96 Mihirà hira vaovao ho an’i Jehovah.+
Mihirà ho an’i Jehovah, ry mponin’ny tany manontolo.+
2 Mihirà ho an’i Jehovah, derao ny anarany.+
Lazao isan’andro ny vaovao tsara momba ny famonjeny.+
3 Ambarao amin’ireo firenena ny voninahiny,+
Ary amin’ny olona rehetra ny asany mahatalanjona.+
4 Fa lehibe i Jehovah,+ ka tena mendrika hoderaina tokoa.
Mendrika hatahorana kokoa noho ny andriamanitra rehetra izy.+
5 Fa andriamanitra tsy misy dikany daholo ny andriamanitry ny firenena,+
Fa i Jehovah kosa, izy no nanao ny lanitra.+
6 Haja amam-boninahitra no eo anatrehany,+
Ary hery sy hatsarana no ao amin’ny toerany masina.+
7 Ekeo fa be voninahitra sy mahery i Jehovah, ry fokom-pirenena,+
Eny, ekeo fa be voninahitra sy mahery i Jehovah.+
8 Ekeo fa mendrika ny homem-boninahitra ny anaran’i Jehovah,+
Mitondrà fanomezana ary midira ao an-tokotanin’ny tempoliny.+
9 Miankohofa eo anatrehan’i Jehovah amin’ny fitafiana masina.+
Matahora azy, ry mponin’ny tany manontolo!+
10 Lazao amin’ireo firenena hoe: “Lasa mpanjaka i Jehovah.+
Nanjary mafy orina ny tany lonaka ka tsy ho voahozongozona.+
Hitsara ny olona araka ny hitsiny izy.”+
11 Aoka hiravoravo ny lanitra, ary hifaly ny tany,+
Aoka hanandra-peo ny ranomasina sy izay rehetra ao aminy,+
12 Aoka hifaly ny saha sy izay rehetra eo aminy.+
Aoka ny hazo rehetra any an’ala hihoby+
13 Eo anatrehan’i Jehovah. Fa tonga izy,+
Eny, tonga hitsara ny tany izy.+
Hitsara ny tany lonaka araka ny rariny izy,+
Ary hitsara ny olona araka ny tsy fivadihany.+