Fahatanterahan’ny Faminanian’ny Baiboly Iray

ARANTIRANTY ao amin’ny Imperial War Museum ao Londres, Angletera, ny famantaranandro iray tsy manam-paharoa sy ny kaontera elektronika iray mampiseho isa. Arakaraka ny ihodinan’ilay famantaranandro dia mipiapiaka ilay kaontera isaky ny 3,31 segondra. Isaky ny piapiaka tsirairay, ny isa hafa iray dia manampy ny tontalibe. Ny piapiaka tsirairay, ny isa tsirairay, dia mampiseho lehilahy na vehivavy iray na ankizy iray maty vokatry ny ady mandritra itỳ taonjato itỳ.

Tamin’ny Jona 1989 no nanomboka ny fanambaran’ilay kaontera isa ary antenaina ny hahavitany ny fanambaran’isa amin’ny misasak’alina mialoha ny taona 2000. Amin’izay, ny tarehimarika eo amin’ilay kaontera dia hanondro zato tapitrisa — ny isan’ireo olona maty voatombantombana mifandray amin’ny ady mandritra ny taonjato faha-20 manontolo.

Efa ho 2 000 taona lasa izay, i Jesosy Kristy dia nanambara mialoha fotoana izay ho voamariky ny ‘firenena hitsangana hamely firenena sy fanjakana hitsangana hamely fanjakana’. Mifanaraka amin’izany, dia efa hatramin’ny ela ny Vavolombelon’i Jehovah no mitory fa ireo ady nandrava tamin’izao taonjato izao, miaraka amin’ireo horohoron-tany, areti-mandringana, mosary be dia be sy ireo fitrangan-javatra hafa dia manome porofo amin’ny fitambarany fa miaina amin’ny “andro farany” isika — ilay fe-potoana nanaraka ny nametrahana an’i Kristy tamin’ny toerany tamin’ny naha-Mpanjaka tany an-danitra, tamin’ny taona 1914. — Lioka 21:10, 11; 2 Timoty 3:1, NW.

Amin’ny fampiasana ny Baiboly ho fahefany, dia ambaran’ny Ny Tilikambo Fiambenana ny vaovao tsara ny amin’ny handringanan’ny Fanjakan’Andriamanitra tsy ho ela ireo mpampahory, ka hanovany ny tany ho paradisa. Ary inona no hitranga momba ny ady? Milaza toy izao ny Baiboly: “Avia, jereo ny asan’i Jehovah, Izay mahatonga faharavana etỳ an-tany. Mampitsahatra ady hatramin’ny faran’ny tany Izy; manapaka ny tsipìka sy manito ny lefona Izy ary mandoro ny sariety amin’ny afo.” — Salamo 46:8, 9.

[Sary nahazoan-dalana, pejy 32]

Famantaranandro: By Courtesy of the Imperial War Museum