Kifer la Bible li pratik pou nou azordi

“Tou bann l’Ecriture finn inspiré par Bondié ek li utile pou . . . formé pou ena enn bon fason vive.”—2 TIMOTHÉE 3:16, Bible en français courant.

TOUTE longue bann siecle, la Bible inn pousse bann dimoune dan beaucoup culture pou ameliore zot fason vive. Verset ki finn cité dan commencement sa lartik-la montré kifer la Bible li efficace coumsa—so sagesse sorti kot Bondié. Mem si la Bible finn ecrire par bann zom, li faire nou konn bann pensé Bondié. La Bible expliké: “Grace a l’esprit saint ki’nn pousse zot, ki bann dimoune inn dire seki Bondié ti ena pou dire.”—2 Pierre 1:21.

La Bible li enn guide pratik dan au moins deux domaine. Premierement, li montré dan enn fason realiste ki sa vedir ena enn pli bon fason vive. Deuxiemement, li ena pouvoir pou motive bann dimoune pou zot faire bann changement ki bizin pou kapav ena sa pli bon fason vive-la. Anou examine sa deux domaine-la.

Comprend bann l’objectif ki pratik

Dan la Bible, Bondié faire sa promesse-la: “Mo pou donne toi capacité pou comprend ek mo pou montré toi dan ki chemin to bizin marché. Mo pou donne toi conseil pendant ki mo garde enn lizié lor toi.” (Psaume 32:8) Remarké ki Bondié pa donne zis bann conseil mais aussi capacité pou comprend, setadir capacité pou comprend enn situation en profondeur. Kan nou reussi comprend ki bann l’objectif ki vrai-mem utile, sa kapav aide nou pou pa gaspille nou le temps galope derriere bann kitsoz ki pena valeur.

Par exemple, beaucoup dimoune ena l’objectif pou gagne enn grand position ou-soit pou vinn riche. Ena beaucoup livre ki montré bann dimoune couma zot kapav faire malin pou depasse lezot pou zot kapav gagne enn grand position ou-soit vinn riche. Mais la Bible li, li dire nou: “C’est zis enn competition entre zot . . . li vanité ek coumadir pé galope derriere di-vent.” “Sa kikenn ki content l’argent-la jamais li pa pou assez ar l’argent.” (Ecclésiaste 4:4; 5:10) Eski sa conseil pratik-la li concerne nou zordi?

Pou montré couma bann conseil la Bible zot pratik, anou guette l’exemple Akinori, ki reste Japon. Malgré enn grand competition, Akinori ti realise so l’objectif, li ti reussi gagne enn diplome dan enn grand l’université ek gagne travail dan enn compagnie ki ti pé gagne succès ek ki ti ena enn bon reputation. Tou kitsoz ti parette pé passe bien pou li. Mais, succès ki li ti’nn gagné pa ti faire li gagne la joie ki li ti pé attann. Au contraire, stress ek fatigue ti pé fini so la santé net. So bann camarade travail pa ti enn grand l’aide pou li. Parski li ti deprimé, li ti vinn enn alkolik ek li ti mem pense pou suicide-li. Apré sa li ti commence etudié la Bible avek bann Témoins de Jéhovah. Seki li ti aprann ti change so fason pensé concernant bann kitsoz ki important dan la vie. Bien vite, bann probleme ki li ti pé gagné a cause so stress ti commence disparette. Au lieu ki li ti laisse fierté ek l’ambition dirige li, Akinori li-mem finn kapav faire l’experience seki enn proverbe la Bible dire: “Enn leker ki en paix faire enn lekor vive.”—Proverbes 14:30, Traduction Œcuménique de la Bible.

Ki l’objectif ou pensé pou donne ou plus satisfaction dan la vie? Ki kitsoz si ou reussi accompli li, pou vrai-mem faire ou content? Enn mariage reussi? Ou-soit donne ou bann zenfant enn bon depart dan zot la vie? Faire beaucoup camarade? La joie pou vive? Tousala c’est bann l’objectif ki vaut la peine. En realité, la Bible encourage nou pou ena sa bann l’objectif-la, mais fodé pa ki zot vinn nou bann priorité dan la vie. Avek bon jugement, la Bible montré enn kitsoz important pou nou amenn enn la vie ki donne nou satisfaction, kan li dire: “Ena la crainte pou vrai Bondié ek garde so bann commandement. Parski c’est sa tou l’obligation ki enn dimoune ena.” (Ecclésiaste 12:13) Kan nou pa rempli sa l’obligation-la, nou la vie pena sens, nou agacé, ek nou pa satisfait. Parkont, la Bible donne nou sa l’assurance-la: “Enn kikenn ki mette so confiance en Jéhovah li heureux.”—Proverbes 16:20.

Couma la Bible pousse bann dimoune pou changé

Paul ti ecrire: “Parole Bondié, li vivant ek li puissant.” Pareil couma enn l’epée ki coupe deux coté, li kapav rente dan bann pensée ek bann l’intention pli profond ki enn dimoune ena. (Hébreux 4:12) La Bible ena pouvoir pou change fason ki bann dimoune vive parski li aide zot pou trouve-zot couma zot été vrai-mem ek pa couma zot pensé zot été. Lerla, bann ki ena enn bon condition leker, pou realisé ki kitfois zot bizin faire bann changement. Par exemple, concernant bann ki ti dan congregation chretien dan ancient Corinthe, ek ki avant ti bann voleur, bann soulard, bann ki ti commette l’adultere, ek ki ti faire encore lezot peché, Paul ti dire: “C’est coumsa ki certain parmi zot ti été. Mais zot finn purifié . . . avek l’esprit nou Bondié.” (1 Corinthiens 6:9-11) Pareil couma avant, zordi l’esprit saint Jéhovah li encore toujours actif ek puissant, ek li kapav pousse bann dimoune pou faire bann changement ki bizin.

Mario, ki vive en Europe, ti enn zom bien violent ki ti pé fume marijuana ek ti pé vann sa. Enn jour, kan enn la police ti confiské so la drogue, li ti tellement en colere ki li ti batte sa la police-la ek li ti crase so l’auto. En plus, Mario pa ti travail ek li ti ena beaucoup dette. Kan li ti realisé ki li pa pou kapav reglé so bann probleme par li-mem, li ti accepté pou ena enn l’etude la Bible. Alors, ki li ti pé faire bann progré, Mario ti ameliore so l’apparence, li ti arrete prend ek vann la drogue, ek li ti nepli enn dimoune violent. Beaucoup ki ti koné couma li ti été avant, ti etonné. Zot ti arrete li ek ti demann li: “Mario, to-mem sa?”

Ki kitsoz ki pousse bann dimoune couma Akinori ek Mario pou faire bann changement dan zot la vie ek trouve vrai satisfaction ek la joie pou vive? Li clair, ki c’est grace a nouveau connaissance ki zot inn gagné lor Bondié a travers enn l’etude la Bible. Zis Bondié ki kapav donne bann conseil pratik ki nou bizin pou ki nou reussi dan la vie asterla ek pou ki nou ena l’esperance pou vive pou touletan dan l’avenir. Pareil couma enn Papa, Jéhovah dire nou a travers la Bible: “Ecouté, mo garson, ek accepté mo bann parole. Lerla bann l’année ki to vive pou vinn beaucoup. . . . Kan to marché, to bann pas pa pou serre-serré; ek si to galopé, to pa pou cogné. Trap la discipline; pa largue li. Preserve li, parski sa-mem to la vie.” (Proverbes 4:10-13) Pena conseil ki pli pratik pou rod direction nou Createur, pa vrai?

[L’encadré lor page 7]

Bann conseil pratik pou nou lepok

Dan la Bible ena bann principe de base mais ki ena enn grand valeur ki kapav guide nou dan chaque domaine nou la vie zordi. Anou guette deux-trois l’exemple:

• Ena enn bon relation avek lezot

“Alors, tou kitsoz ki zot envie bann dimoune faire pou zot, zot aussi, zot bizin faire pareil pou bannla.”—Matthieu 7:12.

“Seki agir couma enn kikenn ki pli tipti parmi zot tou, li-mem ki grand.”—Luc 9:48.

“Contigne montré l’hospitalité.” —Romains 12:13.

• Surmonte bann l’habitude ki kapav faire nou di-tort

“Enn kikenn ki marche avek bann dimoune ki ena la sagesse pou gagne la sagesse, mais enn kikenn ki gagne zaffaire avek bann dimoune bete, sa pou fini mal pou li.” —Proverbes 13:20.

“Pa retrouve-toi parmi bann grand buveur di-vin.”—Proverbes 23:20.

“Pa rente camarade avek enn kikenn ki ena tendance pou en colere.”—Proverbes 22:24.

• Construire enn mariage ki stable

“Ki sakenn parmi zot content so madame pareil couma li content li-mem; enn femme li, li bizin ena enn profond respé pou so mari.”—Éphésiens 5:33.

“Habille zot ar enn grand compassion, bonté, l’humilité, douceur, ek patience. Contigne supporte sakenn so camarade, ek si kikenn ena enn kitsoz kont enn lot, li bizin pardonne li avek tou so leker.”—Colossiens 3:12, 13.

• L’education bann zenfant

“Instruire enn garson dan chemin ki bon pou li; mem kan li vinn vié, li pa pou vire lé-dos ar sa.”—Proverbes 22:6.

“Zot, bann papa, pa enerve zot zenfant, mais contigne elevé zot dan discipline ek dan bann l’avertissement Jéhovah.”—Éphésiens 6:4.

• Evite bann laguerre

“Enn reponse, kan li douce, li faire la colere disparette, mais enn parole blessant faire la colere monté.”—Proverbes 15:1.

“Zot bizin toujours premier pou honore sakenn so camarade.”—Romains 12:10.

Mem parmi bann camarade, souvent kapav evite desaccord dan bann zaffaire commercial kan faire bann contrat lor papier. Jérémie enn serviteur Bondié ti ecrire: “Mo ti ecrire lor enn contrat, mo ti scelle li ek mo ti prend bann temoin kan mo ti pé pese l’argent dan balance.”—Jérémie 32:10.

• Developpe enn l’attitude positif

“Tou kitsoz ki vrai, . . . ki merité ki nou content zot, . . . ki dimoune koz en bien, tou kitsoz ki bon lor plan moral ek ki merite gagne l’honneur, contigne prend bien compte sa bann kitsoz-la.”—Philippiens 4:8.

La Bible decourage nou pou pense lor bann kitsoz ki negatif ek li condamne “bann . . . ki plaigne zot sort dan la vie.” Li dire: “Trouve la joie dan l’esperance.”—Jude 4, 16; Romains 12:12.

Kan nou applik sa bann bon principe-la, nou pou kapav vive en paix ek ena contentement asterla mais sa pou aide nou aussi pou vive en accord avek bann principe Bondié ek pou gagne so benediction. La Bible dire: “Bann dimoune juste pou possede la terre, ek zot pou reste lor la pou touletan.”—Psaume 37:29.

[Zimage lor page 5]

Akinori kan li ti enn businessman (a gauche) ek zordi avek so madame, pé partage bann verité ki ena dan la Bible avek la joie