Accepté avek reconnaissance—Donné avek tou ou leker

JÉHOVAH, nou bon Papa ki dan le ciel, interesse-Li personnellement ar nou. Parole Bondié donne nou l’assurance ki Jéhovah bien interessé ar tou so bann serviteur. (1 Pierre 5:7) Enn fason ki Jéhovah montré sa, c’est kan Li aide nou dan plusieurs fason pou servi Li avek fidelité. (Is. 48:17) Jéhovah envie ki nou accepté l’aide ki Li donne nou, surtout kan nou pé faire face ar bann probleme ki pé faire nou souffert. La Loi mosaïk montré nou sa.

Dan sa la Loi-la, avek amour Jéhovah ti prevoir ki bann dimoune ki “souffert,” couma par exemple bann orphelin, bann veuve, ek bann etranger gagne enn l’aide. (Lév. 19:9, 10; Deut. 14:29) Li koné ki certain parmi so bann serviteur kapav bizin l’aide zot bann compagnon chretien. (Jacq. 1:27) Jéhovah pousse zot pou aide sakenn so camarade, alors fodé pa ki nou hesité pou accepté l’aide nou bann compagnon. Mais kan-mem, kan nou pé accepté zot l’aide, nou bizin ena enn bon l’attitude.

En mem temps, la Bible montré ki bann serviteur Bondié ena aussi l’occasion pou donné. Rappel l’exemple sa “veuve ki ti misere” ki Jésus ti observé dan temple Jérusalem-la. (Luc 21:1-4) Surement li ti profite bann disposition ki mentionné dan la Loi, ki Jéhovah ti prend avek amour pou bann veuve. Mais mem sa, malgré ki li ti misere, nou pa rappel sa veuve-la couma enn dimoune ki ti pé gagné, mais couma enn kikenn ki ti pé donné. L’habitude ki li ti ena pou donné surement ti faire li gagne la joie, parski couma Jésus ti dire, “ena plus bonheur kan donné ki kan recevoir.” (Actes 20:35) Pense sa principe-la ek demann ou-mem couma ou kapav “prend l’habitude donné” ek lerla gagne la joie?—Luc 6:38.

“Ki mo pou rann Jéhovah?”

Enn psalmiste ti demann li-mem: “Ki mo pou rann Jéhovah pou tou so bann benediction envers moi?” (Ps. 116:12) Ki bann benediction li ti gagné? Jéhovah ti soutenir li kan li ti pé passe par enn moment “detresse ek chagrin.” En plus, Jéhovah ti “sap [so] nâme dan la mort.” Asterla, li ti envie “rann” sa Jéhovah dan enn certaine fason. Ki sa psalmiste-la ti kapav faire? Li ti dire: “Mo pou respecté mo bann voeu envers Jéhovah.” (Ps. 116:3, 4, 8, 10-14) Li ti bien decidé pou respecté bann promesse ki li ti faire Jéhovah ek rempli tou bann responsabilité ki li ti ena envers Li.

Ou kapav faire pareil. Couma? Kan ou ena enn fason vive ki touletan en accord avek bann la loi ek bann principe Bondié. Alors, assure-ou ki ou l’adoration pou Jéhovah reste touletan kitsoz ki pli important dan ou la vie ek ou laisse l’esprit Bondié guide ou dan tou seki ou faire. (Eccl. 12:13; Gal. 5:16-18) Avredir, jamais ou pa pou kapav rann Jéhovah tou seki Li’nn faire pou ou. Kan-mem, sa faire ‘leker Jéhovah content’ kan Li trouve ou pé servi Li avek tou ou leker dan so service. (Prov. 27:11) Li vrai-mem enn grand privilege pou faire Jéhovah plaisir dan sa fason-la!

Faire ou part pou bien-etre congregation

Pena doute ki ou pou d’accord ki ou finn gagne beaucoup bienfait ar congregation chretien dan different fason. A travers la congregation, Jéhovah finn donne nourriture spirituel en abondance. Ou finn gagne la verité ki finn libere-ou ar bann fausseté ki bann fausse religion enseigné, ek ki finn tire ou dan noirté spirituel. (Jean 8:32) Dan bann reunion ek bann l’assemblée ki “l’esclave fidele ek avisé” organisé, ou gagne enn connaissance ki kapav faire ou gagne la vie pou touletan dan paradis lor la terre kot pa pou ena douleur ek souffrance. (Mat. 24:45-47) Eski ou kapav fini compte tou bann benediction ki ou finn gagné—ek ki ou pou gagné encore—a travers congregation Bondié? Ki ou kapav donne la congregation en retour?

L’apotre Paul ti ecrire: “Lekor-la net, d’accord ek uni ensam ek cooperé grace a tou bann joint ki donne seki bizin, dapré fonctionnement chaque membre, dan quantité ki bizin, ki permette lekor-la grandi pou ki li fortifié li-mem dan l’amour.” (Éph. 4:15, 16) Mem si sa bann verset-la applik avant tou ar bann chretien oint, principe ki ena ladan kapav applik ar tou bann chretien zordi. Oui, chaque membre dan congregation kapav contribué pou bien-etre ek l’accroissement congregation. Couma?

Nou kapav faire sa kan touletan nou faire zeffort pou encourage ek pou fortifié lezot dan zot service pou Bondié. (Rom. 14:19) Nou kapav aussi faire nou part pou ki “lekor-la grandi” kan nou manifesté fruit l’esprit saint Bondié dan nou relation avek nou bann compagnon chretien. (Gal. 5:22, 23) En plus, nou kapav rod bann l’occasion pou “faire di-bien envers tou dimoune, mais surtout envers nou bann frere dan la foi.” (Gal. 6:10; Héb. 13:16) Tou dimoune dan congregation—frere ek soeur, jeune ek vié—kapav travail pou ‘fortifié lekor-la dan l’amour.’

En plus, nou kapav servi nou talent, nou la force, ek nou bann di-bien materiel pou participe dan predication ki congregation organisé. Jésus ti dire: “Zot finn gagne gratis.” Couma nou bizin reagir? Jésus ti dire “donne gratis.” (Mat. 10:8) Alors, participe autant ki ou kapav dan travail pli important ki ena, setadir preche Royaume Bondié ek faire bann disciple. (Mat. 24:14; 28:19, 20) Eski ou capacité pou faire sa li limité? Rappel l’exemple sa veuve misere ki Jésus ti decrire-la. Seki li ti donné ti bien tigit. Pourtant, Jésus ti dire ki li ti donne plus ki lezot. Li ti donne tou seki so situation ti permette li pou donné.—2 Cor. 8:1-5, 12.

Anou ena enn bon l’attitude pou l’aide ki nou gagné

Mais selman, kapav ena bann moment kot ou bizin gagne l’aide congregation. Jamais pa hesité pou accepté n’importe ki l’aide ki la congregation donne ou pou faire face ar bann pression ki ena dan sa systeme-la. Jéhovah finn donne bann zom qualifié ek ki manifesté la bonté pou “prend soin congregation”—pou aide ou kan ou faire face avek bann l’epreuve ek bann tribulation. (Actes 20:28) Bann ancien ek lezot dan congregation envie console ou, soutenir ou, ek protege ou kan ou pé passe par bann difficulté.—Gal. 6:2; 1 Thess. 5:14.

Mais, kan ou gagne l’aide ki ou bizin, faire sur, ki ou accepté sa avek enn bon l’attitude. Toujours accepté avek reconnaissance l’aide ki ou gagné. Considere l’aide ki ou bann compagnon chretien donne ou couma enn preuve ki Bondié pé donne ou so faveur ki personne pa merité. (1 Pierre 4:10) Kifer eski sa li important? Parski nou pa’lé ena mem l’attitude ki beaucoup dimoune dan le monde—zot pena okenn reconnaissance kan zot gagne l’aide.

Ou bizin equilibré ek raisonnable

Dan lettre ki li ti envoye congregation Philippes, Paul ti ecrire concernant Timothée: “A part li, mo pena personne ki ena enn l’attitude couma li, li ena, ek ki vrai-mem prend compte bann kitsoz ki concerne zot.” Mais, apré Paul ti ajouté: “Tou bann lezot pé rod zot prop l’interet, mais pa l’interet Christ Jésus.” (Phil. 2:20, 21) Sa faire nou reflechi! Couma eski zordi nou kapav evite trop tracassé pou nou “prop l’interet”?

Fodé jamais ki nou exigeant ar lezot dan congregation kan zot donne nou zot le temps ek zot l’attention pou aide nou faire face ar nou bann probleme. Kifer? Anou reflechi: Pena doute, ki nou pou bien reconnaissant si enn frere aide nou lor plan materiel pou faire face ar enn probleme urgent. Mais eski nou pou oblige li donne nou sa l’aide materiel-la? Pa ditou. Li pareil aussi concernant le temps ki zot passé pou aide nou. Alors ki nou bann frere zot toujours content pou aide nou, nou bizin montré-nou equilibré ek raisonnable lor quantité le temps ki zot kapav donne nou. Apré tou, n’importe ki kitsoz nou bann compagnon chretien faire pou aide nou pou faire face ar nou bann difficulté, nou envie ki zot faire sa volontairement.

Ou kapav sur ki ou bann frere ek soeur pou toujours pré pou aide ou. Mais, li kapav arrivé ki parfois zot pa kapav donne ou l’aide ki ou bizin. Si sa arrivé, ou kapav sur ki, pareil couma Li ti faire pou sa psalmiste-la, Jéhovah pou soutenir ou dan n’importe ki l’epreuve ou pé kapav gagné.—Ps. 116:1, 2; Phil. 4:10-13.

Alors, pa bizin hesité pou accepté avek reconnaissance bann disposition ki Jéhovah prend pou ou—surtout dan bann moment kot ou pé souffert ek pé tracassé. (Ps. 55:22) Li envie ki ou accepté sa. Mais Li envie aussi ki ou, ou “donne avek la joie.” Alors, faire couma ou “finn decidé dan [ou] leker” pou faire tou seki ou kapav pou soutenir vrai l’adoration. (2 Cor. 9:6, 7) Coumsa, ou pou kapav faire toulé-deux—accepté avek reconnaissance ek donne avek tou ou leker.

[L’encadré page 32]

“Ki mo pou rann Jéhovah pou tou so benediction envers moi?”—Ps. 116:12

▪ Trouve bann l’occasion pou “faire di-bien envers tou dimoune”

▪ Encourage ek fortifié lezot dan zot service pou Bondié

▪ Participe autant ki ou kapav dapré ou situation, dan l’activité pou faire bann disciple