Cinquante An dan Service a Plein Temps Pré ar Cercle Arctique

NOU finn né dan enn famille kot ti ena dix zenfant. Nou ti reste dan enn la ferme, dan nord Ostrobotnie, en Finlande. Nou ti encore zenfant kan Deuxieme Guerre Mondial ti eclaté. Mem si nou ti vive plusieurs centaine kilometre ar l’endroit kot ti ena la guerre, nou ti koné ki bann dimoune ti bien souffert a cause la guerre ek sa ti affecté nou beaucoup. Kan bombe ti tombe lor bann la ville Oulu ek Kalajoki, le ciel ti vinn rouge, a-soir. Nou bann parent ti dire nou al cachiette couma nou trouve bann avion la guerre passé. Alors, kan Tauno, nou pli grand frere, ti dire nou ki la terre pou vinn enn paradis kot pou ena la justice, nou ti envie konn plus.

Kan Tauno ti ena 14 an, li ti aprann bann verité biblik dan bann livre ki ti publié par bann Etudiant la Bible. Kan Deuxieme Guerre Mondial ti eclaté, li ti refuse pou faire service militaire a cause so conscience ki ti’nn formé par la Bible, ek li ti al faire prison. La-bas, li ti gagne bann mauvais traitement. Mais sa ti faire li plus decidé pou servi Jéhovah, ek apré ki li ti sorti dan prison, li ti encore plus zelé dan so ministere. Sa bon l’exemple ki Tauno ti donne nou-la, ti encourage nou pou assisté reunion ki bann Témoins ti organisé dan enn village a coté. Nou ti al aussi bann l’assemblée, mem si nou ti bizin faire bann grand zeffort pou ramasse assez l’argent pou nou transport. Nou ti coude linge pou nou bann voisin, nou ti plante bann zoignon, ek nou ti ramasse bann fruit. Ti ena beaucoup travail dan nou la ferme, alors, souvent nou pa ti kapav assisté l’assemblée nou tou ensam, mais sakenn so tour.

Bann verité ki nou ti aprann lor Jéhovah ek lor so projet, ti faire nou l’amour pou Li vinn pli fort, ek nou ti decidé pou voué nou la vie pou servi Li. En 1947, nou toulé-deux ti prend bapteme​—Annikki, l’age 15 an, ek Aili, l’age 17 an. Saimi, nou soeur, ti prend bapteme mem l’année. Nou ti aussi faire l’etude Linnea, nou lot soeur, ki ti deja marié. Li ek so famille ti vinn Témoins de Jéhovah zot aussi. Apré nou bapteme, nou ti fixé l’objectif pou faire pionnier de vacances (ou-soit auxiliaire) de temps en temps.

NOU COMMENCE SERVICE A PLEIN TEMPS

En 1955, nou ti demenagé pou al reste Kemi enn la ville ki ti plus dan le nord. Mem si nou toulé-deux ti pé travail a plein temps, nou ti toujours envie faire pionnier, mais nou ti peur pangar nou pena assez l’argent si nou travail moins. Nou ti pensé ki d’abord, nou ti bizin ramasse inpé kass. C’est lerla ki nou ti gagne sa conversation ki mentionné la-haut-la, avek enn soeur pionnier. Sa ti aide nou pou comprend ki, pou servi Jéhovah a plein temps, sa pa depann zis lor nou-mem ni lor soutien nou famille. Seki pli important c’est compte lor nou Papa ki dan le ciel.

Sa lepok-la, nou ti ena assez kass pou faire pionnier pou deux mois. Alors, en Mai 1957, nou ti faire application pou faire pionnier pou deux mois dan la ville Pello, dan Laponie, pli la-haut ki Cercle Arctique. Apré deux mois, nou ti toujours ena l’argent ki nou ti ramassé, alors, nou ti refaire application pou faire pionnier pou encore deux mois. Deux mois plitar, nou ti toujours ena tou nou l’argent. Lerla nou ti sur ki Jéhovah pou soutenir nou. Apré ki nou finn passe 50 an dan service pionnier, nou encore toujours ena sa l’argent ki nou ti ramassé-la! Kan nou guette en arriere, nou ena sentiment ki coumadir Jéhovah ti pé attrape nou la main ek ti pé dire nou: “Pa peur. Moi, mo pou aide toi.”​—Is. 41:13.

En 1958, nou surveillant circonscription ti encourage nou pou al faire pionnier special dan la ville Sodankyla, dan Laponie. Sa lepok-la, ti ena zis enn sel Témoin, enn soeur, dan sa l’endroit-la. Li ti aprann la verité dan enn fason interessant. Enn jour, so garson ti al visite la ville Helsinki, capital Finlande, avek so classe. Bann zeleve ti pé marché dan la ville, ek garson-la ti dernier dan la ligne. Ti ena enn soeur agé ki ti pé preché ek li ti donne garson-la enn La Tour de Garde, ek ti dire li donne sa so mama. Kan so mama ti lire sa La Tour de Garde-la, desuite li ti reconette ki sa periodik-la ti pé enseigne la verité lor la Bible.

Nou ti loué enn la chambre la-haut, lor enn la scierie. Nou ti faire bann reunion ladan. Au commencement, zis nou deux, sa soeur-la, ek so tifi ki ti assisté reunion. Nou ti lire seki ti bizin faire dan reunion pou sa semaine-la. Plitar, enn missié ki ti etudié la Bible avek bann Témoins, ti vinn travail dan sa la scierie-la. Li ek so famille ti commence assisté reunion avek nou. Avek le temps, li ek so madame toulé-deux ti prend bapteme. Sa frere-la ti commence dirige nou bann reunion. En plus, bann lezot missié ki ti pé travail dan la scierie, ti commence assisté reunion ek ti vinn dan la verité. Apepré deux l’année plitar, nou groupe ti vinn enn congregation.

BANN CONDITION DIFFICILE

Nou ti bizin voyage bann longue distance pou al preché, ek parfois sa pa ti toujours facile. En été, nou ti marché, nou ti al lor bicyclette, ek nou ti mem servi enn bateau pou al zwenn bann dimoune dan nou territoire. Mais c’est surtout nou bann bicyclette ki ti bien aide nou. Nou ti servi zot aussi pou al l’assemblée ek pou visite nou bann parent, ki ti vive plusieurs centaine kilometre ar nou. Pendant l’hiver, nou ti prend bus boner gramatin pou al dan enn village ek apré, nou ti marché pou al visite chaque lakaz. Kan nou ti fini preche dan enn village, nou ti marché pou al dan enn lot village. Ti ena beaucoup la neige, ek parfois, pa ti mem trouve chemin. Souvent, nou ti suive trace ki traineau bann cheval ti faire dan la neige. Parfois, kan la neige ti ré-tombé, li ti couvert bann trace. Kan printemps ti commencé, la neige ti commence fonn ek nou lipié ti enfoncé kan nou ti marche ladan.

Kan ti faire bien frais ek ti ena la neige, nou ti bizin mette bann linge chaud. Nou ti mette bann lé-bas la laine, deux-trois paire chaussette ek bann longue botte. Mais kan-mem, nou bann botte ti souvent rempli ar la neige. Kan nou ti arrive lor perron enn lakaz, nou ti tire nou botte ek sakouye tou la neige ki ti ena ladan. Ek aussi, rebord nou bann longue manteau ti mouillé parski zot ti traine dan la neige. Apré sa, kan ti faire encore pli frais, zot ti congelé ek ti vinn raide couma enn feuille tole. Enn madame ti dire nou: “Fodé ki vrai-mem zot ena la foi pou zot sorti dan enn le temps coumsa.” Nou ti marche plus ki 11 kilometre pou al faire sa lakaz-la.

A cause bann longue distance, souvent nou ti bizin reste kot bann dimoune dan sa bann village-la. Kan ti arrive tantot, nou ti commence demann bann dimoune enn place pou resté. Zot lakaz ti bien simple, mais zot ti bon ek bien amical. Zot pa ti zis donne nou enn place pou dormi, mais zot ti donne aussi kitsoz pou mangé. Souvent, nou ti dormi lor enn la peau zanimo. Parfois, nou ti profite bann place enn tipé plus luxe. Par exemple, enn fois, enn madame ki ti ena enn grand lakaz ti amenn nou la-haut dan la chambre bann invité, ek la, ti ena enn joli lili avek bann drap blanc en dentelle ki ti pé attann nou. Plusieurs fois nou ti gagne bann conversation lor la Bible ziska tard a-soir. Dan enn l’endroit, enn couple ti accepté pou dormi dan enn coin dan enn la chambre, ek nou dan lot coin. Zot ti pose nou bann question sakenn so tour​—enn apré lot. Nou ti koz lor la Bible avek zot toute la nuit, ziska boner gramatin.

ENN MINISTERE KI’NN GAGNE SUCCÈS

Laponie c’est enn l’endroit sec, mais bien joli dependant bann saison. Mais pou nou, bann dimoune ki ti content Jéhovah, zot ti encore pli joli. Parmi bann dimoune sincere ar ki nou ti preché, ti ena bann zom ki ti vinn coupe bann pié dan Laponie ek ki ti reste dan bann camp. Parfois, deux tipti soeur couma nou ti rente dan enn lakaz kot ti ena beaucoup zom. Zot ti bien costaud, mais zot ti bien content pou ecoute message ki nou ti preché ek pou prend nou bann livre.

Nou finn faire beaucoup l’experience bien interessant. Enn jour, reveil ki ti dan enn la gare bus, ti cinq minute en avance, sa ti faire nou rate nou bus. Alors, nou ti decide pou prend enn lot bus ki ti al dan enn lot village. Jamais nou ti preche dan sa l’endroit-la avant. Premier lakaz ki nou ti faire, nou ti zwenn enn jeune madame ki ti dire nou: “Ala zot la bann tifi, mo ti pé attann zot.” Nou ti faire l’etude avek so soeur. Sa jeune madame-la ti dire so soeur demann nou si nou kapav vinn visite li sa jour-la-mem. Mais nou, jamais nou ti gagne sa message-la. Nou ti commence enn l’etude avek li ek avek bann membre so famille ki ti vive dan enn lakaz pa trop loin. Nou pa ti tardé pou faire tou sa bann l’etude-la vinn enn sel l’etude kot douze dimoune ti assisté. Depuis sa, beaucoup dan sa famille-la inn vinn Témoins de Jéhovah.

En 1965, ti demann nou pou retourne kot nou ti été avant, dan congregation Kuusamo, zis enba Cercle Arctique, ek nou encore toujours la-bas. Sa lepok-la, ti ena enn tigit proclamateur dan sa congregation-la. Au commencement, nou territoire ti parette enn tipé difficile. Bann dimoune ti bien religieux ek zot pa ti content l’activité ki nou ti pé faire. Malgré sa, beaucoup dimoune ti respecté la Bible, ek nou ti essaye rod enn point commun avek zot pou gagne enn conversation. Alors, tigit par tigit, nou ti rod konn sa bann dimoune-la, ek apré environ deux an, li ti pli facile pou commence bann l’etude.

NOU ENCORE TOUJOURS ACTIF DAN NOU MINISTERE

Zordi, nou pena mem la force pou passe bann longue la journée dan predication, mais nou encore al preché preské toulé-jour. Li pli facile pou preche la bonne nouvelle dan nou grand territoire surtout depuis ki nou neveu inn encourage Aili pou aprann conduire. Aili ti gagne so licence en 1987, kan li ti ena 56 an. Kan ti construire enn nouveau la Salle du Royaume ek enn l’appartement, nou ti al reste dan l’appartement-la ek sa ti aide nou beaucoup.

Nou bien content pou trouve l’accroissement ki finn ena dan Finlande. Kan nou ti commence service a plein temps dan nord Finlande, ti ena zis enn tigit proclamateur dan sa grand l’endroit-la. Zordi, ena plusieurs congregation ki forme enn circonscription. Souvent inn arrivé ki dan bann l’assemblée enn kikenn vinn presente-li-mem ek demann nou si nou rappel li. Dan certain cas, nou ti’nn conduire enn l’etude la Bible avek so famille kan li ti encore tipti. Sa la grain ki nou finn planté plusieurs l’année, ou-soit-mem plusieurs dizaine l’année avant-la, finn rapporte so fruit!​—1 Cor. 3:6.

En 2008, sa ti faire 50 an depuis ki nou pionnier special. Nou remercié Jéhovah ki nou finn kapav encourage sakenn nou camarade pou enduré dan So service. Nou finn amenn enn la vie simple, mais jamais nou finn mank nanyé. (Ps. 23:1) Alors, li pa ti vaut la peine ki nou ti hesité pou rente dan service a plein temps! Pendant tou sa bann l’année-la, Jéhovah inn fortifié nou, en accord avek promesse ki Li faire dan Isaïe 41:10: “Mo pou fortifié toi. Mo pou vrai-mem aide toi. Mo pou vrai-mem tini toi ferme avek mo la main droite la justice.”