Fahalehibeazana sy fankasitrahana
Taorian’ny namakiana tao amin’ny Ny Tilikambo Fiambenana tamin’ny 1 septambra 1987, ny lahatsoratra mifampitohitohy mitondra ny lohateny hoe: “Ireo olona be taona: iza no tokony hikarakara azy ireny?” ny vehivavy japone 79 taona iray, dia nanoratra izao taratasy izao taminay:
Ho an’ireo anadahy izay manana ny fitiavako manontolo,
Ireo lahatsoratra tamin’ny 1 septambra 1987 momba ireo olona be taona dia mampiseho fahatakarana ny mahazo ny hafa sy hatsarana fatratra. Rehefa nianatra ny anankiray tamin’izany aho ka tonga teo amin’ny fehintsoratra faha-11, dia voatery natsahatro izany mba hakana mosoara: tsy haiko notazonina ny ranomasoko. Tsy tanako ny fankasitrahako lalina. Fitiavana sy hatsaram-po re izany! Tsy haiko ny tsy hidera an’i Jah, toy ny ao amin’ny Salamo faha-150. Ambarako aminareo amim-panetren-tena koa ny fankasitrahako rehetra noho ireny lahatsoratra, feno fiheverana ireny, izay ampianaranareo ny fanehoana hatsaram-po amin’ireo olona be taona hatramin’ny tsipiriany madinika indrindra. Marina fa ny foto-kevitra tsara hafa rehetra izay avoakanareo tsy tapaka dia maha-velom-pankasitrahana ahy daholo ka tsy haiko lazaina tanteraka amin’ny teny. Mbola misaotra ihany.
Ao amin’ny kongregasiona dia feno fiheverana sy malemy fanahy ny rehetra, ka mahafinaritra loatra izany. Raisina amin’ny fiara aho rehefa hitory sady entina miverina, ary noho ny fanohanan’ny rehetra dia mpitory maharitra mpanampy aho. Velom-pankasitrahana fatratra aho, isan’andro lasa, eo ambany fiarovan’ny fandaminana iray tena tsara toy izany.
Eo amin’izao tontolo izao ankehitriny, izay ahitana olona be taona mihabetsaka nefa tsy tiana, dia tsy misy zava-tsarobidy kokoa noho ny fitahian’Andriamanitra be fitiavana. Mivavaka aho mba ho afaka hanampy olona faran’izay betsaka hahafantatra ny fahamarinana mba hifaliany miaraka amintsika.
Midera an’i Jehovah aho ary misaotra anareo, ranadahy malala. Mamelà ahy noho ny soratro ratsy dia ratsy izay mahamenatra ahy. Enga anie i Jehovah hitahy sy hanome fahasalamana tsara ho anareo!
Avy amin’ny vehivavy be taona iray tsinontsinona,
[sonia:] Nogami.
Tsy azo lavina fa ny tena fitiavana kristiana dia tsy mahalala sisin-tany na fetran’ny taona. Ny Vavolombelon’i Jehovah, tanora sy antitra, dia miseho ho mpianatra amin’ny fananana fiainana mifanaraka amin’ity fanambaran’i Jesosy ity: “Izao no hahafantaran’ny olona rehetra fa mpianatro hianareo, raha mifankatia.” — Jaona 13:35.