To Kapav Realiz To Bann Lobzektif Spiritiel

1. Ki difikilte boukou parmi nou gagne?

ESKI to’nn deza fixe enn lobzektif spiritiel, me to’nn gagn difikilte pou realiz li?b Si wi, to pa tousel. Par exanp, Philip ti anvi amelior kalite so bann lapriyer ek priye pli souvan, me li ti gagn difikilte pou trouv letan pou priye. Erika ti fixe lobzektif pou rant aler pou bann renion predikasion. Me kanmem sa, preske tou renion li ti rant an retar. Tomáš plizir fwa inn esey lir Labib an-antie. Li dir: “Mo pa kontan lir Labib. Trwa fwa mo’nn seye, me sak fwa mo’nn lir ziska Levitik, apre mo’nn arete.”

2. Kifer fode pa nou dekouraze si nou’nn fixe enn lobzektif ek ki nou pankor realiz li?

² Si to’nn fixe enn lobzektif spiritiel me to pankor realiz li, fode pa to dekouraze. Mem pou bann ti lobzektif spiritiel, sa demann letan ek zefor pou realiz zot. Selman, si to touzour anvi realiz to lobzektif, sa montre ki to lamitie ar Zeova bien inportan pou twa ek ki to anvi fer to best pou Li. To bann zefor ena valer pou Zeova. Biensir, Zeova pa atann ki to fer plis ki seki to kapav fer. (Ps. 103:14; Mish. 6:8) Alor, kan to fixe enn lobzektif, fixe enn ki to kapav realize. Apre ki to’nn fixe enn lobzektif, ki to kapav fer pou realiz li? Anou get de-trwa kitsoz ki kapav ed twa.

MOTIVASION BIEN INPORTAN

3. Kifer motivasion bien inportan?

³ Pou to realiz enn lobzektif spiritiel, to bizin bien motive. Kan enn kikenn li motive, li vremem anvi realiz so lobzektif ek li fer zefor pou realiz li. Nou kapav konpar motivasion ar enn divan ki pous enn bato lavwal pou li ariv so destinasion. Si divan kontign soufle, bato-la pou ariv so destinasion. Ek si divan-la for, li pou ariv pli vit. Dan mem fason, plis nou motive, plis nou pou reisi realiz nou bann lobzektif. David, enn frer ki res Salvador, dir: “Kan to motive, to fer plis zefor. To pa les nanye anpes twa realiz to lobzektif.” Alor, ki to kapav fer pou to plis motive?

4. Pou ki kitsoz nou kapav priye? (Filipien 2:13) (Get zimaz osi.)

⁴ Priye pou gagn motivasion. Zeova kapav servi so lespri sin pou motiv twa pou realiz to lobzektif. (Lir Filipien 2:13.) Parfwa, nou kapav fixe enn lobzektif parski nou kone ki se enn bon kitsoz ek ki nou bizin fer li. Me kitfwa nou pa motive pou realiz li. Se seki ti ariv enn ser ki apel Norina ek ki res Ouganda. Li ti fixe lobzektif pou fer enn letid Labib. Selman, li ti mank motivasion parski li ti panse ki li pa enn bon ansegnan. Ki kitsoz ti ed li? Li dir: “Toulezour, mo ti priye Zeova pou ki Li ogmant mo dezir pou fer enn letid Labib. Mo ti osi fer zefor pou amelior mo kapasite pou ansegne. Apre de-trwa mwa, mo ti vremem motive. Sa lane-la, mo ti koumans de letid Labib.”

5. Lor ki kitsoz nou kapav reflesi pou nou gagn plis motivasion?

⁵ Reflesi lor seki Zeova inn fer pou twa. (Ps. 143:5) Lapot Pol ti reflesi lor bonte extraordiner ki Zeova ti montre anver li, ek sa ti motiv li pou travay dir pou Zeova. (1 Kor. 15:9, 10; 1 Tim. 1:12-14) Dan mem fason, plis nou reflesi lor seki Zeova inn fer pou nou, plis nou pou motive pou realiz nou lobzektif. (Ps. 116:12) Enn ser ki res Onduras ti fixe lobzektif pou vinn pionie permanan. Anou gete seki ti ed li pou realiz so lobzektif. Li dir: “Mo ti reflesi lor ki kantite Zeova kontan mwa. Li ti ed mwa pou trouv so pep. Li gagn mo traka ek Li protez mwa. Kan mo ti reflesi lor la, sa ti ogmant mo lamour pou Li, ek sa ti motiv mwa pou fer pli boukou zefor pou vinn pionie.”

6. Ki kitsoz ankor kapav ed nou pou ena plis motivasion?

⁶ Reflesi lor bann bienfe ki to pou gagne si to reisi realiz to lobzektif. Anou gete seki ti motiv Erika, ki nou ti mansione taler-la, pou ki li reisi rant aler pou bann renion predikasion. Li dir: “Mo ti rann mwa kont ki mo ti rat boukou kan mo ti rant tar dan predikasion. Si mo ti ariv boner mo ti pou reisi koz ar bann frer ek ser ek pas letan avek zot. Ek si mo ti asiste renion predikasion, mo ti pou tann bann sizesion ki ti pou ed mwa pou kontan predikasion ek pou pres pli bien.” Erika ti reflesi lor bann bienfe ki li ti pou gagne si li ti rant aler, ek sa ti ed li pou realiz so lobzektif. Lor ki bann bienfe to kapav reflesi? Si to’nn fixe lobzektif pou amelior to lektir Labib ouswa to bann lapriyer, reflesi kouma sa kapav amelior to lamitie avek Zeova. (Ps. 145:18, 19) Si to lobzektif se pou devlop enn kalite Kretien, reflesi kouma sa kapav amelior to lamitie avek lezot. (Kol. 3:14) Kan to fixe enn lobzektif, fer enn lalis bann rezon kifer to anvi realiz sa lobzektif-la. Lerla detanzantan, reget lalis-la. Tomáš ki nou ti mansione taler-la, dir: “Plis mo ena bann rezon pou realiz enn lobzektif, plis mo pou fer latet-lipie pou realiz li.”

7. Ki kitsoz ti ed Julio ek so madam pou realiz zot lobzektif?

⁷ Pas letan ar bann dimounn ki pou motiv twa. (Prov. 13:20) Anou gete seki ti ed Julio ek so madam pou realiz zot lobzektif pou fer plis dan predikasion. Julio dir: “Nou ti swazir bann kamarad ki ti ankouraz nou pou realiz nou lobzektif, ek nou ti koz lor nou lobzektif avek zot. Boukou parmi zot ti deza realiz sa lobzektif-la, alor zot ti donn nou bann konsey ki bien pratik. Souvan, nou bann kamarad ti demann nou kotsa nou ti arive ar nou lobzektif, ek kan nou ti bizin lankourazman, zot ti la pou nou.”

KAN NOU MANK MOTIVASION

8. Ki kapav arive si nou fer zefor pou realiz enn lobzektif zis kan nou bien motive? (Get zimaz osi.)

⁸ Selman, kitfwa ena bann zour kot nou kapav mank motivasion. Me eski savedir ki nou pa pou reisi realiz nou lobzektif? Non. Anou pran enn lexanp: Enn divan bien for kapav pous enn bato pou li ariv so destinasion. Selman, ena bann zour kot divan-la feb, ek ena bann zour kot pena divan ditou. Eski savedir ki bato-la pa kapav avanse? Non. Par exanp, ena bann bato lavwal ki ena bann moter, ek ena lezot ki ena bann ram. Sa dimounn ki dan bato la kapav servi sa bann kitsoz-la pou li avanse ek li ariv so destinasion. Nou kapav konpar nou motivasion ar divan. Parfwa, nou bien motive, parfwa nou mwin motive, ek parfwa nou pa motive ditou pou realiz nou lobzektif. Alor, si nou atann ki nou bien motive pou nou realiz nou lobzektif, kitfwa zame nou pa pou reisi. Parey kouma sa dimounn dan bato-la pou trouv bann lezot fason pou li ariv so destinasion, nou osi nou kapav realiz nou lobzektif, mem kan nou mank motivasion. Biensir, sa pa pou fasil. Me nou pou bien kontan kan nou pou reisi realiz nou lobzektif. Me avan ki nou gete seki nou kapav fer kan nou mank motivasion, anou reponn enn kestion bien inportan.

9. Eski nou bizin fer zefor pou realiz enn lobzektif spiritiel mem si nou pa anvi fer li? Explike.

⁹ Zeova anvi ki nou servi Li volonterman ek ki nou zwaye kan nou servi Li. (Ps. 100:2; 2 Kor. 9:7) Alor, eski nou bizin fer zefor pou realiz enn lobzektif spiritiel mem si nou pa anvi fer li? Anou get lexanp lapot Pol. Li ti dir: “Mo disiplinn mo lekor dan enn fason sever ek mo amenn li kouma enn esklav.” (1 Kor. 9:25-27) Mem kan lapot Pol pa ti anvi fer seki Zeova ti demann li, Pol ti obliz limem pou fer li. Eski sa ti fer Zeova plezir? Wi! Anplis, Zeova ti rekonpans Pol pou so bann zefor.​—2 Tim. 4:7, 8.

10. Ki bann bienfe nou pou gagne kan nou fer zefor pou realiz enn lobzektif mem kan nou mank motivasion?

¹⁰ Dan mem fason, Zeova kontan kan Li trouv nou fer zefor pou realiz nou lobzektif mem kan nou mank motivasion. Zeova kontan parski mem si kitfwa nou pa kontan sa lobzektif ki nou’nn fixe la, Li kone ki nou pe fer zefor pou realiz li parski nou kontan Li. Ek parey kouma Zeova ti beni lapot Pol, Li pou beni nou pou bann zefor ki nou pe fer. (Ps. 126:5) Ek kan nou trouve kouma Zeova pe beni nou, kitfwa sa pou plis motiv nou ankor. Enn ser ki apel Lucyna ek ki res Pologn dir: “Parfwa, mo pa anvi prese, sirtou kan mo fatige. Selman, lazwa ki mo gagne apre ki mo’nn sorti predikasion li extraordiner.” Aster-la, anou gete seki nou kapav fer kan nou mank motivasion.

11. Kouma Zeova kapav ed nou pou ena plis kontrol lor noumem?

¹¹ Priye pou to kapav kontrol tomem. Kan nou ena kontrol lor noumem, savedir ki nou kapav kontrol nou bann santiman ek nou bann aksion. Souvan, sa lexpresion-la vedir ki nou anpes noumem fer enn move kitsoz. Selman, nou bizin ena sa kalite-la osi pou nou kapav fer bann bon kitsoz, sirtou si sa kitsoz-la li difisil pou fer ouswa si nou mank motivasion pou fer li. Pa bliye ki, kontrol lor noumem li form parti frwi lespri sin Bondie. Alor, demann Zeova so lespri sin pou to kapav devlop sa kalite ki bien inportan la. (Lik 11:13; Gal. 5:22, 23) David, ki nou ti mansione taler-la, explike kouma lapriyer inn ed li. Li ti anvi fer so letid personel regilierman. Li dir: “Mo ti demann Zeova ed mwa pou ki mo kapav kontrol momem. Gras-a Zeova, mo’nn kapav ena enn bon program letid personel ek mo fer li regilierman.”

12. Kouma Ekleziast 11:4 kapav ed nou pou realiz nou bann lobzektif spiritiel?

¹² Pa bizin atann bon moman. Dan sa lemond-la, si nou atann enn bon moman pou fer enn kitsoz, kitfwa zame nou pa pou reisi fer li. Alor, si nou atann ki tou korek dan nou lavi pou nou fixe enn lobzektif, kitfwa zame nou pa pou reisi realiz nou lobzektif. (Lir Ekleziast 11:4.) Enn frer ki apel Dayniel dir: “Si nou atann bon moman arive, kitfwa li pa pou vinn zame. Akoz sa, fode pa nou atann. Nou bizin zis fer seki nou’nn prevwar pou fer.” Enn frer ki apel Paul ek ki res Ouganda, donn enn lot rezon kifer nou bizin pa ranvway pou plitar seki nou kapav fer zordi. Li dir: “Kan nou fer seki nou’nn prevwar pou fer, mem si nou sitiasion li difisil, nou donn Zeova lokazion pou ed nou.”​—Mal. 3:10.

13. Kifer li bon ki nou koumans par bann ti lobzektif?

¹³ Koumans par bann ti lobzektif. Nou kapav mank motivasion osi parski nou’nn fixe enn lobzektif ki difisil pou realize. Si to dan sa sitiasion-la, eski to kapav koumans par bann pli tipti lobzektif? Si to lobzektif se pou devlop enn kalite, kitfwa to kapav rod bann lokazion kot to kapav manifeste li. Si to lobzektif se pou lir Labib an-antie, kitfwa to kapav koumans par rezerv enn ti moman sak zour pou to lir Labib. Tomáš, ki nou ti mansione taler-la, ti gagn difikilte pou realiz so lobzektif pou lir Labib dan enn an. Li dir: “Mo ti konpran ki lir Labib sa vites-la ti tro difisil pou mwa. Alor, mo ti desid pou rekoumanse. Me sann fwa-la, mo’nn organiz mwa pou lir zis de-trwa verse sak zour ek pou reflesi lor la. Gras-a sa, mo’nn koumans kontan lir Labib.” Parski Tomáš ti pe koumans kontan lir Labib, li ti pas pli boukou letan pou lir li. Alafin, li’nn reisi lir Labib an-antie.c

PA DEKOURAZE SI TO SITIASION SANZE

14. Ki bann kitsoz kapav fer nou lobzektif vinn pli difisil pou realize?

¹⁴ Malerezman, mem si nou bien motive, li kapav arive ki nou dekouraze si enn sitiasion arive ek ki sa fer nou lobzektif vinn pli difisil pou realize. Par exanp, “bann sitiasion ki personn pa atann” kapav pran nou letan. Lerla, nou pena ase letan pou realiz nou lobzektif. (Ekle. 9:11) Nou kapav osi gagn enn difikilte ki dekouraz nou ek ki pran tou nou lenerzi. (Prov. 24:10) Ek akoz nou inparfe, nou kapav fer bann erer ki pou fer nou lobzektif vinn pli difisil pou realize. (Rom. 7:23) Ouswa, parfwa nou zis santi nou extra fatige. (Mat. 26:43) Ki kitsoz kapav ed nou pou fer fas ar sa bann sitiasion-la?

15. Si enn kitsoz pe anpes nou realiz nou lobzektif, eski savedir ki nou bizin bes lebra? Explike. (Psom 145:14)

¹⁵ Si enn kitsoz pe anpes twa realiz to lobzektif, sa pa vedir ki to bizin bes lebra. Labib dir ki nou kapav gagn plizir difikilte ki kapav anpes nou realiz nou lobzektif. Selman, li dir osi ki nou kapav realiz nou bann lobzektif, sirtou avek led Zeova. (Lir Psom 145:14.) Philip, ki nou ti mansione taler-la, dir: “Mo pa konsantre mwa lor kantite fwa ki mo pa’nn reisi realiz mo lobzektif. Mo konsantre mwa lor kantite fwa ki mo rekoumans fer zefor pou realiz lobzektif-la.” David, ki nou ti mansione taler-la, dir: “Kan enn kitsoz pe anpes mwa realiz mo lobzektif, mo pa konsider li kouma enn lobstak. Okontrer, mo konsider li kouma enn lokazion pou mo montre Zeova ki kantite mo kontan Li.” Wi, kan nou kontign avanse malgre bann difikilte, nou montre Zeova ki nou anvi fer Li plezir. To kapav sir ki Zeova bien kontan kan Li trouv twa pe kontign fer zefor pou realiz to lobzektif!

16. Kan enn kitsoz anpes nou realiz enn lobzektif, ki leson nou kapav tire?

¹⁶ Si enn kitsoz inn anpes twa realiz enn lobzektif, tir bann leson. Reflesi lor seki’nn anpes twa realiz to lobzektif, ek demann tomem: ‘Eski mo kapav sanz kitsoz pou ki sa pa arive ankor?’ (Prov. 27:12) Selman, nou bizin konpran osi ki, si parfwa nou pa reisi realiz enn lobzektif, kitfwa se parski li ti tro difisil pou nou. Si to dan sa sitiasion-la, reflesi lor to lobzektif, ek gete si li vremem rezonab pou twa.d To kapav sir ki Zeova zame pa pou konsider twa kouma enn lamone zete, parski to pa’nn reisi realiz enn lobzektif ki ti tro difisil pou twa.​—2 Kor. 8:12.

17. Kifer nou bizin mazinn bann progre ki nou’nn fer dan lepase?

¹⁷ Mazinn bann progre ki to’nn fer dan lepase. Labib dir ki “Bondie pa inzis pou bliye seki [nou’nn] fer.” (Ebre 6:10) Alor, fode pa to bliye twa osi! Reflesi lor seki to’nn deza fer. To’nn devlop enn lamitie avek Zeova, to’nn sorti predikasion, ek to’nn pran batem. Parey kouma to’nn fer bann progre ek to’nn realiz bann lobzektif spiritiel dan lepase, to kapav kontign progrese ek realiz lobzektif ki to’nn fixe.​—Fil. 3:16.

18. Ki kitsoz nou bizin fer kan nou pe fer zefor pou realiz enn lobzektif spiritiel? (Get zimaz osi.)

¹⁸ Avek led Zeova, to kapav realiz to bann lobzektif spiritiel. Lerla, to pou parey kouma sa dimounn ki lor bato la ek ki bien zwaye parski li’nn ariv so destinasion. Sa dimounn-la zwaye pa zis parski li’nn ariv so destinasion, me osi parski li’nn apresie sa vwayaz ki li’nn fer la. Dan mem fason, kan to pe fer zefor pou realiz to lobzektif, esey trouve kouma Zeova pe ed twa ek beni twa. Lerla, to pou zwaye. (2 Kor. 4:7) Ek si to pa bes lebra, to pou gagn bann pli gran benediksion ankor.​—Gal. 6:9.