Nanasitrana Tamin’ny Sabata i Jesosy

Tsy tia maizina an’i Jesosy ny Fariseo, dia nitady antony azo isamborana azy. Tsy tokony hanasitrana marary, hono, i Jesosy rehefa Sabata. Nahita lehilahy jamba nangataka teny an-dalana anefa i Jesosy indray Sabata izay. Dia hoy i Jesosy tamin’ny mpianany: ‘Jereo fa ho sitrana izao io lehilahy io noho ny herin’Andriamanitra.’ Nandrora i Jesosy dia nafangarony tamin’ny vovoka ilay izy, dia iny no nataony teo amin’ny mason’ilay lehilahy. Hoy i Jesosy avy eo: ‘Mandehana sasao any amin’ny dobon’i Siloama ny masonao.’ Dia nataon’ilay lehilahy izany ka lasa nahita izy. Sambany izy vao nahita!

Gaga be ny olona! Dia hoy ry zareo: ‘Tsy io ve ilay mpangataka iny, sa olona mitovy aminy fotsiny io?’ Hoy ilay lehilahy: ‘Ie, izaho iny! Ilay jamba hatramin’ny vao teraka!’ Dia hoy ny olona: ‘Fa maninona ianao no lasa mahita?’ Notantarainy an-dry zareo izay nitranga, ka nentin-dry zareo tany amin’ny Fariseo izy.

Dia hoy ilay lehilahy tamin’ny Fariseo: ‘Nasian’i Jesosy zavatra ny masoko dia nasainy nosasako ilay izy, dia izao aho mahita.’ Hoy ny Fariseo: ‘Sabata ve ny andro dia manasitrana i Jesosy? Tena tsy avy amin’Andriamanitra ny hery nanaovany an’izany.’ Nisy niteny anefa hoe: ‘Izy ve dia ho nahavita an’izany raha tsy Andriamanitra no nanome hery azy?’

Nantsoin’ny Fariseo ny ray aman-drenin’ilay lehilahy dia nanontaniany hoe: ‘Fa ahoana no lasa mahita ny zanakareo?’ Natahotra be ry zareo satria efa niteny ny Fariseo hoe izay olona mino an’i Jesosy, dia horoahina hiala ao amin’ny synagoga. Dia hoy ry zareo: ‘Tsy hainay fa anontanio an’azy e!’ Mbola nanontany an’ilay lehilahy foana ny Fariseo, raha tsy rehefa niteny izy hoe: ‘Efa izay noteneniko izay daholo. Fa maninona ianareo no mbola manontany foana?’ Tezitra be ny Fariseo ka nandroaka azy.

Nandeha nankany amin’ilay lehilahy i Jesosy, ary nanontany azy hoe: ‘Mino ny Mesia ve ianao?’ Dia hoy izy: ‘Ie, raha ohatra ka fantatro izy.’ Hoy i Jesosy: ‘Izaho no Mesia.’ Tena tsara fanahy i Jesosy e? Sady nanasitrana an’ilay lehilahy izy no nanampy azy hanana finoana.