Enn Kitsoz “ki Pa Kapav Blié” Ti Vinn Zis a Temps

“PA KAPAV blié!” C’est seki beaucoup ti dire lor “ Drame de la Création. ” Li ti vinn zis a temps ek sa ti reste touletan dan memoire bann ki ti guette sa. Oui, “ Drame de la Création ” ti rann enn grand temoignage ek ti donne la gloire Jéhovah zis avant ki gouvernement Hitler ti persecute dan enn fason cruel bann serviteur Jéhovah en Europe. Mais ki ti été sa, “ Drame de la Création ” ?

En 1914, c’est premier fois ki centre mondial bann serviteur Jéhovah dan Brooklyn, New York, en Amérique, ti presente “ Photo-Drame de la Création. ” C’est enn projection film ek zimage en couleur ek son, ki ti duré pendant huit heure temps. Plusieurs million dimoune partout lor la terre ti guette “ Photo-Drame de la Création. ” Ti ena enn version pli courte ki ti appel “ Eurêka-Drame ” ki ti aussi sorti en 1914. Mais en 1920, bann diapositive, bann film ek l’equipement ki ti servi pou passe “ Photo-Drame de la Création, ” ti’nn bien abimé. Pourtant, ti ena encore beaucoup dimoune ki ti demann pou guette sa. Par exemple, bann dimoune ki ti reste Ludwigsburg, en Allemagne ti demandé: “Kan eski pou passe “ Photo-Drame ” encore?” Ki ti pou kapav faire pou zot?

En 1920, pou kapav faire bann lezot presentation sa Drame-la, bann representant famille Béthel, dan Magdebourg, en Allemagne ti acheté bann film ek bann diapositive ar bann compagnie commercial dan Paris, en France, ek dan Leipzig, ek Dresde, en Allemagne. Zot ti ajoute sa ensam avek bann vié diapositive “ Photo-Drame ” ki ti encore kapav servi.

Frere Erich Frost, ki ti enn bon musicien, ti compose enn la musik pou accompagne sa bann film ek sa bann diapositive-la. Enn partie commentaire ki ti faire pendant sa film-la, ti sorti dan livre Création. C’est a cause sa ki ti donne sa version ‘Photo-Drame-la’ enn nouveau nom​—“ Drame de la Création. ”

Sa nouveau Drame-la ti mem longueur ki “ Photo-Drame ”​—huit heure⁠—zot ti divise li en different partie ek zot ti passe sa dan plusieurs l’apré-midi. Sa Drame-la ti montré bann detail interessant lor bann jour creation, lor bann zistoire biblik ek profane, ek aussi couma fausse religion ti’nn embete bann dimoune. Ti presente “ Drame de la Création ” en Autriche, en Allemagne, en Luxembourg, en Suisse, ek avek bann dimoune ki koz allemand dan lezot l’endroit.

Erich Frost ti expliké: “Pendant bann presentation sa Drame-la, mo ti demann bann ki ti travail ensam avek moi, surtout bann ki ti dan l’orchestre, pou al dan chaque rangé pendant lentrack, pou propose bann dimoune nou bann joli livre ek brochure. Nou ti place plus publication dan sa fason-la, ki kan nou ti al devant la porte bann dimoune.” Johannes Rauthe ki ti organise bann presentation dan Pologne ek dan seki appel zordi République Tchèque, rappel ki beaucoup dimoune dan l’assistance ti laisse zot l’adresse pou nou kapav ré-visite zot. Nou ti ré-visite sa bann dimoune-la ek nou ti gagne bann bon conversation lor la Bible avek zot.

Dan bann l’année 1930, a chaque fois ki ti joué “ Drame de la Création, ” bann la salle ti rempli ek tou dimoune dan la ville ti koz lor bann Témoins de Jéhovah. En 1933, preské enn million dimoune ti vinn guette bann presentation ki nou filiale en Allemagne ti organisé. Käthe Krauss rappel: “Zis pou nou guette sa Drame-la, chaque jour pendant cinq jour, nou ti marche dix kilometre allé-retour, dan bann bois, nou ti traverse bann colline ek bann vallée.” Else Billharz dire: “C’est grace a ‘ Drame de la Création ’ ki mo’nn commence content la verité.”

Alfred Almendinger raconté ki, kan so mama ti al guette sa Drame-la, li ti “tellement content ki li ti acheté enn la Bible ek li ti rod mot ‘purgatoire.’” Parski li pa ti trouve sa mot-la dan la Bible, li ti arrete al l’eglise ek li ti prend bapteme. Erich Frost dire: “Enn quantité dimoune ti vinn dan la verité grace a ‘ Drame de la Création. ’”​—3 Jean 1-3.

Dan mem periode ki beaucoup dimoune ti pé guette ‘ Drame de la Création, ’ parti Nazi ti pé gagne pouvoir en Europe. Au commencement 1933, l’activité bann Témoins de Jéhovah ti interdit en Allemagne. Depuis sa date-la ziska la fin Deuxieme Guerre Mondial en 1945, bann serviteur Jéhovah ti gagne enn grand persecution en Europe. Erich Frost ti emprisonné pendant apepré huit an. Mais li ti reussi survive ek plitar li ti servi dan Béthel Wiesbaden, en Allemagne. Bann frere pa ti kapav blié ‘ Drame de la Création. ’ Li ti vinn vrai-mem dan enn bon moment pou donne plus courage beaucoup chretien ki ti pou bizin faire face ar bann l’epreuve ki ti pou testé zot la foi pendant Deuxieme Guerre Mondial!​—Dan nou bann archive en Allemagne.