Montré ki nou zelé pou lakaz Jéhovah!
“Zele pou to lakaz pou devore moi.”—JEAN 2:17.
1, 2. Ki Jésus ti faire dan temple en l’an 30 nou lepok, ek kifer?
MAZINN sa l’evenement-la: Nou pendant fête Pâque, en l’an 30 nou lepok. Six mois avant, Jésus ti commence so ministere. Asterla, li pé al vers Jérusalem. La-bas dan temple, dan la Cour bann Gentils, Jésus trouve “bann ki ti pé vann boeuf, mouton ek pigeon ek bann ki pé change l’argent, assizé lor zot chaise.” Avek enn fouette ki li’nn faire ar bann la corde, li pousse tou bann zanimo ek bann marchand, dehors. Jésus fann aussi tou bann piece l’argent bann dimoune ki change kass ek devire zot la table enba-la-haut. Li donne l’ordre bann ki pé vann bann pigeon pou prend tou seki zot ena ek pou allé.—Jean 2:13-16.
2 Seki Jésus ti faire, montré bien ki temple Bondié ti important pou li. Li ti donne sa l’ordre-la: “Arrete faire lakaz mo Papa vinn enn lakaz kot faire commerce!” Kan bann disciple Jésus ti observe sa bann l’evenement-la, sa ti faire zot rappel bann parole ki ti ecrire plusieurs siecle avant par psalmiste David: “Zele pou to lakaz pou devore moi.”—Jean 2:16, 17; Ps. 69:9.
3. (a) Ki sa vedir zele? (b) Ki question nou kapav demann nou-mem?
3 Jésus ti interessé ar lakaz Bondié, li ti ena zele pou sa lakaz-la ek c’est sa ki ti pousse li pou agir. Zele, c’est “enn grand desir ek enn grand l’interet pou faire enn kitsoz.” Dan sa 21eme siecle ki nou pé vive-la, ena plus ki sept million chretien ki montré zot zele pou lakaz Bondié. Sakenn parmi nou kapav demann li-mem: ‘Couma mo kapav augmente zele ki moi mo ena pou lakaz Jéhovah?’ Pou aide nou reponn sa question-la, d’abord nou pou guetté ki lakaz Bondié representé zordi. Apré sa, nou pou examine l’exemple bann zom fidele mentionné dan la Bible ki’nn manifesté zele pou lakaz Bondié. Zot l’exemple finn ecrire “pou nou l’instruction” ek kapav pousse nou pou ena enn pli grand zele encore.—Rom. 15:4.
Lakaz Bondié—Dan le passé ek asterla
4. Dan ki but Salomon ti construire temple?
4 Dan le passé en Israël, lakaz Bondié ti temple ki ti ena dan Jérusalem. Bien sur, Jéhovah pa ti vrai-mem reste ladan. Li ti dire: “Le ciel c’est mo trone, ek la terre c’est mo ti banc kot mo pose mo lipié. Alors kot lakaz ki zot kapav construire pou moi, ek kot place ki mo kapav servi pou mo reposé?” (Is. 66:1) Mais, temple ki ti construire pendant regne Salomon, ti l’endroit principal kot bann dimoune ti allé pou adore Jéhovah, ek kot zot ti kapav al faire la priere.—1 Rois 8:27-30.
5. Ki temple Salomon representé zordi?
5 Zordi, lakaz Jéhovah li pa enn batiment ki trouve dan Jérusalem ni dan okenn lezot place. C’est plutot disposition ki Bondié inn prend pou nou kapav adore Li lor base sacrifice Christ. Tou bann fidele serviteur Bondié lor la terre zot uni pou adore Jéhovah dan sa temple spirituel-la.—Is. 60:4, 8, 13; Actes 17:24; Héb. 8:5; 9:24.
6. Cite bann le roi ki ti regne en Juda, ki ti montré enn zele extraordinaire pou vrai l’adoration.
6 Apré division nation Israël en 997 avant nou lepok, parmi 19 le roi ki ti regne en Juda, dan le sud, 4 ladan ti montré enn zele extraordinaire pou vrai l’adoration. Sa quatre le roi-la ti Asa, Yehoshaphat, Hizqiya, ek Yoshiya. Ki bann leson important nou kapav aprann ar zot l’exemple?
Kan nou servi avek tou nou leker nou gagne bann benediction
7, 8. (a) Ki qualité service Jéhovah beni? (b) Ki leson nou aprann ar l’exemple le roi Asa?
7 Pendant regne le roi Asa, Jéhovah ti envoye bann prophete pou guide So peuple pou zot reste fidele. Par exemple, la Bible dire nou ki Asa ti ecoute prophete Azaria, garson Oded. (Lire 2 Chroniques 15:1-8.) Bann changement ki Asa ti faire ti uni peuple Juda ek aussi enn bon quantité dimoune dan royaume Israël ki ti desann Juda pou assisté enn grand l’assemblée dan Jérusalem. Zot tou ensam zot ti dire ki zot bien decidé pou adore Jéhovah avek fidelité. Nou lire: “Zot ti faire serment ar Jéhovah avek enn la voix bien fort, ek zot ti criyé ar la joie, avek bann trompette ek avek bann cor. Zot tou dan Juda ti content a cause sa serment-la; parski c’est avek tou zot leker ki zot ti faire sa serment-la ek c’est avek enn grand plaisir ki zot ti rod Li, alors Li ti laisse zot trouve Li; ek Jéhovah ti contigne donne zot trankilité tout autour.” (2 Chron. 15:9-15) Pena doute ki Jéhovah pou beni nou pareil si nou servi Li avek tou nou leker.—Marc 12:30.
8 Malheureusement, plitar Asa ti offensé kan Hanani, enn voyant, ti corrige li. (2 Chron. 16:7-10) Couma nou reagir kan Jéhovah servi bann ancien pou conseil nou ou-soit pou donne nou bann instruction? Eski nou accepté desuite zot bann conseil ki basé lor la Bible ek nou applik zot ek faire enn maniere pou pa tombe dan piege pou vinn amer kont zot?
9. Ar ki menace Yehoshaphat ek bann habitant Juda ti bizin faire face, ek couma zot ti reagir?
9 Yehoshaphat ti regne dan Juda dan 10eme siecle a.n.l. Dan so lepok, bann l’armée Ammôn, Moab ek bann habitant montagne Séïr ti menace pou attak li ek tou bann habitant Juda. Mem si le roi ti peur, ki li ti faire? Li ek bann zom dan Juda ensam avek zot femme ek zot zenfant, ti rassemblé dan lakaz Jéhovah pou prié. (Lire 2 Chroniques 20:3-6.) En accord avek seki Salomon ti dire pendant l’inauguration temple, Yehoshaphat ti suppliye Jéhovah: “Ah nou Bondié, eski to pa pou amenn jugement lor zot? Parski nou pena okenn la force devant sa grand la foule ki pé vinn kont nou-la; ek nou, nou pa koné ki nou pou faire, mais nou lizié tourné vers toi.” (2 Chron. 20:12, 13) Apré ki Yehoshaphat ti prié “au milieu sa l’assemblée-la,” l’esprit Jéhovah ti pousse Yahaziël, enn Lévite, pou dire bann parole encourageant ki ti donne le peuple confiance.—Lire 2 Chroniques 20:14-17.
10. (a) Couma Yehoshaphat ek bann habitant Juda ti gagne bann instruction? (b) Couma nou kapav montré ki nou apprecié direction ki Jéhovah donne nou zordi?
10 Oui, dan sa lepok-la, Yehoshaphat ek royaume Juda ti gagne bann instruction ar Jéhovah par l’intermediaire Yahaziël. Zordi, nou gagne l’encouragement ek bann instruction par l’esclave fidele et avisé. Bann ancien ki’nn etabli dan congregation, zot travail dur pou prend nou soin ek pou mette en pratik bann instruction ki “l’esclave fidele et avisé” donne nou. Alors nou envie touletan coopere avek zot ek montré respé pou zot.—Mat. 24:45; 1 Thess. 5:12, 13.
11, 12. Ki leson nou kapav tiré ar seki’nn arrive Yehoshaphat ek peuple Juda?
11 Pareil couma Yehoshaphat ek so peuple ti rassemblé ensam pou rod direction Jéhovah, nou aussi, nou bizin assisté reunion regulierement avek nou bann frere ek soeur ek pa neglige sa privilege-la. Si parfois nou retrouve-nou dan bann situation difficile, kot nou pa koné ki pou faire, anou suive bon l’exemple ki Yehoshaphat ek peuple Juda inn donne nou ek nou tourne-nou vers Jéhovah dan la priere avek enn confiance total en Li. (Prov. 3:5, 6; Phil. 4:6, 7) Mem si nou isolé, nou bann la priere ar Jéhovah faire nou reste uni avek “la famille international [nou] bann frere.”—1 Pierre 5:9.
12 Yehoshaphat ek so peuple ti suive direction ki Bondié ti donne zot par Yahaziël. Ki resultat zot ti gagné? Zot ti gagne la guerre ki ti ena apré ek zot ti retourne Jérusalem “dan la joie” ek zot ti vinn “dan lakaz Jéhovah, avek bann l’instrument la musik ki ena la corde, avek bann la harpe ek bann trompette.” (2 Chron. 20:27, 28) Nou aussi pareil, nou respecté direction ki Jéhovah donne nou par moyen ki Li’nn choisir ek coumsa nou loué Li.
Anou prend soin place kot nou faire reunion
13. Ki travail Hizqiya ti faire dan commencement so regne?
13 Dan premier mois so regne, Hizqiya ti montré so zele pou l’adoration Jéhovah kan li ti reouvert temple Jéhovah ek li ti commence repare li. Li ti faire bann pretre ek bann Lévite vini, pou nettoye lakaz Bondié. Zot ti faire sa dan 16 jour. (Lire 2 Chroniques 29:16-18.) Sa faire nou rappel l’importance l’entretien ek reparation ki nou faire dan bann place kot nou faire reunion pou garde zot dan enn bon condition ek sa reflete nou zele pou l’adoration Jéhovah. Eski jamais ou finn tann bann l’experience ki montré couma bann dimoune impressionné kan zot inn trouvé couma nou bann frere ek soeur participe dan sa travail-la avek zele? Oui, zot zeffort glorifié Jéhovah beaucoup.
14, 15. Ki travail zordi finn glorifié Jéhovah beaucoup? Donne bann l’exemple.
14 Dan enn la ville dan le nord l’Angleterre, enn missié pa ti’lé ki bann Témoins faire bann travail renovation lor zot la Salle du Royaume ki ti trouve a coté so terrain. Bann frere ti reagir avek bonté. Zot ti’nn remarké ki ti bizin faire bann reparation lor muraille ki separe la Salle avek terrain missié-la, alors zot ti propose pou faire travail-la gratuit. Zot ti travail dur ek en realité zot ti refaire muraille-la preské net. Seki zot ti faire, ti change l’attitude sa voisin-la. Asterla, li mem jette enn coup d’oeil lor la Salle du Royaume.
15 Bann adorateur Jéhovah participe dan enn travail construction ki faire dan le monde entier. Bann volontaire bien disposé, vinn donne enn coude main bann serviteur international a plein temps pa zis pou construire bann la Salle du Royaume mais aussi bann la Salle l’assemblée ek bann Béthel. Sam li enn ingenieur qualifié dan chauffage, ventilation, ek climatisation. Li ek so femme, Ruth, finn al dan beaucoup pays en Europe ek en Afrique pou aidé lor bann chantier construction. Partout kot zot allé, zot content aussi pou preche avek congregation dan sa l’endroit-la. Sam expliké ki kitsoz finn pousse-li pou participe dan bann construction international: “C’est grace a l’encouragement bann ki servi dan Béthel ici dan mo pays ek dan lezot pays. Kan mo ti trouve zot zele ek zot la joie, sa-mem ti assez pou pousse moi pou envie faire sa travail-la.”
Obeir bann instruction Bondié
16, 17. Dan ki l’activité special peuple Bondié ti participe avek zele, ek ki resultat zot ti gagné?
16 A part travail ki li ti faire pou repare temple, Hizqiya ti retabli fête Pâque ki ti bizin faire chaque l’année, couma Jéhovah ti donne l’ordre. (Lire 2 Chroniques 30:1, 4, 5.) Hizqiya ek bann habitant Jérusalem ti invite tou le peuple—mem bann ki ti reste dan royaume le nord—pou vinn assisté sa fête-la. Bann messager ti galopé partout dan pays pou donne bann lettre l’invitation.—2 Chron. 30:6-9.
17 Dan bann l’année ki’nn fek passé, nou aussi nou finn faire bann zeffort apepré pareil. Nou finn servi bann l’invitation bien attirant pou invite bann dimoune dan nou territoire pou rassemblé avek nou pou celebré Mémorial la mort Jésus pou obeir l’ordre ki Jésus ti donné. (Luc 22:19, 20) Nou ti gagne bann l’instruction dan nou bann reunion service, ek nou ti participe dan sa l’activité-la avek zele. Ek Jéhovah inn vrai-mem beni nou bann zeffort! Oui, l’année derniere, apepré sept million proclamateur finn distribué bann l’invitation, ek en tou 17,790,631 dimoune ti vinn assisté Mémorial!
18. Kifer eski li bien important ki nou zelé pou vrai l’adoration?
18 La Bible ti dire lor Hizqiya: “Li ti mette so confiance en Jéhovah, Bondié Israël; apré li, pa ti ena personne couma li parmi tou bann le roi dan Juda, pa mem parmi bann ki ti avant li. Ek li ti reste attaché ar Jéhovah. Li pa ti tourne lé-dos ek arrete suive Jéhovah, mais li ti contigne garde bann commandement ki Jéhovah ti donne Moïse.” (2 Rois 18:5, 6) Anou suive so l’exemple. Nou zele pou vrai l’adoration pou aide nou pou “reste attaché ar Jéhovah” avek l’espoir pou gagne la vie eternel dan l’avenir.—Deut. 30:16.
Pa tardé pou agir kan nou gagne bann instruction
19. Couma nou kapav prepare-nou avek zele pou Mémorial?
19 Kan Yoshiya ti le roi, li aussi li ti faire bann l’arrangement pou celebré Pâque. Li ti faire bann grand preparation pou sa. (2 Rois 23:21-23; 2 Chron. 35:1-19) Nou aussi nou prepare-nou bien pou bann l’assemblée district, circonscription, l’assemblée special enn jour ek Mémorial. Dan certain pays, bann frere riské mem zot la vie pou zot kapav celebré Mémorial ensam avek bann lezot chretien. Bann ancien ki bien zelé faire sur pou pa blié personne dan congregation. Bann chretien agé ek bann ki handicapé gagne l’aide pou zot kapav assisté Mémorial.
20. (a) Ki ti arrivé pendant regne le roi Yoshiya, ek couma li ti reagir? (b) Lor ki kitsoz nou envie bien reflechi?
20 Pendant travail renovation ki le roi Yoshiya ti organisé, Grand Pretre Hilqia “ti trouve livre la loi Jéhovah ki’nn donné par la main Moïse.” Li ti donne sa Shaphân, secretaire le roi, ki ti commence lire seki ti ena ladan, ar Yoshiya. (Lire 2 Chroniques 34:14-18.) Ki l’effet sa ti ena lor le roi? Desuite, li ti dechire so linge tellement li ti chagrin ek li ti donne l’ordre bann zom pou al rod direction Jéhovah. Par l’intermediaire prophetesse Houlda, Bondié ti condamne certain pratik ki bann habitant Juda ti pé faire dan zot l’adoration. Mais, Jéhovah ti remark bann bon zeffort ki Yoshiya ti faire pou tire l’idolatrie dan so pays, ek Yoshiya ti contigne garde faveur Jéhovah malgré bann malheur ki ti annoncé pou vinn lor le peuple entier. (2 Chron. 34:19-28) Ki sa montré nou? Surement ki nou ena mem desir ki Yoshiya ti ena. Nou envie obeir desuite bann instruction ki Jéhovah donné, ek reflechi bien seki kapav arrivé si nou laisse l’apostasie ek enn conduite infidele prend place nou l’adoration pou Jéhovah. Nou kapav sur ki Jéhovah pou remark ek approuve nou zele pou vrai l’adoration, pareil couma Li ti faire dan cas Yoshiya.
21, 22. (a) Kifer nou bizin montré zele pou lakaz Jéhovah? (b) Ki nou pou examiné dan prochain lartik?
21 Sa quatre le roi Juda-la—Asa, Yehoshaphat, Hizqiya, ek Yoshiya—inn donne nou enn bon l’exemple en rapport avek zele ki nou bizin ena pou lakaz Bondié ek pou so l’adoration. Nou zele bizin aussi pousse nou pou ena confiance en Jéhovah ek pou bien actif dan nou l’adoration pou Li. Nou montré la sagesse ek nou heureux kan nou obeir bann instruction ki Bondié donne nou ek kan nou reagir bien ar conseil ek discipline ki nou gagné dan congregation ek par bann ancien.
22 Prochain lartik pou attire nou l’attention lor zele ki nou bizin ena pou predication ek pou encourage bann jeune pou servi nou bon Papa, avek zele. Nou pou examine aussi couma nou kapav evite enn parmi bann pli mauvais l’influence ki Satan servi pou gate nou spiritualité. A mesure ki nou suive avek zele tou sa bann rappel ki Jéhovah donne nou-la, nou pou montré ki nou pé suive l’exemple Jésus, Garson Jéhovah. La Bible dire lor li: “Zele pou to lakaz finn devore moi.”—Ps. 69:9; 119:111, 129; 1 Pierre 2:21.
Eski ou rappel?
• Ki qualité service Jéhovah beni, ek kifer?
• Couma nou kapav montré ki nou ena confiance en Jéhovah?
• Couma nou zele kapav pousse nou pou obeir bann instruction ki Bondié donné?
[Zimage lor page 15]
Couma Asa, Yehoshaphat, Hizqiya, ek Yoshiya ti montré zele pou lakaz Jéhovah?