou Konpran Bien Bann Sitiasion.”)

⁵ Akoz nou inparfe, nou pa touletan konpran bann sitiasion dan bon fason. Bondie finn kree nou dan so resanblans, akoz samem nou kontan lazistis. (Zen. 1:26) Selman, akoz nou inparfe, nou kapav mal konpran enn sitiasion, mem si nou panse ki nou ena tou bann linformasion. Par exanp, Zonas pa ti kontan ditou kan Zeova ti desid pou montre mizerikord anver bann abitan Niniv. (Zonas 3:10–4:1) Me ki ti arive apre? Plis ki 120,000 Ninivit ti repanti ek ti gagn lavi sov! Alafin, se Zonas ki ti ena tor, pa Zeova.

6. Kan Zeova pran enn desizion, kifer Li pa bizin explik nou pou ki rezon Li’nn pran sa desizion-la?

⁶ Kan Zeova pran enn desizion, Li pena pou donn nou okenn explikasion. Li vre ki dan lepase, Zeova ti permet ki so bann serviter exprim zot santiman konsernan bann desizion ki Li ti pran ouswa bann desizion ki Li ti pou pran. (Zen. 18:25; Zonas 4:2, 3) Ek parfwa, Li ti mem explik zot kifer Li ti pran sa desizion-la. (Zonas 4:10, 11) Me selman, Zeova pa oblize explik nou kifer Li pran enn desizion. Li nou Kreater, alor Li pa bizin nou permision pou pran enn desizion.​—Iza. 40:13, 14; 55:9.

FER ZEOVA KONFIANS KAN TO GAGN BANN INSTRIKSION

7. Ki kitsoz nou kapav gagn difikilte pou fer, ek kifer?

⁷ Nou sir ki Zeova touletan fer seki drwat. Me kitfwa nou gagn difikilte pou fer konfians bann frer ki pran latet dan lorganizasion. Kitfwa nou demann noumem si sa bann frer-la pe swiv bann lalwa Zeova, ouswa si zot pe etabli zot prop lalwa. Dan lepok Biblik, kitfwa sertin serviter Zeova ti pans koumsa. Anou reflesi lor bann lexanp ki nou ti mansione dan paragraf 3. Kan sa zom-la ti kondane amor parski li ti dezobeir lalwa lor Saba, enn manb so fami ti kapav dir, ‘Eski Moiz inn vremem rod direksion Zeova avan ki li pran sa desizion-la?’ Ek kan David ti komet limoralite ar Betsabe, enn kamarad Uri ti kapav panse ki David pa ti gagn okenn pinision parski li ti enn lerwa. Zeova ena konfians dan bann dimounn ki Li’nn etabli dan So lorganizasion ek dan lasanble. Alor, si nou pa fer zot konfians, se koumadir nou pa pe fer Zeova konfians.

8. Ki pwin komin ena ant seki mansione dan Zistwar Bann Apot 16:4, 5 ek fason ki lasanble Kretien fonksione azordi?

⁸ Azordi, Zeova servi “lesklav fidel ek saz” pou diriz parti so lorganizasion ki lor later. (Mat. 24:45, NW) Parey kouma Komite Santral dan premie siek, lesklav fidel ek saz diriz travay pep Bondie dan lemond antie ek li donn bann ansien bann instriksion. (Lir Zistwar Bann Apot 16:4, 5.) Lerla, bann ansien fer sir ki bann frer ek ser swiv sa bann instriksion-la. Nou montre ki nou ena konfians ki Zeova touletan azir dan enn bon fason, kan nou obeir bann instriksion ki nou gagne ar lorganizasion ek bann ansien.

9. Dan ki sitiasion nou kapav trouv sa difisil pou soutenir desizion bann ansien, ek kifer?

⁹ Parfwa, nou kapav trouv sa difisil pou soutenir bann desizion ki bann ansien pran. Par exanp, sa bann dernie lane-la, finn re-organiz bann lasanble ek bann sirkonskripsion. Dan sertin lasanble, bann ansien inn demann bann proklamater pou al dan enn lot lasanble, pou ki kantite bann asistan dan bann Lasal Renion pli ekilibre. Si demann nou pou al dan enn lot lasanble, kitfwa nou kapav trouv sa difisil pou kit nou bann kamarad ek nou fami. Nou kapav trouv sa difisil osi pou swiv seki bann ansien inn demann nou, parski se pa lespri sin ki’nn dir zot kotsa pou avoy sak proklamater. Me Zeova ena konfians dan bann ansien ek dan bann desizion ki zot pran, ek nou osi nou bizin fer zot konfians.c

10. Dapre Ebre 13:17, kifer nou bizin soutenir bann ansien?

¹⁰ Kifer nou bizin soutenir bann desizion ki bann ansien pran, mem si nou pa dakor avek zot? Parski kan nou fer sa, nou ede pou ki ena linite parmi pep Bondie. (Efe. 4:2, 3) Kan, avek limilite, tou dimounn dan lasanble soumet ar desizion ki komite bann ansien pran, lasanble gagn bann bienfe. (Lir Ebre 13:17, NW.d) Me pli inportan, kan nou soutenir bann ansien, nou montre Zeova ki nou fer Li konfians.​—Zist. 20:28.

11. Ki kitsoz kapav ed nou pou ena plis konfians dan bann desizion ki bann ansien pran?

¹¹ Nou pou ena plis konfians dan bann desizion ki bann ansien pran, si nou pa bliye ki zot priye Zeova avan ki zot pran enn desizion. Zot osi examinn bann prinsip Labib ek bann lezot instriksion ki lorganizasion donn zot. Zot vremem anvi fer Zeova plezir, ek zot fer zot best pou pran swin pep Zeova. Sa bann frer fidel la, kone ki zot ena bann kont pou rann Zeova konsernan fason ki zot asim zot bann responsabilite. (1 Pier 5:2, 3) Reflesi lor la: Dan enn lemond kot bann dimounn divize akoz zot ras, zot relizion, ek politik, pep Zeova pe ador sel vre Bondie dan linite. Sa li posib zis parski Zeova pe beni so lorganizasion!

12. Lor ki kitsoz bann ansien bizin bien reflesi kan zot bizin deside si enn kikenn inn vremem repanti?

¹² Zeova inn donn bann ansien enn gran responsabilite: Zot bizin veye ki lasanble res pir lor plan spiritiel. Kan enn Kretien fer enn pese grav, Zeova atann ki bann ansien deside si sa Kretien-la pou kapav kontign form parti dan lasanble. Bann ansien bizin gete si sa dimounn-la inn vremem repanti pou seki li’nn fer. Kitfwa li kapav dir ki li’nn repanti, me eski vremem li ena laenn pou seki li’nn fer? Eski li bien deside pou pa refer mem pese ankor? Si se so bann kamarad ki’nn inflians li pou fer sa pese-la, eski li pre pou aret frekant sa bann dimounn-la? Bann ansien pou priye Zeova, zot pou examinn bann linformasion ki zot ena, ek zot pou gete seki Labib dir lor la. Zot pou gete osi ki latitid sa dimounn-la ena anver pese ki li’nn fer. Ek apre sa, zot pou deside si sa dimounn-la kapav kontign form parti dan lasanble. Dan sertin sitiasion, kitfwa pou bizin exkli sa dimounn-la.​—1 Kor. 5:11-13.

13. Ki kapav arive si enn kamarad ouswa enn manb nou fami exkli?

¹³ Ki sitiasion kapav teste konfians ki nou ena dan bann ansien? Kan enn kikenn exkli, si li pa enn manb nou fami ouswa enn kamarad pros, kitfwa li pa pou difisil pou nou aksepte desizion ki bann ansien inn pran. Me si sa dimounn-la pros avek nou, kitfwa nou pa pou ena mem santiman. Kitfwa nou kapav panse ki bann ansien pa finn examinn tou bann linformasion, ouswa kitfwa nou pou demann noumem si bann ansien inn ziz sa dimounn-la dan mem fason ki Zeova ti pou ziz li. Ki kitsoz kapav ed nou pou gard enn bon latitid konsernan desizion ki bann ansien inn pran?

14. Ki kitsoz kapav ed nou si bann ansien desid pou exkli enn kamarad ouswa enn manb nou fami?

¹⁴ Fode pa nou bliye ki, exkli enn kikenn se enn dispozision ki Zeova inn pran. Gras-a sa dispozision-la, lasanble ek kitfwa mem sa dimounn ki’nn exkli la, gagn bann bienfe. Si enn kikenn ki’nn fer enn pese grav ek ki pa’nn repanti, kontign form parti dan lasanble, li kapav inflians lezot pou fer parey kouma li. (Gal. 5:9) Ek si pa exkli sa dimounn-la, kitfwa li pa pou rekonet ki li’nn fer enn pese grav, ek kitfwa li pa pou anvi sanz so fason panse ek so bann aksion pou ki li regagn faver Zeova. (Ekle. 8:11) Nou kapav sir ki bann ansien reflesi bien avan ki zot pran desizion pou exkli enn kikenn. Zot kone ki, parey kouma bann ziz dan Izrael, “zot pa pe ziz pou enn zom me pou Zeova.”​—2 Kro. 19:6, 7.

KAN TO FER ZEOVA KONFIANS DEPI ASTERLA-MEM, SA POU FORM TWA POU LAVENIR

15. Kifer nou bizin ena plis konfians dan bann instriksion ki Zeova donn nou?

¹⁵ Amezir ki lafin sa lemond-la pe koste, nou bizin ena plis konfians ki Zeova touletan azir dan enn bon fason. Kifer? Parski pandan gran detres, kitfwa nou pou gagn bann instriksion ki pou paret drol ek difisil pou obeir. Biensir, Zeova pa pou koz ar nou personelman. Li pou servi bann frer ki Li’nn etabli pou donn nou bann instriksion. Dan sa ler-la, fode pa nou ena bann dout, ouswa nou demann noumem, ‘Eski sa bann instriksion-la vremem sorti kot Zeova, ouswa eski se bann frer ki’nn pran sa bann desizion-la?’ Eski nou pou fer Zeova ek so lorganizasion konfians dan sa ler-la? Fason ki nou konsider bann instriksion ki nou gagne asterla, pou montre nou kouma nou pou reazir dan lavenir. Si nou ena konfians dan bann instriksion ki Zeova donn nou asterla, ek ki nou pa tarde pou obeir zot, nou pou fer parey pandan gran detres.​—Lik 16:10.

16. Dan lavenir, ki sitiasion pou teste nou konfians an Zeova?

¹⁶ Nou bizin reflesi osi lor kouma nou pou reazir kan Zeova pou ziz sa move lemond-la. Azordi, kitfwa nou gard lespwar ki bann dimounn ki pa servi Zeova, parmi ena nou bann fami ki pa Temwin, zot aksepte laverite avan ki lafin vini. Me kan Armagedon pou vini, Zeova pou servi Zezi pou pran enn desizion final konsernan zot lavenir. (Mat. 25:31-33; 2 Tes. 1:7-9) Se pa nou ki pou deside kisannla pou gagn mizerikord Zeova. (Mat. 25:34, 41, 46) Eski nou pou ena konfians dan zizman Zeova, ouswa eski nou pou aret servi Li parski nou pa dakor avek so bann desizion? Li bien inportan ki nou fer Zeova plis konfians depi asterla-mem, pou ki nou kapav fer Li full konfians dan lavenir.

17. Ki bienfe nou pou gagne kan Zeova pou ziz sa move lemond-la?

¹⁷ Mazine seki nou pou resanti dan lemond nouvo, kan nou pou trouv bann bon rezilta ki zizman Zeova finn amene. Fos relizion pou nepli existe. Sistem komersial ek politik ki’nn fer bann dimounn soufer toutlong listwar, pou’nn disparet net. Maladi, lavieyes, ek lamor pou nepli form parti nou lavi toulezour. Satan ek so bann demon pou nepli inflians bann dimounn pandan mil an, ek tou bann move kitsoz ki’nn arive parski zot finn rebel kont Zeova, pou nepli existe. (Rev. 20:2, 3) Dan sa moman-la, nou pou vremem rekonesan ki nou finn ena konfians dan fason ki Zeova azir!

18. Ki leson nou kapav aprann ar lexanp bann Izraelit, ki mansione dan Nonb 11:4-6 ek 21:5?

¹⁸ Dan lemond nouvo, eski nou pou gagn bann difikilte ki pou teste nou konfians dan fason ki Zeova azir? Par exanp, anou reflesi lor seki ti ariv bann Izraelit apre ki zot ti kit Lezip. Sertin parmi zot ti koumans plengne, parski zot ti mazinn bann bon manze ki zot ti pe gagne dan Lezip, ek zot ti pe koumans degout lamann ki Zeova ti donn zot. (Lir Nonb 11:4-6; 21:5.) Apre gran detres, eski nou osi nou pou ena mem latitid ki bann Izraelit? Nou pa kone ki kantite travay nou pou bizin fer pou netway later, pou fer li vinn enn paradi. Me kitfwa nou pou ena boukou travay pou fer, ek kitfwa nou lavi pa pou fasil o-koumansman. Eski nou pou plengne akoz bann kitsoz ki Zeova pou donn nou dan sa moman-la? Enn kitsoz nou kapav sir, se ki plis nou apresie bann kitsoz ki Zeova donn nou asterla, plis nou pou apresie seki Li pou donn nou dan lavenir.

19. Sit bann pwin inportan ki nou’nn examine dan sa lartik-la.

¹⁹ Nou bizin sir ki Zeova touletan azir dan bon fason. Nou bizin osi ena konfians dan bann frer ki Zeova inn etabli pou donn nou bann instriksion. Fode zame nou bliye bann parol ki Zeova ti dir profet Izai: “Kan zot res kalm ek fer mwa konfians, se samem ki pou zot lafors.”​—Iza. 30:15.