LESON 57
Ki Pou Arive si Ou Fer enn Pese Grav?
Mem si ou vremem kontan Zeova ek ou esey fer ou maximum pou pa fer nanye pou bles Li, parfwa ou pou fer bann erer. Selman, ena sertin pese ki pli grav ki lezot. (1 Korintien 6:9, 10) Si ou fer enn pese grav, rapel ki Zeova ankor kontan ou. Li anvi pardonn ou ek Li pou ed ou.
1. Ki nou bizin fer pou ki Zeova pardonn nou?
Bann ki kontan Zeova vremem sagrin kan zot realize ki zot inn fer enn pese grav. Me zot gagn rekonfor gras-a promes ki Zeova ti fer so pep: “Mem si zot pese rouz vif, sa bann pese-la pou vinn blan kouma lanez.” (Izai 1:18) Si nou vremem repanti, Zeova pou pardonn nou net. Kouma nou montre ki nou’nn repanti? Se kan nou vremem regret seki nou’nn fer, nou aret fer seki pa bon ek nou sipliy Zeova pou pardonn nou. Apre sa, nou fer zefor pou sanz nou move fason panse ouswa bann move labitid ki’nn amenn nou pou fer sa pese-la, ek nou esey fer nou best pou ena enn lavi ki fer Zeova kontan.—Lir Izai 55:6, 7.
2. Kouma Zeova servi bann ansien pou ed nou kan nou fer enn pese?
Si nou fer enn pese grav, Zeova dir nou ki nou “bizin apel bann ansien.” (Lir Zak 5:14, 15.) Sa bann zom ki Zeova finn swazir la, kontan Zeova ek so bann serviter. Zot inn gagn formasion ki bizin pou ed nou pou regagn enn bon lamitie avek Zeova.—Galat 6:1.
Kouma bann ansien kapav ed nou si nou’nn fer enn pese grav? De ouswa trwa ansien pou servi Labib pou explik nou kifer seki nou’nn fer pa bon. Zot pou osi donn nou bann konsey ek bann lankourazman pou ed nou pou ki nou pa refer enn pese. Si enn dimounn fer enn pese grav ek ki li pa repanti, bann ansien pou tir li dan lasanble pou ki li pena enn move inflians lor lezot.
ANOU GET INPE PLIS
Anou gete kouma ou kapav konpran ek apresie pli bien fason ki Zeova ed nou kan nou fer enn pese grav.
3. Konfes nou bann pese ed nou pou regagn nou relasion avek Zeova
Kan nou fer enn pese, nou fer Zeova so leker fermal. Alor, li normal ki nou konfes nou pese avek Li. Lir Psom 32:1-5, ek apre sa, get sa kestion-la ansam:
Kifer li bon ki nou konfes nou bann pese ar Zeova, olie ki nou esey kasiet zot?
Apre ki nou’nn konfes nou bann pese ar Zeova, nou kapav gagn rekonfor kan nou rod led bann ansien. Zwe VIDEO-la, ek apre sa, get sa kestion-la ansam:
Dan sa video-la, kouma bann ansien ti ed Canon pou retourn ar Zeova?
Nou bizin fran ek onet avek bann ansien, parski zot la pou ed nou. Lir Zak 5:16, ek apre sa, get sa kestion-la ansam:
Kifer li pli fasil pou bann ansien pou ed nou kan nou onet avek zot?
Ou bizin konfes ou bann pese, onet avek bann ansien, ek aksepte led ki Zeova pe donn ou avek boukou lamour
4. Zeova montre mizerikord anver bann ki fer pese
Si enn dimounn ki’nn fer enn pese grav refiz pou swiv bann prinsip Zeova, pou tir li dan lasanble, ek nou pou nepli kapav frekant li. Lir 1 Korintien 5:6, 11, ek apre sa, get sa kestion-la ansam:
Parey kouma enn tigit levin fer lapat gonfle, ki lefe sa pou ena si bann manb lasanble frekant enn dimounn ki pa’nn repanti?
Pou imit mizerikord Zeova anver bann ki fer pese, bann ansien pran linisiativ pou al ver bann ki nepli form parti dan lasanble pou ed zot. Boukou parmi zot inn retourn dan lasanble. Kifer? Mem si sa ti fer zot soufer kan ti tir zot dan lasanble, sa ti ed zot pou realize ki seki zot ti fer pa bon.—Psom 141:5.
Kouma fason ki Zeova azir anver bann ki fer pese montre ki li rezonab, li ena mizerikord ek li ena boukou lamour?
5. Zeova pardonn nou kan nou repanti
Zezi ti servi enn lexanp pou ed nou konpran seki Zeova resanti kan enn dimounn repanti. Lir Lik 15:1-7, ek apre sa, get sa kestion-la ansam:
Ki sa lexanp-la aprann ou lor Zeova?
Lir Ezekiel 33:11, ek apre sa, get sa kestion-la ansam:
Ki kitsoz inportan nou bizin fer pou montre ki nou’nn vremem repanti?
Parey kouma enn berze, Zeova vremem gagn traka so mouton
SERTIN DIMOUNN DIR: “Mo per pou dir bann ansien seki mo’nn fer, tansion bann-la tir mwa dan lasanble.”
Ki ou ti pou dir enn dimounn ki pans koumsa?
SEKI NOU’NN APRANN
Si nou’nn fer enn pese grav, Zeova pou pardonn nou si nou vremem regrete ek si nou determine pou aret fer seki pa bon.
Eski Ou Rapel?
Kifer li bon ki nou konfes nou bann pese ar Zeova?
Ki nou bizin fer pou ki Zeova pardonn nou bann pese?
Si nou fer enn pese grav, kifer nou bizin rod led bann ansien?
DEKOUVER
Gete kouma enn misie inn resanti mizerikord Zeova ki dekrir dan Izai 1:18.
Kouma bann ansien esey ed bann kiʼnn fer enn pese grav?
“Ansien, Montre Lamour ek Mizerikord Anver Bann Ki Fer Pese” (Latour Degard, Out 2024)
Gete kouma montre lamour ek mizerikord anver enn kikenn ki paʼle repanti.
“Ansien, Ed Bann Ki Nepli Form Parti dan Lasanble” (Latour Degard, Out 2024)
Dan lartik « Il fallait que je revienne vers Jéhovah, » aprann kifer enn misie ki’nn elwagn li ar laverite inn resanti ki Zeova ti ed li pou retourne.
“Labib Sanz Bann Dimounn” (Latour Degard, 1e Avril 2012, an Franse)