¿Jáchisu tekipanoa ju Cuerpo Gobernante?

Aman bat síglopo, wepu grupo ayúkay, “jume apóstolim éntok anciánom Jerusalénpom” áney wanay imeʼe desiciónim bexre machítam nunüyey sïme juka congregación cristiánom yewpuárim bétana representáruaka (Hechos 15:2). Bempo juka Liosta Jióxterim tüysim at suákam a bíbichay éntok Liosta espíritu pámani emo wéweria nánancha éaka desiciónim nú bechïbo (Hechos 15:25). Ju grupo en énriapo ayúkame Cuerpo Gobernante bénasite a tetʼtia, alebénasim tekipápanoa.

Lios am jojótutua a wátiawta yä bechïbo. Jume sáylam yewpuárim jumu grupo Cuerpo Gobernante tiapo aneme juka Liosta Noki may bexre machísima a bitcha éntok may juniámtam jípure jita organizarua bechïbo éntok ju tékilta espirituáltam wetua bechïbo. Chikti semánampo émom naw totʼtoja jume sáylam sïmat joákame necesidádim bit báreka. Aman bat síglopo a jojoá bénasi, instrucciónimim mámaka Bíbliata wériaka, wanay cártam, superintendéntem viajántem éntok wate sáylam pámanim a jojoá. Júnelim Liosta puéblotam aʼania nanáncham énake bechïbo éntoket náwim tekipánoanake bechïbo (Hechos 16:4, 5). Bempo ketchi, juka espiritualméntepo ámew bëyeme listatarua, ket am animarua predicacióntam púxbaw bicha a wétuanake bechïbo éntok si wepu sayla responsabilidad bemélata a mak barëteko bempo akima susuaya.

Liosta espíritu jiaw pámani émom wéweria. Ju Cuerpo Gobernante wa sïmem bepʼpa nésaweme, Jehovata, guiámim jajaria, éntoket wa congregacionpo Koba yöweme, Jesús (1 Corintios 11:3; Efesios 5:23). Wame ama aneme kátim Liosta puéblowi emo koba yöwele. Imeʼe wate cristiánom yewpuárim bénasim ket “Kabárata [Jesústam] guojaaseme ják júne ä hueramäpo” (Revelación 14:4). Ju Cuerpo Gobernante may itom a baysawʼwe oraciónim ame bechïbo itom jówawi.

• ¿Jábesamʼme wame aman bat síglopo sïme congregaciónim susuáyame?

• ¿Jáchisu ju Cuerpo Gobernante en énriapo Liosta guiámim jajaria?