Tsy mitaky ny hanaovana sorona ny zanaka Andriamanitra
TANY ivelan’ny mandan’i Jerosalema fahiny dia nisy toerana nantsoina hoe Tofeta. Tany, dia nisy Isiraelita nivadi-pinoana, anisan’izany Ahaza sy Manase, nanana fahazarana naharikoriko nanao sorona zaza. Tamin’ny farany, Josia, mpanjaka nahatoky, dia nampitsahatra io fanao io tamin’ny fanaovana an’i Tofeta ho tsy azo nankalazana fombafomba ara-pivavahana intsony. — 2 Mpanjaka 23:10; 2 Tantara 28:1-4; 33:1, 6.
Nahoana no natao hoe Tofeta ny anarany? Iadian-kevitra ny amin’ny fiandohan’ilay anarana, nefa azo atao ny manamarika amim-pahalianana ny tenin’ilay mpivaofy teny atao hoe David Kimhi (teo amin’ny 1160 ka hatreo amin’ny 1235 eo ho eo) ny amin’io toerana io. Tao amin’ny famoaboasan-kevitra iray momba ny 2 Mpanjaka 23:10, ahitana ny anarana hoe Tofeta, dia izao no nosoratany: “Anaran’ny toerana nampandalovany ny zanany [tamin’ny afo] ho an’i Moloka. Nantsoina hoe Tofeta io toerana io satria, araka ny nolazaina, ny fombafomba dia nahitana dihy niaraka tamin’ny feon’ny ampongatapaka [hebreo touppim], izay nanarona ny kiakiakan’ny ankizy nalefa tao amin’ny afo, mba tsy handrenesan’ny rainy azy ary mba tsy hakany azy indray noho ny fahatairany. Tofeta dia lohasaha iray an’olona natao hoe Hinoma, ka nantsoina hoe ‘Lohasahan’i Hinoma’ na ‘Lohasahan’ny zanak’i Hinoma’ izy io. (...) Nolotoin’i Josia io toerana io ka nataony toerana tsy madio nanariana ireo faty sy izao karazana fakofako rehetra izao, mba tsy hiverina ao an-tsain’ny lehilahy iray mihitsy ny hoe hampandalo ny zanany lahy sy ny zanany vavy amin’ny afo ho an’i Moloka.”
Amin’izao androntsika izao, ilay andriamanitra atao hoe Moloka dia zava-mahaliana ara-tantara fotsiny ary tsy isalasalana mihitsy fa sarotra tamin’ny maro ny nahatakatra hoe nahoana no nisy olona afaka namono ny zanany ho azy io. Amin’izao andro izao anefa dia toa mbola misy olon-dehibe vonona ny hamono ireo zanany rehefa heveriny ho mety izany. Ny taonjato diavintsika dia nahita tanora an-tapitrisany maro natao sorona teo amin’ny alitaran’ny ady. Isan-taona, dia iniana alaina ny ain-jaza mbola tsy teraka tsy tambo isaina, ka ho an’ny maro be, dia satria izy ireny vokatry ny firaisan’ny lahy sy ny vavy tsy ara-dalàna na satria ny fahatongavany hanakantsakana ny fahazaran’ireo ray aman-dreniny. Araka izany, ireny ankizy ireny dia atao sorona ho an’ireo andriamanitry ny fahalalahana eo amin’ny lahy sy ny vavy sy ny fitiavana fatratra ny zavatra hita maso.
Nolazain’i Jehovah ho zavatra maharikoriko ny fanolorana zanaka ao amin’ny afo ho an’i Moloka (Jeremia 7:31). Hafa noho izany ve no fiheverany ny finiavana hamono hahafaty ankizy amin’izao taranaka misy antsika izao?
[Sary, pejy 31]
Fanaovana sorona ankizy ho an’i Moloka andriamani-tsy izy, araka ny nampisehoan’ny “Photo-Drame de la création” azy, 75 taona lasa izay.
Ny lohasahan’i Hinoma amin’izao andro izao, miatsinanana.