Salamo

98 Mihirà hira vaovao ho an’i Jehovah,+

Fa mahagaga ny zavatra nataony.+

Mahavonjy ny tanany ankavanana, eny, ny sandriny masina.+

 2 Nampahafantatra ny famonjeny i Jehovah.+

Teo imason’ireo firenena no nampiharihariany ny fahamarinany.+

 3 Tsaroany ny hatsaram-panahiny feno fitiavana sy ny tsy fivadihany tamin’ny taranak’Israely.+

Nahita ny famonjen’Andriamanitsika ny vazan-tany efatra.+

 4 Manaova horakora-pandresena ho an’i Jehovah, ry mponin’ny tany manontolo.+

Mifalia sy mihobia ary manaova hira fiderana.+

 5 Manaova hira fiderana ho an’i Jehovah amin’ny harpa,+

Eny, amin’ny harpa sy ny feon-kira.+

 6 Tsofy ny trompetra sy ny anjombona,+

Ka manaova horakora-pandresena eo anatrehan’ny Mpanjaka, dia i Jehovah.

 7 Aoka hanandra-peo ny ranomasina sy izay rehetra ao aminy,+

Ary ny tany lonaka sy izay monina eo aminy.+

 8 Aoka hitehaka ny renirano,

Ary aoka ny tendrombohitra rehetra hiara-mihoby+

 9 Eo anatrehan’i Jehovah, fa tonga hitsara ny tany izy.+

Hitsara ny tany lonaka araka ny rariny izy,+

Ary hitsara ny olona araka ny hitsiny.+