¿Jáksute tómita nunüye itom tékilta sïmat ániapo púxbaw bicha wetua bechïbo?

Chikti wasúktiapo, jume Jehovata testígom juebena Bíbliam éntok wate publicaciónimte jíjioxte éntok ka tómita áwaka atam chíchibextia; ketʼte Käri jak Jehovata testígom naw yayajäpo éntok sucursálimte jojoá éntokte atam susuaya jiba tülisim bitʼtunake bechïbo; ket juebena betelítam éntok misionéromte tómitate am mámaka jita ámew bëyewi émom jinʼnurianake bechïbo, éntoket wame jak wepu desástreta sikäpo joákame jita amew béyewi ámewte a bibitʼtua. ¿Jakun bétana yew weyʼye ju tomʼmi sïme íkay ya bechïbo?

Katʼte diézmom éntok cuótam cobrarua éntok ka tómitate aʼawa. Eláposu jumu evangelización óbrapo yun gástom ayu junʼne, katʼte géntenmew tómita aʼawa. Wepu ciento wasúktiriam bepʼpa ámaw bicha, ju revista La Atalaya yew sikakäwi itom éamta bétana nókak jachin ítapo segúromte ke Jehovata aniáwamte jípure. Ket júnel jiawa: “[itom organización] jatwey junʼne ka limósnata netanʼna éntok ka ówimʼmew aniáwamta awna”. Wanay júnelitula (Mateo 10:8).

Itom tékiltate wéwetua gente tómita ama nenénkiwamtayi. Juebena géntem bexre machísima bitcha juka itom tékilta Bíbliata bétana itom maxtiawi wanay bem nenénkiwamtayi itom aʼania púxbaw bicha a weria bechïbo. Ítapo mismo jume Testígom itom tiémpota, utʼtiaram éntok tómita ama oʼore ju Jehovata wátiamta sïmat Buiapo wetua bechïbo (1 Crónicas 29:9). Jumu Käri jak Jehovata testígom naw yayajäpo éntok jak buewru reunionta jojówapo cájam ayu wanay jabe tómita mikpiáteko ara ama a órena. Iʼi ket ara yätu itom sitio Internet jw.org pámani. Jume juebena nenénkiwame gente polóbem bétana weyʼye, jokóptula bénasim aʼane Jesusta utʼtilekäywi buéytuk apo polóbeka junʼne jumu témplopo woy ili monédam cajapo yétchak (Lucas 21:1-4). Jabe junʼne ili tómita ara eria a nenki bechïbo júnel wewëpulayka a “jiápsipo bem nenki báreka ëau nénkinake” (1 Corintios 16:2; 2 Corintios 9:7).

Witʼti juneya Jehová wame géntem jita bem jípuremak a yöre báreme jiba am aniánake ju tekʼkil a Yawra bétana jiba am aniánake bechïbo wanay júnel apo a yabarëwi yánake (Proverbios 3:9).

• ¿Jáchisu yew bibitʼtu itom religión wate religiónim bepʼpa?

• ¿Jáchisuma jojoá juka tómita ama nenénkiwame?