Kifer beaucoup mariage cassé?

“Certain Pharisien ti vinn vers [Jésus] avek l’intention pou piege li ek zot ti dire: ‘Eski enn missié gagne droit divorce avek so madame pou n’importe ki raison?’”​—Matthieu 19:3.

CERTAIN dimoune ki ti vive dan lepok Jésus ti envie koné si li possible ki bann mariage duré ou-soit si bann mariage bizin duré. Jésus ti dire zot: “Eski zot pa finn lire ki celui ki ti crée zot, depuis commencement, ti faire zot enn zom ek enn femme, ek Li ti dire: ‘A cause sa-mem enn missié pou quitte so papa ek so mama ek li pou attache-li avek so madame, ek toulé-deux pou vinn enn sel la chair’? Oui, zot nepli deux, mais enn sel la chair. Alors, seki Bondié finn mette enba enn sel joug, fodé ki personne pa separe sa.”a (Matthieu 19:4-6) Li clair ki li ti dan projet Bondié ki bann mariage duré.

Azordi, dan beaucoup pays, environ 40 pour cent bann mariage ou-soit plus pé cassé, ek fini par enn divorce. Eski bann conseil ki ena dan la Bible lor mariage inn demodé? Eski li possible ki bann mariage pa pé reussi parski ena enn defaut dan sa disposition ki Bondié finn mette en place-la?

Anou guette enn l’exemple: deux couple acheté mem modele l’auto. Enn couple ladan occupe bien zot l’auto ek conduire li avek precaution. Zot l’auto pa tombe en panne. Sa lot couple-la zot, zot pa prend le temps ni donne la peine pou occupe zot l’auto, ek zot roule brite. Sa l’auto-la tombe en panne ek zot abandonne li. Si sa deuxieme l’auto-la finn vinn dan sa l’etat-la, kisannla ki en tort​—l’auto-la ou-soit bann proprietaire-la? Pena doute, c’est sa bann proprietaire-la ki ena enn grand part responsabilité.

Pareil, si ena beaucoup mariage pé cassé, eski sa vedir ki c’est mariage, sa disposition ki Bondié inn mette en place-la ki ena enn defaut? Nou pa kapav dire sa, parski ena plusieurs million mariage pé reussi. Sa bann mariage-la amenn bonheur ek stabilité lor plan personnel, dan la famille, ek dan la societé. Mais pareil couma pou enn l’auto, nou bizin prend mariage aussi bien soin ek nou bizin occupe li souvent pou ki li duré.

Ki ou fek marié ou-soit ki ou’nn marié depuis longtemps, bann conseil la Bible lor couma pou prend soin enn mariage ek couma pou faire li vinn pli solide, zot vrai-mem efficace. Anou guette deux-trois l’exemple dan bann page ki pé vini.

[Note]