Li Fer Nou “Leker Kontan”

Eski Jéhovah vremem gagn nou traka, ouswa eski Li indiferan ar difikilte bann dimounn lor later? Repons ki Labib done lor sa kestion-la rekonfort nou leker. Ofet, Bondie Li vremem gagn traka bann dimounn, ek Li anvi ki nou zwir lavi. Toulezour Li permet bann dimounn​—mem seki pli ingra parmi zot​—pou profit so gran bonte. Anou examinn bann parol lapot Paul.​—Lir Actes 14:16, 17.

Kan Paul ti pe koz avek bann abitan Lystres ki pa ti ador Bondie, li ti dir: “Dan bann zenerasion pase, [Bondie] ti permet tou bann nasion pou pran sime ki zot anvi, pourtan, Li’nn prouve ki Li existe par bann bon kitsoz ki Li’nn fer, Li donn zot lapli ek bann sezon kot ena labondans; Li’nn donn zot manze ek lazwa an abondans pou fer zot leker kontan.” Pou bann ki ti pe ekout Paul, ki zot ti bizin konpran par sa bann parol-la?

Bann abitan Lystres pa ti bizin al pli lwin pou konpran bann parol Paul. Zot ti bann planter ek zot ti viv dan enn rezion bien fertil ek kot ena boukou lapli. Me, kouma Paul ti fer zot rapel, se Bondie Limem ki donn lapli ek bann sezon kot ena labondans. Savedir, sak fwa ki zot ti fer enn bon rekolt ek profit enn bon repa, zot ti pe gout bonte ki Bondie manifeste.

Seki Paul ti dir bann abitan Lystres ansegn nou plizir leson inportan lor Jéhovah.

Jéhovah donn nou liberte pou swazir. Remarke ki Jéhovah ti permet bann dimounn dan tou nasion “pou pran sime ki zot anvi.” Enn liv referans pou bann tradikter Labib dir ki sa lexpresion-la kapav vedir “al kouma zot anvi” ouswa “fer kouma zot panse li pli bon.” Jéhovah pa fors personn pou ador Li. Li’nn kree nou avek liberte pou swazir​—kapasite pou swazir nou prop direksion dan lavi.​—Deutéronome 30:19.

Jéhovah anvi ki nou konn Li. Paul ti explike ki Bondie inn “prouve ki Li existe.” Sa liv referans ki nou’nn mansione la dir ki nou kapav konpran sa fraz-la koumsa: “Li finn montre bann dimounn dan enn fason kler ki kalite Bondie Li ete.” Bann kreasion Bondie montre bien so bann “kalite invizib,” parmi ena so bonte, so sazes, so pouvwar, ek so lamour. (Romains 1:20) Jéhovah inn revel ankor boukou kitsoz lor Limem dan Labib. (2 Timothée 3:16, 17) Eski li pa kler ki Bondie anvi nou konn Li?

Jéhovah anvi ki nou konn vre boner. Paul dir ki Li’nn donn nou “manze ek lazwa an abondans pou fer [nou] leker kontan.” Mem enn dimounn ki fer pese ek ki pa konn Jéhovah kapav manze ziska so leker kontan ek trouv enn sertin satisfaksion dan so lavi. Me selman, Bondie anvi ki nou zwir enn vre boner ki dire. Sa li pou posib si nou aprann laverite lor Li ek aplik sa dan nou lavi.​—Psaume 144:15; Matthieu 5:3.

Nou tou nou profit bonte Jéhovah toulezour. Eski ou pa ti pou kontan konn plis kouma ou kapav montre ou rekonesans anver sa Bondie ki’nn donn ou “manze ek lazwa an abondans [la] pou fer [ou] leker kontan”?