Ireo Fandikan-tenin’ny Baiboly Afrikana

Ireo fandikan-tenin’ny Baiboly iray manontolo voalohany indrindra tamin’ny fiteny afrikana dia natao tany Egypta. Fantatra tamin’ny anarana hoe fandikan-teny coptes izy ireo ary ninoana fa efa hatrany amin’ny taonjato fahatelo na fahefatra am.f.i. Taonjato telo teo ho eo tatỳ aoriana, dia nadika tamin’ny fiteny etiopiana ny Baiboly.

Ireo fiteny tsy nosoratana an-jatony maro tany atsimon’i Etiopia sy i Sahara, dia voatery niandry ny fahatongavan’ireo misionera tamin’ny taonjato faha-19. Tamin’ny 1857, dia vita ny dingana lehibe iray rehefa nahavita ny fandikan-tenin’ny Baiboly iray tamin’ny fiteny Tswana, fiteny any amin’ny faritra atsimon’i Afrika, i Robert Moffat. Notsinjarainy ho maromaro ny fanaovana pirinty azy io tamin’ny fanontam-pirinty nalefa tanana. Io no Baiboly manontolo voalohany natao pirinty tatsy Afrika ary izy io koa no fandikan-teny feno voalohany tamin’ny fiteny afrikana tsy nosoratana taloha. Mahaliana fa nampiasa ny anaran’Andriamanitra hoe Yehova tao amin’ny fandikan-teny nataony i Moffat. Tao amin’ilay fandikan-teny tamin’ny 1872 navoakan’ny British and Foreign Bible Society, ny anarana hoe Yehova dia nampiasaina tao amin’ireo filazana fototra nataon’i Jesosy araka izay voasoratra ao amin’ny Matio 4:10 sy Marka 12:29, 30.

Hatreo amin’ny 1990, ny Baiboly iray manontolo dia voadika amin’ny fiteny afrikana 119, ary misy tapatapany aminy voadika amin’ny fiteny 434 fanampiny.