Mifalia Amin’ny Fiainana eto An-tany Mandrakizay!
Natao pirinty ity bokikely ity mba hanampiana anao hahafantatra hoe iza no nanao ny tany sy ny zavatra rehetra eo aminy. Hianaranao fa Andriamanitra, izay nanao ny tany, dia manana anarana. Hohazavainay ato koa ny antony nanaovan’Andriamanitra ny olona sy ny fomba ahafahanao mifaly amin’ny fiainana eto an-tany mandrakizay.
Manantena izahay fa hanampy anao ireo sary maro be mba hahazo an-tsaina ireo zavatra ireo tsaratsara kokoa. Mba handraisana soa be indrindra, dia tokony hovakinao ny andinin-tenin’ny Baiboly voalaza eo anilan’ny ankamaroan’ireo sary. Amin’izay, dia ianao mihitsy no hamaky ireo zava-tsoa ampanantenain’Andriamanitra ao amin’ny Baiboly. Hovakinao ao koa izay asain’Andriamanitra ataonao mba hahazoana izany.
Mety ho tianao koa ny hampiasa ity bokikely ity mba hanampiana olon-kafa. Raha manan-janaka ianao, dia azonao ampiasaina izy ity mba hanampiana azy ireo hianatra ny amin’Andriamanitra. Raha monina any amin’ny tany misy olon-dehibe maro tsy mahay mamaky teny ianao, dia afaka mampiasa ireo sary mba hanampiana azy ireny hahatakatra ireo fikasan’Andriamanitra, ka hahafahan’izy ireo indray kosa hanampy ny mpiara-belona aminy.
Manantena amim-pahatsorana izahay fa ny fianarana azy ity dia hahatonga anao ho afaka hahazo fitahiana be dia be, sy hampiseho amin’ny hafa ny fomba hahavelomana mandrakizay eto an-tany.