Mythe 4: Bondié Li enn trinité

Ki l’origine sa mythe-la?

“Nou kapav ena l’impression ki finalement doctrine lor la Trinité finn inventé vers la fin 4^eme siecle. Dan enn certain sens, sa li vrai . . . Sa l’expression ‘enn Bondié en trois personne-la’ pa ti bien etabli, ni li ti completement accepté dan la vie bann chretien ek dan zot croyance avant la fin 4^eme siecle.”—New Catholic Encyclopedia (1967), volume 14, page 299.

“Le 20 mai, 325 nou lepok, bann l’eveque ek bann specialiste lor la religion ti rassemblé dan Nicée. Constantin li-mem ki ti a la tête sa reunion-la, ti dirige bann discussion ek c’est li ki ti propose . . . doctrine lor relation ki Christ ti ena par rapport ar Bondié, ‘ki li enn sel avek le Père,’ dan enn decret ki sa l’assemblée-la ti mette en place. . . . Tou bann l’eveque, excepté deux, finn signe sa decret-la par respé pou l’empereur mem si sa ti al kont zot croyance.”—Encyclopædia Britannica (1970), volume 6, page 386.

Ki la Bible dire?

“Rempli ar l’Esprit Saint, [Étienne] ti fixé so lizié vers le ciel; lerla li ti trouve la gloire Bondié, ek Jésus ki ti pé deboute dan coté droite Bondié. Li ti dire: ‘Ah! mo pé trouve le ciel ouvert ek Fils de l’homme pé deboute dan coté droite Bondié.’ ”—Actes 7:55, 56, Bible de Jérusalem.

Ki sa vision-la montré? Rempli avek la force actif Bondié, Étienne ti trouve Jésus “pé deboute dan coté droite Bondié.” Alors li clair ki apré so resurrection pou al dan le ciel, Jésus pa ti révinn Bondié mais, plutot, enn lot creature spirituel ki separé avek Bondié. En plus, sa recit-la pa faire mention enn troisieme personne a coté Bondié. Malgré tou bann zeffort ki li’nn faire pou trouve bann verset dan l’Ecriture pou soutenir doctrine lor Trinité, enn pretre dominicain, Marie-Émile Boismard ti ecrire dan so livre À l’aube du christianisme — La naissance des dogmes: “Okenn part dan Nouveau Testament . . . nou pa trouve declaration ki dire ki ena trois personne dan enn sel Bondié.”

Alors li clair ki Constantin ti encourage doctrine lor la Trinité dan but pou arrete bann desaccord ki ti ena dan l’eglise dan 4^eme siecle. Mais selman, sa ti souleve enn lot question: Eski Marie, sa femme ki ti donne naissance Jésus-la, li “Mama Bondié”?

Examine sa bann verset la Bible-la: Matthieu 26:39; Jean 14:28; 1 Corinthiens 15:27, 28; Colossiens 1:15, 16