KI MISSION Jésus ti ena lor la terre? Li-mem li ti dire: “Mo bizin annonce la bonne nouvelle lor royaume Bondié . . . parski c’est a cause sa ki finn envoye moi.” (Luc 4:43) Anou guette quatre kitsoz ki Jésus ti enseigné lor Royaume Bondié ki ti sujet principal so predication.

1. Jésus ti pou le Roi sa Royaume-la. Jésus ti dire directement ki li ti le Messie ki ti annoncé. (Jean 4:25, 26) Li ti aussi montré ki li ti le Roi ki prophete Daniel ti’nn trouvé dan enn vision. Jésus ti dire so bann zapotre ki enn jour li ti pou assize lor enn “trone rempli ar la gloire” ek ki zot aussi zot pou assize lor bann trone. (Matthieu 19:28) Li ti koz lor sa groupe le roi-la couma enn “ti troupeau,” ek li ti dire aussi ki li ti ena bann “lezot brebis,” ki pa ti forme partie dan sa groupe-la.—Luc 12:32; Jean 10:16.

2. Royaume Bondié ti pou favorise la justice. Jésus ti dire ki Royaume Bondié ti pou tire pli grand l’injustice kan li pou sanctifié, setadir rann saint, nom Jéhovah ek purifié li ar tou deshonneur ki Satan inn mette lor la depuis rebellion ki ti ena en Éden. (Matthieu 6:9, 10) Jésus ti aussi montré ki li pa ti faire okenn preference kan li ti enseigne bann missié ek bann madame, bann riche ek bann misere, sans faire okenn difference. Mem si c’est surtout bann Israélite ki li ti bizin enseigné, li ti aide aussi bann Samaritain ek bann Gentil, setadir bann non-Juif. Li pa ti pareil couma bann chef religieux juif dan so lepok. Li, li pa ti montré okenn preference envers personne.

3. Royaume Bondié pa ti pou faire partie dan sa le monde-la. Jésus ti vive dan enn lepok kot ti ena bann grand bouleversement dan domaine politik. So pays ti enba domination enn pouvoir etranger. Pourtant, kan bann dimoune ti essaye faire li impliké dan politik dan so lepok, li ti sauvé li ti allé. (Jean 6:14, 15) Li ti dire enn politicien: “Mo royaume pa faire partie dan sa le monde-la.” (Jean 18:36) Ar so bann disciple, li ti dire: “Zot pa faire partie dan le monde.” (Jean 15:19) Li pa ti laisse zot servi bann zarme, mem pou defann li.—Matthieu 26:51, 52.

4. Regne Christ pou basé lor l’amour. Jésus ti promette pou reconforte bann dimoune ek pou soulage zot ar zot fardeau. (Matthieu 11:28-30) Li ti faire seki li ti dire. Li ti donne bann conseil pratik, rempli ar l’amour ki ti aide zot pou faire face ar zot tracas, pou ameliore zot relation avek zot prochain, pou lutte kont materialisme, ek pou trouve le bonheur. (Matthieu chapitre 5-7) Parski li ti montré l’amour, tou sorte qualité dimoune ti senti-zot a l’aise pou approche li. Mem bann dimoune ki ti pé souffert a cause lezot, ti vinn vers li, zot ti sur ki li ti pou traite zot avek bonté ek li ti pou respecté zot dignité. Oui, Jésus pou vrai-mem enn le Roi extraordinaire!

Ena enn lot fason extraordinaire ki Jésus ti enseigne lezot lor Royaume Bondié. Li ti faire beaucoup mirak. Kifer li ti faire sa? Anou guetté.

—Basé lor bann livre Matthieu, Marc, Luc ek Jean.

BONDIÉ ti donne Jésus pouvoir pou faire bann kitsoz ki lezot dimoune pa ti kapav faire. Li ti faire beaucoup mirak—souvent devant bann grand la foule. Sa bann mirak-la ti montré ki Jésus ti ena pouvoir lor bann l’ennemi ek lor bann obstacle ki bann dimoune imparfait jamais pa finn kapav eliminé. Anou prend deux-trois l’exemple.

Li ti donne bann dimoune mangé ek boire. Premier mirak ki Jésus ti faire c’est change de l’eau en di-vin. Deux fois, li ti nourri plusieurs millier dimoune ki ti faim avek zis deux-trois di-pain ek poisson. Dan toulé-deux cas, ti ena plus mangé ki ti bizin pou chaque dimoune.

Li ti gueri bann malade. Jésus ti gueri bann dimoune ki ti ena “toute sorte qualité maladie ek toute sorte qualité handicap.” (Matthieu 4:23) Jésus ti gueri bann aveugle, bann sourde, bann ki ti ena la lepre, ek bann ki ti gagne epilepsie. Li ti gueri aussi bann boiteux, bann handicapé, ek bann ki pa ti ena enn membre dan zot lekor. Pa ti ena okenn maladie ki li pa ti kapav gueri.

Li ti ena pouvoir lor mauvais le temps. Kan Jésus ek so bann disciple ti pé voyagé dan enn bateau lor la mer Galilée, enn coup, le temps ti commence gaté ek enn tempete bien fort ti levé. Bann disciple ti extra peur. Mais Jésus li, li ti zis guette tempete-la ek ti dire: “Reste trankil! Calmé-toi!” Ek lerla ti ena enn grand calme. (Marc 4:37-39) Enn lot fois, li ti marche lor de l’eau pendant enn grand tempete.—Matthieu 14:24-33.

Li ti ena pouvoir lor bann mauvais l’esprit. Bann mauvais l’esprit zot beaucoup pli fort ki bann dimoune. Beaucoup dimoune pa finn kapav libere-zot ar pouvoir sa bann mauvais l’ennemi Bondié-la. Pourtant, plusieurs fois, kan Jésus ti donne l’ordre bann mauvais l’esprit pou sorti dan bann dimoune ki ti possedé, zot ti laisse bann dimoune-la trankil. Jésus pa ti peur sa bann l’esprit-la. Au contraire, zot ti koné ki qualité pouvoir li ena ek zot ti peur li.

Li ti ena pouvoir lor la mort. La Bible appel la mort “dernier l’ennemi” ek li ena raison, parski la mort li enn l’ennemi ek okenn dimoune pa kapav gagne enn victoire lor li. (1 Corinthiens 15:26) Pourtant, Jésus ti ressuscite bann dimoune mort. Parmi ti ena enn jeune homme, so mama ti enn veuve. Li ti ressuscite aussi enn jeune fille ki ti retrouve so bann parent ki ti en deuil. Enn resurrection extraordinaire ki Jésus ti faire c’est kan li ti ressuscite Lazare, so bon camarade, mem si li ti’nn mort depuis quatre jour! Li ti faire sa devant enn la foule dimoune ki ti pé ploré. Mem bann pli grand l’ennemi Jésus ti reconette ki li ti faire sa mirak-la.—Jean 11:38-48; 12:9-11.

Kifer Jésus ti faire sa bann mirak-la? Apré tou, eski tou sa bann dimoune ki li ti ressuscité-la pa ti remort apré? Oui, mais bann mirak ki Jésus ti faire, ti accompli enn bon kitsoz ki ti dure pou touletan. Zot ti montré ki tou bann prophetie extraordinaire lor regne nou le Roi messianik ti basé lor bann preuve solide. Nou pena okenn raison pou douté ki le Roi ki Bondié inn etabli pena pouvoir pou tire la faim, maladie, mauvais temps, bann mauvais l’esprit, ou-soit la mort li-mem. Li’nn fini donne bann preuve ki Bondié inn mette tou sa pouvoir-la dan so la main.

—Basé lor livre Matthieu, Marc, Luc, ek Jean.

LOR mont des Oliviers, ti ena enn joli la vue lor Jérusalem ek so temple ki ti trouve pli enba. Quatre parmi bann zapotre Jésus ti pose li question lor certain kitsoz ki li ti dire avant. Jésus ti fek dire ki temple Jérusalem ti pou detruire. Enn tipé avant, li ti koz lor “conclusion sa systeme-la” avek zot. (Matthieu 13:40, 49) Asterla, sa bann zapotre-la ti demann li: “Ki signe pou montré to presence ek conclusion sa systeme-la?”—Matthieu 24:3.

Dan so reponse, Jésus ti dire seki ti pou arrivé avant destruction Jérusalem. Mais seki li ti dire implik plus ki sa. Plitar, so prophetie ti pou ena enn pli grand realisation dan le monde entier. Jésus ti donne enn prophetie lor enn serie l’evenement ek bann condition ki ti pou arrivé dan le monde ek sa ti pou forme enn signe. Sa signe-la ti pou montré bann dimoune lor la terre ki presence Jésus en tant ki le Roi dan le ciel ti’nn commencé. Sa vedir ki sa ti pou montré ki Jéhovah ti’nn faire Jésus vinn le Roi dan Royaume messianik, enn Royaume ki depuis longtemps Li ti’nn promette. Sa signe-la ti pou faire koné ki Royaume messianik ti pré pou tire mechanceté lor la terre, ek amenn vrai la paix pou bann dimoune. Alors, sa bann kitsoz ki Jésus ti annoncé-la ti pou montré ki nou finn rente dan bann dernier jour sa vié systeme-la—systeme religieux, politik, ek social ki existé asterla—ek ki enn nouveau systeme ti pré pou commencé.

Jésus ti expliké seki ti pou arrivé lor la terre pendant so presence en tant ki le Roi dan le ciel. Li ti dire ki ti pou ena bann la guerre dan le monde, la famine, bann grand tremblement de terre, ek bann l’epidemie partout. Bann dimoune ti pou desobeir la loi ek sa ti pou augmenté. Bann vrai disciple Jésus ti pou preche la bonne nouvelle lor Royaume Bondié partout lor la terre. Tou sa bann kitsoz-la ti pou fini avek enn “grand tribulation” couma jamais pa finn ena avant.—Matthieu 24:21.

Couma bann disciple Jésus ti pou koné kan sa tribulation-la ti pré pou vini? Jésus ti dire: “Prend l’exemple pié figue.” (Matthieu 24:32) L’apparence bann feuille lor branche enn pié figue c’est enn signe ki l’été pré. Li pareil aussi avek seki Jésus ti annoncé, kan so bann disciple pou trouve tou seki li ti annoncé arrivé dan enn certaine periode le temps, sa ti pou enn signe bien clair ki la fin pré. Personne a part le Père pa ti pou konn jour ek ler exact kan la grande tribulation ti pou commencé. Alors, Jésus ti donne sa conseil-la so bann disciple: “Contigne veillé, parski zot pa koné kan le temps fixé pou arrivé.”—Marc 13:33.

—Basé lor Matthieu chapitre 24 ek 25; Marc chapitre 13; Luc chapitre 21.