Velona ny Tenin’Andriamanitra

Inona no hataon’ny Fanjakan’Andriamanitra?

TAO amin’ny Toriteniny malaza teo an-tendrombohitra i Jesosy dia nampianatra an’ireo mpianany ilay vavaka antsoina mandrakariva hoe ny “Rainay Izay any an-danitra”. Angamba ianao koa mba efa nitanisa azy io imbetsaka toy ny nataon’ny olona an’arivo tapitrisany maro tamin’ny fivavahana tamin’Andriamanitra amin’izao teny izao: “Ho tonga anie ny fanjakanao.” (Matio 6:10). Kanefa rehefa mamisavisa izany fangatahana izany ianao, moa ve fantatrao marina izay angatahinao?

Angamba mety ho nanonona ireo teny ireo tsy tamim-pieritreretana loatra izay heviny ianao, toy ny ankamaroan’ireo olona miara-belona aminao. Kanefa, noho ny Fanjakan’Andriamanitra tena fitondram-panjakana iray misy tokoa, hanao ahoana ny ho fiafaran’ireo fitondram-panjakana misy ankehitriny rehefa ho tonga izy? Efa nametraka izany fanontaniana izany tamin’ny tenanao ve ianao?

Noho ny antony maro samihafa, ny Baiboly dia tsy mamela antsika ho amin’ny fisalasalana raha ny momba io foto-kevitra io. Ao amin’ny faminaniana iray izay manipika ny fotoana misy antsika, dia toy izao no lazainy: “Ary amin’ny andron’ireo mpanjaka ireo, Andriamanitry ny lanitra dia hanorina fanjakana [Ny Fanjakan’Andriamanitra, ilay angatahin’ny kristiana iny mihitsy] izay tsy ho rava mandrakizay (...). Fa ireo fanjakana rehetra ireo [ireo fitondram-panjakan’izao tontolo izao ankehitriny] dia hotorotoroiny sy holevoniny, fa izy kosa hitoetra mandrakizay.”​—Daniela 2:44.

Hevero fa ny Fanjakan’Andriamanitra dia handrava ny fitondram-panjakana rehetra izay mitondra izao tontolo izao ankehitriny. Ary rehefa miteny ianao hoe: “Ho tonga anie ny fanjakanao”! raha ny marina dia mivavaka mba hahatanteraka izany fikorontanana izany ianao. Ary tsara ny ataonao satria ilaina izany fiovana izany. Teo amin’ny tantara tokoa dia tsy mbola nisy na oviana na oviana fitondram-panjakan’olombelona niharihary ho tena nahafa-po tanteraka. Koa inona indray àry no irintsika kokoa mihoatra noho ny fahitana an’Andriamanitra manolo ny fitondram-panjakan’olombelona rehetra amin’ny fitondram-panjakana tanteraka iray?

Koa satria Jehovah dia tsitoha, ny Fanjakany dia hanatanteraka ny fanirian’ireo rehetra tia ny fahamarinana. Raha ny aminy, dia toy izao no lazain’ny Baiboly: “Ary hihatra amin’ny taranaka fara mandimby ny fanapahanao.” Nanampy toy izao koa izy: “Manokatra ny tànanao Hianao ka mahavoky soa ny zava-miaina rehetra.” (Salamo 145:13, 16). Raha ny marina, inona no fanirianao? Irinao ve ny hahita ny fanjavonan’ny ady, ny mosary, ny fanaovana ny tsy rariny, ny trano tsizarizary, ny heloka bevava, ny aretina sy ny fahafatesana koa aza? Ireo zava-manahirana rehetra ireo sy ny maro hafa koa dia ho voalamin’ny Fanjakan’Andriamanitra.

Mampanantena ny Baiboly fa “ho be ny fiadanana mandra-paha-tsy hisy volana intsony.” “Fa ny ratsy fanahy kosa, hoy koa ny nambarany, hofongorana amin’ny tany.” Amin’izany ny olombelona dia “hanao trano ka hitoetra ao”. “Andriamanitra no hitoetra eo aminy, dia ho Andriamaniny. Ary hofafany ny ranomaso rehetra amin’ny masony; ary tsy hisy fahafatesana intsony”.​—Salamo 72:7, 8; Ohabolana 2:22; Isaia 55:21-23; Apokalypsy 21:3, 4.

Endrey izany fifaliana tsinjon’ny fianakavian’olombelona! Ho tianao ve ny ho anankiray amin’ireo vahoakan’ny Fanjakan’Andriamanitra? Raha eny, dia mianara ho tonga toy izany amin’ny fianarana ny Tenin’Andriamanitra sy amin’ny fampiharana azy eo amin’ny fiainanao​—Jaona 17:3.

[Sary, pejy 8, 9]

Handrava izao fandehan-javatra izao izy . . .

. . . mba hanorenana vaovao hafa iray.