La priere

ESKI kan nou prié sa faire nou di-bien? La Bible montré ki oui. La priere bann fidele serviteur Bondié vrai-mem faire zot di-bien. (Luc 22:40; Jacques 5:13) En realité, la priere kapav faire nou beaucoup di-bien lor plan spirituel, affectif, ek mem physik. Dan ki fason?

Anou prend enn l’exemple. Supposé ou zenfant finn gagne enn cadeau. Eski ou pou enseigne li ki sa assez ki li zis ressenti reconnaissance? Ou-soit ou pou enseigne li pou exprime so reconnaissance? Kan nou exprime nou bann sentiment profond par bann parole, nou comprend sa bann sentiment-la pli bien ek nou mem donne zot plus poids. Eski li pareil kan nou koz avek Bondié? Oui! Anou guette deux-trois l’exemple.

Bann remerciement. Kan nou remercié nou Papa pou bann bon kitsoz ki arrive nou, nou fixé nou l’esprit lor nou bann benediction. Ek sa kapav pousse nou pou ressenti plus reconnaissance, plus la joie ek vinn pli positif.—Philippiens 4:6.

Exemple: Jésus ti exprime so reconnaissance pou fason ki so Papa ti ecoute so la priere ek ti reponn li.—Jean 11:41.

Demann pardon. Kan nou demann Bondié pou pardonne nou, nou fortifié nou conscience, nou repentance vinn pli profond, ek nou prend plus conscience ki peché li enn kitsoz bien grave. Nou aussi senti-nou soulagé ek nou nepli ena sentiment ki nou coupable.

Exemple: David ti prié pou exprime so repentance ek so chagrin.—Psaume 51.

Rod direction ek sagesse. Kan nou demann Jéhovah pou guide nou ou-soit donne nou sagesse ki nou bizin pou prend bann bon decision, sa kapav aide nou pou vinn enn dimoune ki vrai-mem humble. Sa kapav rappel nou, nou bann limite ek aide nou pou augmente nou confiance dan nou Papa ki dan le ciel.—Proverbes 3:5, 6.

Exemple: Avek l’humilité, Salomon ti rod direction ek sagesse pou dirige lor nation Israël.—1 Rois 3:5-12.

Kan nou dan tracas. Si nou dire Bondié tou seki ena dan nou leker kan enn kitsoz pé bouleverse nou, nou pou soulagé ek nou pou compte lor Jéhovah au lieu lor nou-mem.—Psaume 62:8.

Exemple: Le roi Asa ti prié kan li ti faire face ar enn l’ennemi dangereux.—2 Chroniques 14:11.

Pou bann ki dan difficulté. Sa bann qualité la priere-la aide nou pou lutte kont bann sentiment egoïste. Zot aide nou aussi pou vinn enn dimoune ki ena plus compassion ek ki pli comprend sentiment lezot.

Exemple: Jésus ti prié en faveur so bann disciple.—Jean 17:9-17.

Pou loué Bondié. Kan nou loué Jéhovah pou so bann travail extraordinaire ek so bann qualité, sa augmente nou respé ek nou l’appreciation pou Li. Sa bann qualité la priere-la kapav aussi aide nou pou vinn pli proche ar nou Bondié ek nou Papa.

Exemple: Avek beaucoup sentiment, David ti loué Bondié pou so creation.—Psaume 8.

Enn lot benediction ki nou gagné kan nou prié c’est “la paix Bondié ki depasse tou pensée.” (Philippiens 4:7) Oui, dan sa le monde troublé-la, ressenti la paix dan nou leker li vrai-mem enn benediction bien rare. Sa kapav mem faire nou gagne bann bienfait lor plan physik. (Proverbes 14:30) Mais eski nou gagne sa zis par nou prop zeffort? Ou-soit ena lezot kitsoz pli important ki impliké?

[L’encadré page 10]

La priere amenn beaucoup bienfait—lor plan physik, affectif ek, surtout, lor plan spirituel