LAVI PE VINN PLI SER—KOUMA POU FER FAS?

Gard Lespwar

Eski dan ou pei pli ale lavi pe vinn pli ser, me selman ou lapey pe res parey? Eski ou gagn traka kouma ou pou pran oumem ek ou fami swin? Si wi, kitfwa ou gagn traka pou lavenir. Me mem dan bann sitiasion difisil koumsa, li bon ki ou gard lespwar.

KIFER SA LI INPORTAN?

Bann dimounn ki ena lespwar, zot pa zis atann ki bann bon kitsoz pou arive. Lespwar motiv sa bann dimounn-la pou fer tou seki zot kapav pou amelior zot sitiasion. Par exanp, bann resers montre ki bann dimounn ki ena lespwar . . .

zot andir pli bien bann sitiasion difisil
zot plis kapav adapte zot ar bann sanzman
zot pran bann pli bon desizion ki ed zot pou ena enn pli bon lavi ek enn pli bon lasante

SEKI OU KAPAV FER

Premie, gete kouma Labib kapav ed ou azordi. Dan Labib, ena bann bon konsey ki kapav ed ou pou fer fas ar lavi ki pe vinn pli ser. Sa bann konsey-la kapav ed ou pou ena plis kontrol lor ou lavi aster-la, ek li kapav ed ou pou fer fas ar bann lezot difikilte ki kapav ena plitar osi.

“Kapasite pou reflesi pou vey lor twa, ek disernman pou protez twa.”—Proverb 2:11.

Deziem, gete ki Labib dir lor lavenir. Kan ou trouve ki kantite bann konsey ki ena dan Labib zot saz, ou pou anvi aprann konn plis lor seki li dir lor lavenir. Par exanp, ou pou aprann ki Bondie li pa zis anvi ki ou ena “enn lavenir ek enn lespwar” me li osi donn ou enn bon rezon pou krwar dan sa lespwar-la. (Zeremi 29:11) Ek sa bon rezon-la, se Rwayom Bondie.

KI ETE RWAYOM BONDIE, EK KI LI POU FER?

Rwayom Bondie, se enn gouvernman ki pou pran kontrol lor later antie. (Daniel 2:44; Matie 6:10) Kan sa rwayom-la pou dirize depi lesiel, pou nepli ena bann dimounn pov ek personn pa pou soufer, ek tou dimounn pou viv dan lape ek zot pou gagn tou seki zot bizin pou zot ere, parey kouma li dir dan sa bann verse ki ena apre la.

“To pou ere ek tou pou mars bien pou twa.”—Psom 128:2.

“Zot [bann dimounn lor ki Rwayom Bondie pou dirize] pa pou rinte pou nanye.”—Izai 65:23.

“Pou ena sereal an-abondans lor later.”—Psom 72:16.

Bann milyon dimounn ena konfians dan sa bann promes-la, ek zot sir ki Bondie “pa kapav koz manti.” (Tit 1:2) Alor, kifer ou pa examinn seki ena dan Labib? Lespwar ki Labib done kapav ed ou pou andir bann moman difisil, ek pou ena konfians ki pou ena enn pli bon lavenir pli devan.