Cooperé pou aide ou famille faire progré lor plan spirituel

ENN l’esprit cooperation bien important pou bann ki envie aide zot famille pou progressé lor plan spirituel. Kan Jéhovah ti crée premier couple, Li ti montré l’importance pou ena cooperation. Ève ti bizin travail ensam avek Adam couma “enn kikenn ki al bien ar li.” (Gen. 2:18) Mariage bizin enn travail l’equipe, kot mari ek femme sakenn aide so camarade. (Eccl. 4:9-12) Pou ki bann parent ek bann zenfant rempli role ki Jéhovah donne zot, sa aussi demann cooperation.

Adore Bondié en famille

Barry ek Heidi ena cinq zenfant. Zot remarké ki kan zot cooperé pou ena enn l’etude la Bible regulier en famille, sa aide zot pou faire progré. Barry expliké: “De temps en temps, pou l’etude familial, mo donne bann zenfant bann ti devoir. Mo kapav demann zot pou prepare deux-trois commentaire basé lor bann lartik dan Réveillez-vous ! Nou aussi faire bann repetition lor seki nou pou dire dan predication, pou ki chaque zenfant bien preparé pou faire enn presentation.” Heidi ajouté: “Nou tou nou ena enn la liste bann l’objectif spirituel ki nou envie realisé, ek souvent dan nou l’etude familial nou reguette sa la liste-la pou koné ki bann progré nou pé faire.” Sa couple-la finn aussi remarké ki kan zot passe regulierement certain soirée sans guette television, sa donne zot tou dan la famille l’occasion pou faire zot lecture dan trankilité.

Bann reunion congregation

Mike ek Denise ti elevé quatre zenfant. Couma zot famille inn tire profit kan zot finn cooperé? Mike dire: “Parfois, mem si nou ti faire beaucoup zeffort, nou pa ti reussi arrive reunion a ler, mais nou finn trouvé ki kan nou cooperé, sa permette nou arrive reunion dan ler ki bizin.” Denise expliké: “Kan bann zenfant ti pé grandi, sakenn ti ena l’ouvrage pou faire dan lakaz. Nou tifi, Kim, ti aidé pou cuit mangé ek pou prepare la table.” Zot garson Michael rappel: “Dan mardi soir nou ti ena enn reunion congregation dan nou lakaz. Alors nou ti nettoye la chambre-la, nou ti passe aspirateur, ek nou ti installe bann chaise.” Matthew, enn lot garson dire: “Bann jour reunion, papa ti faire sur ki li rente lakaz boner pou aide nou prepare-nou pou al reunion.” Ki bann resultat zot finn gagné?

Bann zeffort ki vaut la peine

Mike raconté: “En 1987, Denise ek moi ti commence servi couma bann predicateur a plein temps. Sa lepok-la, trois parmi nou bann zenfant ti encore pé reste avek nou. Deux parmi zot ti aussi vinn bann predicateur a plein temps, ek deux lezot-la ti travail lor construction bann Béthel. Enn lot la joie ki nou famille inn gagné c’est ki nou finn kapav aide 40 dimoune pou voué zot la vie ar Jéhovah ek faire-zot baptisé. En tant ki famille, nou ti aussi ena privilege pou travail lor bann projet construction, mem dan bann lezot pays.

Vrai-mem, sa vaut la peine cooperé en tant ki famille. Eski ou kapav trouve lezot fason couma ou kapav cooperé avek bann membre ou famille? Ou kapav sur ki kan ena cooperation dan la famille, sa pou aide zot tou pou faire plus progré lor plan spirituel.

[Zimage lor page 29]

Kan nou faire bann repetition, sa encourage bann progré dan predication