Asainay Ianao

Ny Vavolombelon’i Jehovah dia manokana fotoana sy fiezahana ho amin’ny fanambarana hatraiza hatraiza ny vaovao tsaran’ny Fanjakan’Andriamanitra. Fifaliana lehibe ho azy ireo ny mahatsapa ny vokatry ny asany rehetra, dia vokatra azo noho ny fitarihan’Andriamanitra. Hitany ny olona ana hetsiny maro avy amin’ny tany rehetra sy ny toe-piainana rehetra, tafangona ao anatin’ny firaisan-tsaina tsy hita na aiza na aiza any an-toeran-kafa eo amin’izao tontolo izao. Hitany ny olona isan-karazany miala amin’ny fiainana tsy misy zava-kendrena, ny fahazaran-dratsy mampidi-doza sy ny fanaovana heloka bevava mba hananana hatramin’izao, fiainana feno fihavanana atokana amin’ny fanompoana an’Andriamanitra sy ny mpiara-belona aminy. Hitany ny hoe amin’ny fomba ahoana ny fitiavana an’Andriamanitra sy ny namana no mandrava, tsy amin’ny fomba ara-panoharana fa araka ny tena izy sy raikitra, ireo fefy ara-pirenena, ara-pirazanana sy ara-tsosialy. Tsy azo ho azy izao akory izany fitiavana izany. Vokatry ny fanahin’Andriamanitra izy io.

Irin’ny Vavolombelon’i Jehovah mafy ny hahalala ny hafa misimisy kokoa sy hahalalana azy misimisy kokoa. Antenainay fa hanampy antsika hanatanteraka izany faniriana izany ireo andalan-tsoratra ireo. Raha maniry hahazo filazana hentitra kokoa ny amin’ny zavatra inoana sy ny asan’ny Vavolombelon’i Jehovah ianao, dia aza fady manorata amin’ny Watch Tower Society na manatona ireo Vavolombelona ao amin’ny toerana onenanao.