Kisannla pé preche sa bon nouvelle-la?

“ . . . pou preché partout kot dimoune resté lor la terre.”​—MATTHIEU 24:14.

C’EST bann Témoins de Jéhovah ki pé preche la bonne nouvelle dan le monde entier. Zot faire sa dan different fason. Enn fason c’est par . . .

Bann parole. Pareil couma Jésus ek so bann disciple, bann Témoins de Jéhovah al vers bann dimoune avek la bonne nouvelle. (Luc 8:1; 10:1) Zot pa zis attann ki bann dimoune vinn vers zot. Preche lor Royaume Bondié c’est enn kitsoz ki tou bann Témoins faire, ek en tou zot plus ki sept million. Zot preché de porte en porte, lor chemin, par telephone, ek a travers lezot moyen. L’année derniere, bann Témoins de Jéhovah ti passe plus ki 1.5 milliard l’heure temps dan sa l’activité-la.

Zot pa preche zis lor Royaume Bondié mais aussi lor “tou bann commandement ki [Jésus inn donné].” (Matthieu 28:20) Zot dirige plus ki huit million l’etude la Bible gratuit, regulierement.

Bann Témoins pé preché dan le monde entier, dan 236 pays ek territoire. Zot preche avek tou sorte qualité dimoune. Zot preche dan la campagne ek dan la ville, dan bann la jungle l’Amazone ek la foret Sibérie, dan bann desert en Afrique ek lor bann montagne Himalaya. Pa paye zot pou faire sa travail-la; zot faire sa lor zot prop frais, ek zot servi zot le temps pou faire sa. C’est l’amour pou Bondié ek pou zot prochain ki pousse zot pou faire sa. Zot aussi faire konn la bonne nouvelle a travers . . .

Bann livre ek magazine. Sa magazine ki ou ena dan ou la main-la, so titre complet c’est La Tour de Garde pé annonce Royaume Jéhovah. Azordi, li publié dan 185 langue ek li parette dan plus ki 42 million copie pou chaque numero. Réveillez-vous !, magazine ki accompagne li, ki aussi annonce sa Royaume-la, li publié dan 83 langue ek li parette dan preské 40 million copie, pou chaque numero.

Bann livre, brochure, tract, CD/MP3, ek DVD ki explik bann l’enseignement la Bible, zot disponible dan apepré 540 langue. Ek zis pendant sa dix dernier l’année-la, bann Témoins finn produire ek finn distribué plus ki 20 milliard sa bann kitsoz-la, seki represente en moyenne trois pou chaque dimoune lor la terre!

Bann Témoins de Jéhovah finn aussi imprime ou-soit finn faire imprime different traduction la Bible. Les Saintes Écritures — Traduction du monde nouveau​—ki’nn traduire, imprimé, ek distribué par bann Témoins​—disponible zordi en entier ou-soit en partie dan 96 langue. Zot finn distribué plus ki 166 million copie. Bann Témoins faire konn aussi la bonne nouvelle lor Royaume Bondié . . .

Dan bann reunion. Bann reunion ki bann Témoins faire toulé-semaine dan bann la Salle du Royaume zot pa bann simple service religieux, zot l’objectif c’est pou enseigné. Zot faire bann discours lor bann sujet ki basé lor la Bible, ek servi magazine La Tour de Garde ek lezot publication pou etudié la Bible. Dan sa bann reunion-la, bann Témoins aprann aussi pou vinn bann proclamateur la bonne nouvelle ki plus efficace.

Bann Témoins etudié bann mem lartik dan plus ki 107,000 congregation partout lor la terre, ek sa renforci zot l’unité. Tou dimoune kapav assisté sa bann reunion-la. Pa passe okenn la quete. Bien sur, tousala pa ti pou ena okenn sens si bann Témoins pa ti mette en pratik seki zot preché. Alors, zot essaye encourage bann dimoune pou ecoute la bonne nouvelle a travers . . .

Zot l’exemple. En tant ki chretien, zot faire zeffort pou donne l’exemple kan zot ena enn bon conduite, ek zot faire tou seki zot kapav pou traite lezot couma zot ti pou content ki lezot traite zot. (Matthieu 7:12) Mem si zot imparfait ek parfois zot faire erreur, zot ena enn desir sincere pou agir avek l’amour envers tou dimoune pa zis kan zot preche la bonne nouvelle mais aussi kan zot aide lezot dan enn fason pratik, kan li possible.

Bann Témoins de Jéhovah pa pé essaye converti le monde par zot predication. En realité, kan sa travail-la arrive enn point kot Jéhovah satisfait, lerla la fin pou vini, pareil couma Jésus ti annoncé. Ki signification sa pou ena pou la terre ek pou so bann habitant?

[Zimage page 7]

C’est bann Témoins de Jéhovah ki pé preche la bonne nouvelle partout lor la terre