Fanoherana Ireo Fiampangana Diso Tany Frantsa
VAO haingana izay dia lasibatry ny fiampangana diso maro ny Vavolombelon’i Jehovah tany Frantsa. Nanararaotra ireo zava-niseho nahatsiravina nahavoarohirohy antokom-pinoana madinika tany Eoropa sy tany Japon ireo fampitam-baovao, ka nanely filazana naolana momba ny Vavolombelona. Naseho tamin’ny fomba tsy marina ho iray amin’ireo antokom-pinoana madinika anisan’ny lehibe sady mampidi-doza indrindra izy ireo.
Tamin’ny ezaka natao mba hanitsiana ny tarehin-javatra, ny Vavolombelon’i Jehovah dia namoaka taratasy mivalona iray izay namaly fanontaniana toy ny hoe: Iza moa ireo Vavolombelon’i Jehovah? Kristiana ve izy ireo? Manaiky fikarakarana ara-pitsaboana ve izy ireo? Nahoana izy ireo no mandeha isam-baravarana? Amin’ny fomba ahoana no iantohana ara-bola ny asany? Amin’ny ahoana no mahasoa ny fiaraha-monina ny Vavolombelon’i Jehovah?
Ilay taratasy mivalona manome fanazavana amin’ny teny frantsay dia nampitondraina ny lohateny hoe Les Témoins de Jéhovah — Ce que vous devez savoir. Mba hametrahana ilay taratasy mivalona amin’olona maro araka izay azo atao, dia nalamina ny ezaka manokana mba hampielezana azy io. Nanomboka tamin’ny 13 May ka hatramin’ny 9 Jona 1996, dia maherin’ny sivy tapitrisa no voazara.
Nanohina olona maro ilay taratasy mivalona, anisan’izany ireo manam-pahefana ara-panjakana. “Nahatezitra ahy ny fanakianana natao tamin’ny Vavolombelon’i Jehovah”, hoy ny nosoratan’ny mpanolo-tsaim-paritra iray rehefa avy namaky ilay taratasy mivalona izy. “Imbetsaka aho no afaka nankasitraka ny fitiavana sy ny fanaovan-tsoa ho an’ny mpiara-belona eo amin’ny asanareo.” Nanoratra toy izao ny mpikambana iray ao amin’ny Parlemanta Eoropeana ho valin’ilay taratasy mivalona: “Hain’ny ankamaroan’ny olona tsara ny milaza ny fahasamihafana eo amin’ilay antokona Kristiana misy anareo sy ireo antokom-pinoana madinika.”
Tany Bretagne, ny Vavolombelona iray dia nanolotra ilay taratasy mivalona tamin’ny mompera iray, izay tsy nisalasala nandray azy io. “Midera anareo aho noho izay ataonareo”, hoy ilay pretra. Nanampy teny toy izao izy avy eo: “Mampirisika ireo ao amin’ny paroasiko aho mba hamela anareo hiditra any an-tranony ka handroso kafe ho anareo. Azonareo lazaina amin’ireo izay mihaona aminareo mihitsy aza fa efa tatỳ an-tranoko ianareo. Tiako koa ny milaza aminareo fa mankasitraka ny famakiana ireo zavatra vita an-tsoratra avoakanareo aho.”
Taorian’ny nahazoany ilay taratasy mivalona dia nanoratra toy izao tany amin’ny Fikambanana Watch Tower ny lehilahy iray protestanta any Alsace, ka nangataka fampianarana Baiboly. “Namoy tanteraka ny fatokiana ny fiangonako aho”, hoy ny nosoratany, “ka miandrandra fiaingana vaovao amin’ny lafiny ara-panahy.” Na dia eo aza ireo fiampangana diso atao indraindray amin’izy ireo, ny Vavolombelon’i Jehovah any Frantsa — raha ny marina, any amin’ny faritra rehetra maneran-tany — dia manohy manampy ny olona ho tonga amin’ny fahalalana araka ny marina ireo fikasan’Andriamanitra, araka izay hazavaina tsara ao amin’ny Baiboly. — 2 Timoty 3:16, 17.