Swazir pou Soutenir Rwayom Bondie Depi Asterla Mem!
Imazine ki enn gran siklonn pe vini. Dan radio ek dan televizion pe dir: “SOVE ALE! AL ROD ENN REFIZ!” Ki ou bizin fer? Ou pou bizin al rod refiz dan enn plas kot ou pou an sekirite.
Ofet, nou tou nou pe viv enn lepok kot biento enn gran “siklonn” pou kraz lor nou ek Zezi ti dekrir sa lepok-la kouma enn “gran detres.” (Matie 24:21, NW) Nou pa kapav evit sa gran detres-la, me nou kapav fer kitsoz pou gagn proteksion. Ki nou kapav fer?
Dan so Sermon lor Montagn, Zezi ti donn sa konsey-la: “Alor, avan tou kitsoz, kontign rod Rwayom Bondie ek so lazistis.” (Matie 6:33, NW) Kouma nou kapav fer sa?
Avan tou kitsoz rod Rwayom Bondie. Savedir ki nou bizin konsider Rwayom Bondie kouma kitsoz ki pli inportan pou nou. (Matie 6:25, 32, 33) Kifer nou bizin pans koumsa? Parski bann dimounn pa kapav regle bann problem limanite. Se zis Rwayom Bondie ki kapav fer sa travay difisil la.
Rod so lazistis. Fer ou maximum pou viv an-akor avek Bondie so bann lalwa ek so bann prinsip ki zis. Kifer? Parski si nou desid par noumem seki bon ek seki pa bon, nou pou konn bann move konsekans. (Proverb 16:25) Parkont, si nou viv an-akor avek bann prinsip Bondie, nou pa pou zis fer Bondie plezir, me nou pou osi gagn bann bienfe.—Izai 48:17, 18.
Kontign rod avan tou kitsoz Rwayom Bondie ek so lazistis. Zezi ti averti ki sertin pou les zot distrer ek pou panse ki zot pou an sekirite si zot gagn boukou kas. Lezot kitfwa telman okipe ar bann problem ki zot gagne toulezour, ki zot nepli ena letan pou rod Rwayom Bondie.—Matie 6:19-21, 25-32.
Me selman, Zezi ti promet ki bann dimounn ki soutenir Rwayom Bondie pou gagn seki zot bizin asterla ek zot pou profit bann benediksion pou touletan dan lavenir.—Matie 6:33.
Mem si bann disip Zezi dan premie siek ti rod Rwayom Bondie ek so lazistis, zot pa ti trouv lafin bann douler ek soufrans pandan zot lavi. Me zot ti gagn proteksion. Kouma?
Parski zot ti viv an-akor avek Bondie so bann prinsip ki zis, zot pa ti gagn bann difikilte ki bann dimounn ki pa ti obeir Bondie ti gagne. Zot ti ena enn gran lafwa ki Rwayom Bondie ti pou vini, ek sa ti mem ed zot pou andir bann pli gran problem ki zot ti gagne. Ek Bondie ti donn zot “pwisans ki plis ki seki normal” pou ki zot kapav andire.—2 Korintien 4:7-9, NW.
ESKI OU POU ROD RWAYOM BONDIE AVAN TOU LEZOT KITSOZ?
Bann Kretien dan premie siek ti obeir komannman Zezi pou rod Rwayom Bondie avan tou kitsoz. Zot ti pres bon nouvel lor Rwayom Bondie partou. (Kolosien 1:23) Eski ena bann dimounn ki pe fer sa azordi?
Wi! Bann Temwin Zeova kone ki res bien tigit letan avan ki Rwayom Bondie detrir sa lemond-la. Alor, zot servi zot lenerzi pou fer travay ki Zezi ti dekrir: “Bonn Nouvel Rwayom Bondie pou anonse partou dan lemonn, kouma enn temwagnaz pou tou bann nasion; lerla lafin pou vini.”—Matie 24:14.
Eski ou pou ekout sa bon nouvel lor Rwayom Bondie la? Nou ankouraz ou pou imit bann dimounn ki ti viv dan premie siek ek ki ti res dan Bere, enn lavil dan Masedwann. Kan zot ti tann Lapot Pol anons bon nouvel konsernan Rwayom Bondie, zot ti “extra kontan” pou aksepte so mesaz. Lerla zot “ti examinn bann Lekritir an profonder” pou verifie seki zot ti pe tande ek apre sa, zot ti azir an-akor avek seki zot ti aprann.—Zistwar Bann Apot 17:11, 12, NW.
Ou osi, ou kapav fer parey. Kan ou rod Rwayom Bondie ek so lazistis avan tou lezot kitsoz, ou pou gagn refiz ek proteksion depi asterla mem, ek dan lavenir ou pou viv dan lape ek sekirite pou touletan.