“Mbola Tsy Nahita Zavatra Tahaka Izao Mihitsy Aho!”

TAMIN’NY 1993, ny biraon’ny sampan’ny Fikambanana Watch Tower any Arzantina dia nasaina mba handefa solontena arivo hankany Santiago, any Silia, mba hanatrika ny Fivoriamben’ny Distrikan’ny Vavolombelon’i Jehovah “Fampianarana Araka An’Andriamanitra” naharitra efatra andro. Sambany tamin’izay ireo Vavolombelona arzantinina vao nasaina hanao dia lavitra tamin’ny naha-antokon’olona maro hankany amin’ny fivoriambe iray any ivelan’ny taniny.a Nanao ahoana ny valiny? Fangatahana maherin’ny 8 500 no tonga tsy an-kiato, ka solontena 1 039 no nofidina avy tamin’izy ireo.

Aotobisy 14 tamin’ny fitambarany no nohofana manokana mba hanao io dia lavitra 1 400 kilaometatra io avy tany Buenos Aires ka hatrany Santiago. Noravahan’ny fahitana toerana taza-maso mahafinaritra ilay dia naharitra 26 ora. Tamin’ny fiampitana ireo Tendrombohitra Andes, ireo solontena dia nandalo teny akaikin’i Aconcagua, tany amin’ny 6 960 metatra, izay tendrombohitra avo indrindra any amin’ny Ila Bolan-tany Andrefana. Tsy hay hohadinoina indrindra ny fidinana mitsontsorika be sady miolakolaka eo am-pidirana an’i Silia. Nahazo tehaka nirefodrefotra naharitra ireo mpitondra aotobisy noho ny fahaizan’izy ireo nitondra teo amin’ilay toerana sarotra!

Ny zavatra hitan’ny maso kanto indrindra anefa dia ho hita tany amin’ilay fivoriambe mihitsy. Eo amin’ny tontolo iray feno fifandrafiam-pirenena sy fihenjanana ara-pirazanana, dia namelombelona toy inona moa ny fahitana vahoaka maro tafaray niisa 80 000 avy tany amin’ny tany 24 tonga nanatrika teo — fianakavian’ny mpirahalahy iraisam-pirenena marina tokoa! Tamin’ny fahitana nivantana ny firaisan-tsaina teo amin’ireo mpanatrika ilay fivoriambe, ny sasany tamin’ireo mpitondra aotobisy dia nampiseho fahalianana ny hianatra bebe kokoa momba ny Vavolombelon’i Jehovah. “Mbola tsy nahita zavatra tahaka izao mihitsy aho!”, hoy ny fihiakan’ny iray tamin’izy ireny.

[Fanamarihana ambany pejy]