Mety Hisy Heviny ho Anao ve Io Sakafo Io?

NAMENO ny tany tamin’ny hazavana malefaka ny volam-penomanana. Tao amin’ny efitrano ambony rihan’ny fonenana iray tao Jerosalema fahiny, dia nisy lehilahy 12 tafangona nanodidina latabatra. Nihaino tsara ny 11 lahy raha teo am-pampidirana fankalazana iray faran’izay lehibe ny Mpampianatra azy ireo ka niteny zavatra nisy heviny lehibe. Hoy ny fitantarana iray:

“Nandray mofo Jesosy [Kristy], ka nony efa nisaotra Izy, dia novakiny ka natolony ny mpianatra, ary hoy Izy: Raiso, hano, ity no tenako. Ary nandray kapoaka Izy, ka nony efa nisaotra, dia natolony azy ka nataony hoe: Sotroinareo rehetra ity; fa ity no rako, dia ny amin’ny fanekena, izay alatsaka ho an’ny maro ho famelan-keloka. Ary lazaiko aminareo fa hatramin’izao dia tsy mba hisotro itony vokatry ny voaloboka, itony intsony Aho mandra-pihavin’ny andro hiarahako misotro izay vaovao aminareo any amin’ny fanjakan’ny Raiko. Ary rehefa nihira fiderana izy, dia lasa nankany amin’ny tendrombohitra Oliva”. — Matio 26:26-30.

Nitranga izany taorian’ny filentehan’ny masoandro, ny andro faha-14 tamin’ny volana jiosy, Nisana, tamin’ny taona 33 amin’ny Fanisan-taona Iraisana. Vao avy nankalaza ny Paska ho fahatsiarovana ny fanafahana ny Isiraely tamin’ny fanandevozana tany Egypta tamin’ny taonjato faha-16 al.f.i. i Jesosy sy ny apostoliny. Nandroaka an’i Jodasy Isikariota izay nadiva hamadika azy i Kristy. Noho izany, dia i Jesosy sy ireo apostoliny nahatoky 11 ihany sisa no teo.

Tsy fitohizan’ilay Paska jiosy akory io sakafo hariva io. Zava-baovao izay nanjary nantsoina hoe Sakafo Harivan’ny Tompo izy io. Mikasika io fankalazana io, dia nandidy toy izao ireo mpanara-dia azy i Jesosy: “Aza mitsahatra manao izao ho fahatsiarovana ahy”. (Lioka 22:19, 20, NW; 1 Korintiana 11:24-26). Nahoana no nilaza izany izy? Ary ahoana no ahafahan’io zava-nitranga efa taonjato maro lasa izay io hisy heviny ho anao?