‘Mampivelatra Kokoa ny Fomba Fijerinay Zavatra Izy Ireny’
Nidera ny zavatra vita an-tsoratry ny Vavolombelon’i Jehovah ny talen’ny sampam-pianarana teny vahiny ao amin’ny Ivon-toeram-pitantanana Karakol, any Kirghizistan, repoblika tao amin’ny Firaisana Sovietika teo aloha. Nanoratra izao manaraka izao tany amin’ny biraon’ny sampan’ny Vavolombelon’i Jehovah any Rosia izy:
“Tena manampy anay be dia be eo amin’ny fampianarana ny teny anglisy, alemà, rosianina, kirghiz, ary tiorka, ireo boky sy bokikelinareo, ao anatin’ny toe-javatra ara-tsosialy sy ara-toe-karena misafotofoto amin’izao andro izao. (...) Be dia be mihitsy no mangataka hahazo ireo bokikelinareo eo amin’ireo izay mianatra mandika teny (...). Misaotra noho ireo boky hoe La vie: comment est-elle apparue? Évolution ou création? sy Ny Tsiambaratelon’ny Fahasambaram-pianakaviana ary ny Manontany ny Tanora — Valiny Mandaitra.
“Misy mpianatra maro Vavolombelon’i Jehovah eto aminay. Liana erỳ izy ireo mamaky ireo lahatsoratry ny Mifohaza!, ary mampiasa azy ireny rehefa manao ny entimodiny.”
Nosinganin’ilay mpanoratra manokana ny Mifohaza! tamin’ny teny fiderany hoe: “Misaotra noho ireo lahatsoratra mahaliana sy mampita fahalalana. (...) Manome fanantenana anay sy mampivelatra kokoa ny fomba fijerinay zavatra amin’ny ankapobeny izy ireny. (...) Mahita fahafinaretana izahay rehetra mamaky ilay faritra hoe ‘Fijerena An’izao Tontolo Izao’ ao amin’ny Mifohaza!”
Raha tianao ny hahazo iray amin’ny Mifohaza!, na ny hisian’ny Vavolombelon’i Jehovah hitsidika anao ao an-tokantranonao mba hiara-midinika ny Baiboly aminao, dia manorata any amin’ny Fikambanan’ny Mpianatra ny Baiboly eto Madagasikara, B.P. 511, 101 Antananarivo, na any amin’ny iray amin’ireo adiresy ao amin’ny pejy faha-5.