Mythe 3: Bann ki bon al dan le ciel

Ki l’origine sa mythe-la?

Apré la mort bann zapotre Jésus, au commencement deuxieme siecle nou lepok, bann premier Père de l’Église ti commence gagne enn certaine l’autorité. New Catholic Encyclopedia (2003), volume 6, page 687, dire ki ‘zot l’enseignement ti mette l’accent lor l’idée ki apré la mort enn dimoune, ek desuite apré so purification, so nâme ti gagne privilege pou al dan le ciel.’

Ki la Bible dire?

“Heureux bann dimoune ki ena enn caractere doux, parski zot pou herite la terre.”—Matthieu 5:5.

Mem si Jésus ti promette so bann disciple ki li ti pou “prepare enn place” pou zot dan le ciel, li ti montré ki pa tou bann dimoune juste ki al dan le ciel. (Jean 3:13; 14:2, 3) Eski li pa ti prié pou ki volonté Bondié faire “lor la terre pareil couma dan le ciel”? (Matthieu 6:9, 10) En realité, bann juste pou gagne enn entre sa deux possibilité-la. Enn tigit pou regne avek Jésus dan le ciel, mais la plupart pou vive pou touletan lor la terre.—Révélation 5:10.

Avek le temps, l’Eglise ki ti formé au commencement ti change so l’opinion concernant role ki li ena lor la terre. Ki resultat sa finn ena? Dapré The New Encyclopædia Britannica, “pli allé l’Eglise ki finn bien etabli finn prend place Royaume Bondié.” L’Eglise finn augmente so pouvoir ek inn vinn pli solide. Pou faire sa, li’nn prend part dan politik ek li’nn ignore commandement Jésus ki ti dire ki so bann disciple pa ti pou “faire partie dan le monde.” (Jean 15:19; 17:14-16; 18:36) Avek l’influence l’empereur romain Constantin, l’Eglise ti faire compromis avek certain so bann croyance, ek enn sa bann croyance-la ti concerne couma Bondié été.

Examine sa bann verset la Bible-la: Psaume 37:10, 11, 29; Jean 17:3; 2 Timothée 2:11, 12