Tena Nanam-pinoana i Abrahama!

Nampianarin’i Abrahama an’i Isaka hoe tokony ho tia an’i Jehovah izy, ary tokony hatoky an’izay rehetra ampanantenainy. Nisy zavatra sarotra be nasain’i Jehovah nataon’i Abrahama anefa, rehefa 25 taona teo ho eo i Isaka. Inona izany?

Hoy i Jehovah tamin’i Abrahama: ‘Ento ilay zanakao lahitokana, azafady, dia ataovy sorona ho an’ahy any amin’ny tendrombohitra iray any Moria.’ Tsy hain’i Abrahama hoe nahoana izy no nasaina nanao an’izany. Nankatò anefa izy.

Lasa vao maraina nankany Moria i Abrahama ny ampitson’iny, ary nentiny i Isaka sy ny mpiasany anankiroa. Tazan-dry zareo teny lavidavitra teny ny tendrombohitr’i Moria, rehefa afaka telo andro. Dia nasain’i Abrahama niandry teo ny mpiasany, fa izy mianaka, hono, handeha hanao fanatitra. Nampitondrain’i Abrahama kitay i Isaka, dia izy nitondra antsibe. Hoy i Isaka avy eo: ‘Fa aiza ry Dada ilay biby hataontsika fanatitra?’ Dia hoy i Abrahama: ‘Ao fa i Jehovah, anaka, no hanome an’ilay izy.’

Nanamboatra alitara ry zareo rehefa tonga teny amin’ilay tendrombohitra. Nafatotr’i Abrahama avy eo ny tanan’i Isaka sy ny tongony, ary nataony teo ambonin’ilay alitara izy.

Noraisin’i Abrahama ilay antsibe, dia iny izy fa andeha hamono an’i Isaka. Tamin’izay mihitsy no nisy anjely niteny avy any an-danitra hoe: ‘Abrahama, aza vonoina izy! Fantatro izao hoe tena mino an’Andriamanitra ianao, satria ianao vonona hanao sorona ny zanakao.’ Nahita ondrilahy teo akaiky teo i Abrahama avy eo. Voasaringotry ny kirihitra ny tandrok’ilay izy. Novahany haingana àry i Isaka, dia ilay ondry indray no nataony sorona.

Nanomboka tamin’izay, dia nantsoin’i Jehovah hoe namany i Abrahama. Fa maninona? Satria nataony daholo izay rehetra notenenin’i Jehovah, na dia rehefa tsy azony aza hoe maninona izy no nasaina nanao an’ilay izy.

Nampanantena an’i Abrahama indray i Jehovah hoe: ‘Hotahiko ianao, dia hataoko be dia be ny taranakao.’ Te hilaza i Jehovah tamin’izay hoe hanao zavatra tsara be ho an’ny olona tsara fanahy rehetra izy, dia ny taranak’i Abrahama no hampiasainy mba hahatanteraka an’izany.