Mo Ena enn Lavi Bien Ere dan Servis Zeova

Lane apre, bann frer ti dir lafami Betel ki Betel Lafrik Disid ti pe bizin bann volonter parski zot ti pou gagn enn nouvo masinn dan linprimri. Mo ti donn mo nom, ek mo ti extra kontan kan bann-la ti swazir mwa. Bann frer ti osi swazir trwa lezot Betelit: Dennis Leech, Bill McLellan, ek Ken Nordin. Bann frer ti dir nou ki nou ti pou laba pou enn bon bout letan!

Mo ti telefonn mo mama, ek mo ti dir li: “Ma, mo ena enn nouvel pou anons twa. Mo pe al Lafrik Disid!” Mo mama ti enn dimounn bien trankil, me li ti ena enn lafwa bien for ek li ti ena enn bon relasion avek Zeova. Li pa ti koz boukou, me mo ti kone ki li ti pou soutenir mwa. Mem si mo mama ek mo papa ti bien tris ki mo ti pe al bien lwin, zame zot finn repros mwa pou desizion ki mo’nn pran.

MO AL LAFRIK DISID!

Pou koumanse, nou ti al Betel Brooklyn kot nou ti gagn trwa mwa formasion pou servi enn masinn linprimri. Apre sa, nou ti pran enn bato pou al Cape Town dan Lafrik Disid. Mo ti fek gagn 20 an. Depi Cape Town, nou ti pran enn trin pou al Johannesburg. Nou ti koumans nou vwayaz dan lasware. Boner gramatin, nou trin ti arete enn premie fwa dan enn ti lavil dan Karoo, enn landrwa ki inpe dezer. Laba, ti ena boukou lapousier ek ti fer bien so. Nou ti get par lafnet ek nou ti pe demann noumem ki kalite landrwa sa ti ete. Nou ti pe trakase konsernan nou nouvo afektasion! Inpe lane apre, kan nou ti re-al laba, nou ti realize ki sa bann ti lavil-la ti bien zoli ek trankil.

Pandan de-trwa lane, mo ti travay lor masinn Linotype, ki ti enn masinn extraordiner me bien konplike. Mo ti bizin prepar bann ranze let pou inprim magazinn Leve! ek Latour Degard. Betel Lafrik Disid ti inprim bann magazinn dan plizir lang Afriken, pa zis pou Lafrik Disid me osi pou plizir pei dan Lafrik. Nou ti sorti bien lwin pou travay lor sa masinn-la ek nou ti bien kontan ki nou ti pe servi li boukou!

Plitar, mo ti travay dan departman ki ti okip tradiksion, linprimri, ek exportasion. Mo lavi ti ena sans ek li ti bien ranpli.

MO MARYE EK MO GAGN ENN NOUVO AFEKTASION

An 1968, mo ti marye ar enn pionie ki apel Laura Bowen ek ki ti res pre ar Betel. Li ti osi travay kouma typist dan Departman Tradiksion. Sa lepok-la, bann nouvo marye pa ti res Betel, alor Betel ti avoy nou kouma pionie spesial. Mo ti inpe trakase. Mo ti fer di-z-an dan Betel, ek mo ti touletan ena manze ek enn kwin pou reste. Asterla, kouma mo ti pou fer pou pey tou seki mo ti bizin avek sa ti-kas ki bann pionie spesial gagne la? Toule mwa, nou ti pou gagn 25 rand sakenn (35 dolar Ameriken sa lepok-la) si nou ti reisi ranpli nou kota ler, vizit, ek piblikasion. Avek sa kas-la, nou ti pou bizin pey lakaz, transpor, aste manze, pey bann depans medikal, ek lezot depans ankor.

Nou ti al servi pre ar lavil Durban, ki pre ar Losean Indien. Laba, ti ena boukou Indien. Zot ti desandan bann travayer, ki ti vinn Lafrik Disid ver 1875, pou travay pou bann lizinn disik. Asterla, zot fer lezot travay, me zot inn gard zot kiltir, parmi ena bann bon manze ki zot kwi, kouma bann kari. Anplis, zot ti koz Angle, alor nou pa ti ena pou aprann enn lot lang pou pres avek zot.

Bann pionie spesial ti bizin fer 150 er par mwa. Alor, Laura ek mwa nou ti plann pou fer si-z-er tan nou premie zour. Sa zour-la, ti fer bien so ek ti ena boukou limidite. Nou pa ti ena okenn vizit, ni okenn letid; nou ti bizin pres lakaz-lakaz pandan si-z-er tan. Inpe letan apre ki nou ti koumans prese, mo ti get mo mont ek mo ti realize ki nou ti fer zis 40 minit! Mo ti pe demann momem kouma nou ti pou fer nou servis pionie!

Avek letan, nou ti organiz nou bien. Toulezour, nou ti amenn nou dipin ek nou ti met lasoup ouswa kafe dan enn termos. Kan nou ti bizin fer enn poz, nou ti met nou loto dan lonbraz anba enn pie. Parfwa, bann zoli ti-zanfan Indien ti vinn get nou parski nou pa ti parey kouma zot. Apre inpe letan, nou ti realize ki apre de-trwa ler-tan, leres lazourne ti pas bien vit.

Sa ti vremem enn gran lazwa pou partaz bann verite ki ena dan Labib ar bann Indien sa teritwar-la! Anplis, zot ti ena lospitalite, zot ti bien zanti, zot ti ena respe pou lezot, ek zot ti kontan Bondie. Boukou Indou ti aksepte nou mesaz. Zot ti kontan pou aprann lor Zeova, Zezi, Labib, lor lemond nouvo kot pou ena lape, ek lor lesperans pou bann mor. Apre enn an, nou ti ena 20 letid Labib. Toulezour, nou ti pran nou repa prinsipal avek enn fami avek ki nou ti pe etidie. Nou ti extra kontan.

Me bien vit, nou ti gagn enn lot afektasion. Nou ti gagn responsabilite pou al servi dan sirkonskripsion, dan bann teritwar ki lor lakot Losean Indien. Sak semenn, nou ti res kot enn fami. Pandan nou vizit, nou ti travay ansam avek bann proklamater dan lasanble pou ankouraz zot. Zot ti tret nou kouma bann manb zot fami. Nou ti kontan pas letan avek zot ek zot bann zanfan, ek zwe avek zot bann zanimo. Apre de lane bien ranpli, nou finn gagn enn call. Enn frer dan Betel ti telefonn nou ek ti dir nou: “Nou ti pou kontan ki zot retourn Betel.” Mo ti dir li: “To kone, nou bien kontan kot nou ete.” Me biensir, nou ti pre pou al servi ninport kotsa zot ti demann nou pou ale.

NOU RETOURN BETEL LAFRIK DISID

Dan Betel, mo ti travay dan Departman Servis ek mo ti gagn privilez pou travay avek boukou frer ki ti bien spiritiel. Sa lepok-la, apre ki enn responsab sirkonskripsion ti vizit enn lasanble, li ti avoy Betel enn rapor. Lerla, Departman Servis ti avoy sa lasanble-la enn let ki ti baze lor sa rapor-la. Sa bann let-la ti ankouraz bann frer ek ser ek ti donn bann instriksion ki kitfwa zot ti bizin. Bann frer dan Departman Servis ti fer boukou zefor pou tradir bann rapor ki responsab sirkonskripsion ti avoye. Zot ti tradir sa bann rapor-la an Angle depi lang Xhosa, Zulu, ek lezot lang ankor. Apre sa, zot ti bizin repran bann let Departman Servis ki ti an angle ek re-tradir zot dan sa bann lang Afriken la, pou avoy bann lasanble. Mo ti bien rekonesan pou bann gran zefor ki bann tradikter ti fer, ek zot ti ed mwa pou konpran bann difikilte ki nou bann frer ek ser nwar dan Lafrik ti gagne.

Sa lepok-la, ti ena laparteid dan Lafrik Disid. Sak ras ti ena so prop landrwa pou reste, ek zot pa ti frekant bann dimounn dan lezot ras. Nou bann frer ek ser nwar Afriken ti koz zot prop lang, zot ti pres dan zot prop lang, ek zot ti asiste bann renion dan zot prop lang osi.

Mo pa finn konn boukou frer ek ser Afriken nwar, parski mo bann lafektasion ti touletan trouv dan bann teritwar kot bann dimounn koz Angle. Me asterla, mo ti gagn lokazion pou aprann plis lor kiltir ek koutim bann Afriken nwar. Mo ti aprann plis lor bann difikilte ki nou bann frer ek ser ti bizin fer fas akoz bann tradision lokal ek bann krwayans relizie. Zot ti vremem montre boukou kouraz pou rezet bann tradision ki pa baze lor Labib! Parski zot pa ti fer sorselri, nou bann frer ek ser ti bizin osi fer fas ar lopozision zot fami ek bann dimounn dan zot vilaz. Dan bann vilaz, bann dimounn ti bien pov ek zot ti ena bien tigit ledikasion. Me zot ti ena respe pou Labib.

Mo’nn gagn privilez pou travay lor bann case lakour konsernan nou netralite ek nou liberte pou ador Zeova. Bann lekol ti met zanfan bann Temwin Zeova deor, parski zot ti refiz fer lapriyer ek sant lim nasional. Sa ti vremem fortifie nou lafwa kan nou ti trouv kouraz ek fidelite sa bann zanfan-la.

Dan enn ti pei dan Lafrik, ki lontan ti apel Swaziland, bann frer ti gagn enn lot difikilte. Dan sa pei-la, kan enn kikenn mor, bann dimounn abitie fer bann seremoni pou so lamor. Me kan Lerwa Sobhuza II ti mor, tou bann sitwayen Swaziland ti oblize partisip dan sa bann seremoni-la. Bann zom ti bizin raz zot latet, ek bann madam ti bizin koup zot seve kourt. Sa seremoni-la ti ena enn lien ar ladorasion bann anset, ek boukou frer ek ser ti gagn persekision parski zot pa ti partisip ladan. Zot fidelite anver Zeova ti vremem rann nou ere! Nou’nn aprann boukou ar nou bann frer Afriken. Zot fidelite ek zot pasians inn fortifie nou lafwa.

MO REKOUMANS TRAVAY DAN LINPRIMRI

An 1981, mo ti rekoumans travay dan linprimri. Ti pe koumans servi bann computer dan linprimri ek mo ti al ede pou devlop sa nouvo metod-la. Sa ti enn moman extraordiner! Bann metod inprime ti pe sanze. Enn konpagni ti donn Betel enn nouvo model masinn pou seye. Rezilta: Nou finn ranplas nou nef masinn Linotype par sink sa nouvo model masinn la. Nou ti osi instal enn nouvo lapres. Aster, nou ti pe inprim plis ki avan!

Bann computer inn ed nou pou invant bann nouvo fason pou organiz bann text lor bann paz, gras-a MEPS (Multilanguage Electronic Publishing System). Teknolozi inn bien evolie depi ki Bill, Ken, Dennis, ek mwa, nou’nn kit Kanada pou vinn Lafrik Disid! (Iza. 60:17) Nou toule kat, nou’nn marye ar bann pionie ki bien kontan Zeova. Bill ek mwa, nou ti ankor pe servi dan Betel. Ken ek Dennis ti gagn bann zanfan ek zot pa ti res tro lwin.

Travay dan Betel ti pe kontign ogmante. Ti tradir ek inprim bann piblikasion dan pli boukou lang ek ti avoy zot dan lezot Betel. Avek letan, nou ti bizin bann nouvo batiman. Bann frer ti konstrir bann nouvo batiman dan enn zoli landrwa ki trouv dan lwes Johannesburg, ek an 1987, ti fer linogirasion sa bann batiman-la. Mo ti bien kontan pou partisip dan sa lakrwasman-la, ek osi pou servi antan ki manb Komite Biro Nasional Lafrik Disid pandan plizir lane.

NOU GAGN ENN NOUVO AFEKTASION!

An 2001, nou ti gagn enn gran sirpriz! Komite Biro Nasional Letazini ti fek forme ek mo ti gagn linvitasion pou servi kouma enn manb sa komite-la. Nou ti bien tris pou kit nou travay ek nou bann kamarad dan Lafrik Disid, me nou ti bien kontan pou koumans enn nouvo lavi dan fami Betel Letazini.

Nou ti bien trakase parski nou ti pou bien lwin ar Laura so mama, ki ti pe koumans vinn vie. Depi New York, nou pa ti pou kapav fer boukou pou li. Me Laura so bann ser ti propoz pou ed zot mama lor plan fizik, materyel, ek emosionel. Zot ti dir: “Nou pa kapav dan servis aplintan. Me si nou okip mama, sa pou ed twa pou kontign to servis.” Nou bien rekonesan anver zot!

Mo frer ek so madam, ki ti res Toronto, dan Kanada, ti okip mo mama, ki ti enn vev asterla. Sa lepok-la, mo mama ti pe deza res avek mo frer ek so madam depi plis ki 20 an. Mo mama inn mor zis apre ki nou’nn ariv New York, ek nou bien rekonesan pou lamour ek latansion ki mo frer ek mo bel-ser inn donn mama ziska so lamor. Se vremem enn benediksion pou gagn soutien bann manb nou fami, ki pre pou fer bann sanzman dan zot lavi pou okip bann paran ki aze, mem si parfwa sa kapav bien difisil!

Pandan inpe lane, mo’nn travay dan prodiksion bann piblikasion, ki’nn vinn pli modern ek pli sinp. Apre sa, mo’nn travay dan departman ki aste bann kitsoz pou Betel. Sa fer plis ki 20 an ki mo form parti sa gran fami Betel la, kot ena plis ki 5,000 manb ek apepre 2,000 volonter. Se vremem enn gran plezir pou travay ansam avek zot!

Si ti demann mwa, 60 an avan, kot sa mo ti pou ete azordi, zame mo ti pou panse ki mo ti pou la! Pandan tou sa bann lane-la, Laura inn soutenir mwa avek tou so leker. Mo finn vremem gagn enn zoli lavi! Nou vremem apresie tou bann travay ki nou’nn fer ek tou bann dimounn extraordiner avek ki nou’nn travay, parmi ena bann frer ek ser ki nou’nn zwenn kan nou’nn vizit plizir Betel dan lemond antie. Azordi, mo ena plis ki 80 an, ek mo gagn pli tigit travay pou fer parski ena bann zenn frer ki’nn forme pou fer sa bann travay-la.

Enn ekrivin Psom ti dir: “Enn nasion li ere kan LESEGNER [“Zeova,” NW] limem so Bondie.” (Ps. 33:12) Zot bien vre sa bann parol-la! Mo bien rekonesan ki mo’nn kapav servi Zeova ansam avek so bann serviter ki ere!