Ho an’ny mpitarika. Hiran’i Davida.
109 Ry Andriamanitra deraiko ô,+ aza mangina fotsiny,+
2 Fa manoka-bava hamelezana ahy ny ratsy fanahy sy ny mpamitaka.+
Milaza lainga momba ahy izy ireo.+
3 Nataony voahodidin’ny teny fankahalana aho,+
Ary tsy mitsahatra miady amiko tsy amin’antony izy ireo.+
4 Fanoherana foana no avaliny ny fitiavako azy,+
Fa izaho kosa mivavaka.+
5 Mamaly ratsy ny soa nataoko izy ireo,+
Ary fankahalana no avaliny ny fitiavako azy.+
6 Aoka ho olona ratsy fanahy no hotendrenao hanam-pahefana aminy,
Ary hisy mpanohitra+ anie hitsangana eo ankavanany!
7 Aoka hambara ho meloka izy rehefa hotsaraina,
Ary ho lasa fahotana ny vavaka ataony.+
8 Aoka ho vitsy andro izy,+
Ary aoka ho lasan’olon-kafa ny andraikitra notanany.+
9 Aoka ho kamboty ray ny zanany,+
Ary ho mpitondratena ny vadiny.+
10 Hirenireny tokoa anie ny zanany,+
Ary hangataka,
Ka handao ny tanànany efa aolo, mba hitady hanina!+
11 Aoka hamela-pandrika hahazoana ny fananany rehetra ny mpampanjana-bola,+
Ary horobain’olon-tsy fantatra+ ny zavatra nisasarany.+
12 Enga anie ka tsy hisy olona ho tsara fanahy aminy!+
Ary tsy hisy hiantra anie ireo zanany kamboty ray!
13 Aoka haringana ny taranany,+
Ary hofafana tsy hotadidin’ny taranaka mandimby azy ny anarany.+
14 Aoka hotsaroan’i Jehovah ny fahadisoan’ireo razany,+
Ary tsy hokosehina+ ny fahotan-dreniny.+
15 Aoka ho eo anatrehan’i Jehovah foana izany.+
Ary hofoanany tsy ho eto an-tany anie ny fahatsiarovana azy ireo!+
16 Tsy mba nahatsiaro haneho hatsaram-panahy feno fitiavana mantsy izy,+
Fa nenjehiny foana ny ory sy ny mahantra+
Ary ny kivy, mba hamonoany azy ho faty.+
17 Tia nanozona+ izy ka dia voaozona,+
Tsy faly tamin’ny fitahiana azon’ny hafa izy+
Ka dia lavitra azy koa ny fitahiana.+
18 Ozona no notafiny toy ny akanjo.+
Koa nidina tao an-kibony toy ny rano izany,+
Ary nanjary toy ny menaka tao amin’ny taolany.
19 Ho toy ny akanjo mandrakotra ny vatany anie izany,+
Ary ho toy ny fehikibo mangeja azy foana!+
20 Izany no karama omen’i Jehovah an’izay manohitra ahy+
Sy manaratsy ahy.+
21 Fa ianao kosa no Tompo Fara Tampony,+ Jehovah ô!
Tsinjovy aho noho ny anaranao.+
Vonjeo aho, fa lehibe ny hatsaram-panahinao feno fitiavana.+
22 Fa ory sy mahantra aho,+
Ary voatsindrona ny foko ato anatiko.+
23 Tsy maintsy ho lasa ihany aho, toy ny aloka madiva hanjavona.+
Ary akifika toy ny valala aho.
24 Mangozohozo ny lohaliko noho izaho mifady hanina,+
Mihamahia aho, ary tsy misy menaka ny hoditro.+
25 Lasa olona fandatsa aho amin’izy ireo.+
Mihivingivin-doha izy ireo rehefa mahita ahy.+
26 Ampio aho, ry Jehovah Andriamanitro ô!+
Vonjeo aho noho ny hatsaram-panahinao feno fitiavana.+
27 Enga anie ka ho fantany fa ny tananao no nanao izany,+
Ary ianao, Jehovah ô, no nanatanteraka izany!+
28 Aoka izy ireo hanozona,+
Fa ianao kosa hitso-drano.+
Nitsangana izy ireo, nefa aoka ho menatra.+
Fa ny mpanomponao kosa hifaly.+
29 Aoka hitafy henatra ireo manohitra ahy,+
Ary aoka handrakotra ny vatany toy ny akanjo ivelany ny fahafaham-baraka.+
30 Hankalaza fatratra an’i Jehovah ny vavako,+
Ary eo anivon’ny olona maro no hiderako azy.+
31 Fa hitsangana eo ankavanan’ny mahantra izy,+
Mba hamonjy azy amin’ireo mitsara azy.