Nou Relasion Avek Bondie
Parey kouma nou’nn trouve dan premie lartik, boukou dimounn konsider Labib kouma enn liv sakre. Zot remarke ki kan zot lir li ek aplik so bann konsey, zot santi zot pli pros ar Bondie ek zot arive gagn enn lobzektif dan lavi.
Labib dir ki bann dimounn ki ena “Lespri Sin” Bondie ena enn bon latitid dan lavi. (Zid 18, 19) Bann dimounn ki pa’le ki Bondie gid zot, fie zot lor zot prop lopinion. Me bann dimounn ki anvi ki Bondie gid zot donn so bann prinsip enn gran valer.—Efezien 5:1.
LESPWAR
PRINSIP LABIB: “Si to dekouraze zour ki maler vinn lor twa, to pou ena enn tigit lafors mem.”—Proverb 24:10.
KI SAVEDIR: Dekourazman kapav tigit-tigit minn kouraz ki nou bizin pou fer fas ar bann problem ki nou gagne dan lavi. Parkont, lespwar kapav donn nou kouraz pou kontign al delavan. Sa kapav rekonfort nou kan nou rekonet ki bann problem ki nou pe gagne zot tanporer; avredir, enn kitsoz ki pli bon kapav pe atann nou devan.
KI OU KAPAV FER: Pans lor bann bon kitsoz ki pou arive dan lavenir. Olie ki ou gagn traka lor seki kapav arive ouswa atann ki enn sitiasion parfe prezant devan ou, pran linisiativ pou realiz ou bann lobzektif. Li vre ki ‘bann sitiasion ki nou pa atann kapav arive.’ (Ekleziast 9:11) Me, avredir, souvan bann kitsoz pas pli bien ki seki nou ti pe atann. Pou ed nou konpran sa, Labib servi enn lexanp ki lie ar plantasion. Li dir: “Dan gramatin, sem to bann lagrin ek ziska aswar pa les to lame repoze; parski to pa kone lekel pou reisi, swa sannla swa lot la, ouswa toulede.”—Ekleziast 11:6.
REPONS POU BANN KESTION INPORTAN LOR LAVI
PRINSIP LABIB: “Tou seki ena dan to parol li laverite.”—Psom 119:160, NW.
KI SAVEDIR: Labib donn repons pou bann kestion ki preske tou dimounn demann zotmem. Par exanp, li reponn sa bann kestion-la:
Kotsa nou sorti?
Kifer nou lor later?
Ki arive kan enn dimounn mor?
Eski samem lavi?
Bann milye dimounn dan lemond finn amelior zot lavi kan zot finn examinn bann repons ki Labib done pou sa bann kestion-la ek lezot ankor.
KI OU KAPAV FER: Examinn par oumem seki Labib ansegne. Demann enn Temwin Zeova pou ed ou konpran seki ena dan Labib. Vizit nou sit Internet, jw.org, ouswa asiste enn nou bann renion, tou dimounn kapav asiste ek lantre gratis.
BANN LEZOT PRINSIP LABIB
Get video Kifer Li bon Etidie Labib? lor jw.org. Li disponib dan plis ki 880 lang
REKONET KI OU BIZIN BONDIE.
“Ere bann ki rekonet ki zot bizin direksion Bondie.”—MATIE 5:3, NW.
APRANN PLIS LOR BONDIE KI MANSIONE DAN LABIB.
“Apros zot ar Bondie e li pou vinn pros ar zot.”—ZAK 4:8.
LIR EK REFLESI LOR MESAZ KI ENA DAN LABIB.
“Ere sa kikenn . . . ki kontan lalwa Zeova,a ek li medit lor So lalwa lanwit-lizour. . . . Tou seki li fer pou reisi.”—PSOM 1:1-3, not, NW.
a Zeova se nom Bondie dan Labib.