Niorina Mafy Izy Ireo tao Anatin’ny Fanenjehana Nazia
NIFANOHITRA ohatra ny atsimo sy ny avaratra ny tsy fivadihana tsy nisy tahotra nasehon’ny Vavolombelon’i Jehovah tany Alemaina Nazia sy ny toerana notanan’ireo fiangonana ao amin’ny Tontolon’ireo Fivavahana Lazaina fa Kristiana. Izany no nomarihin’i John Weiss, profesora momba ny tantara, tao amin’ilay bokiny hoe Ideology of Death. Hoy ny nosoratany:
“Tamin’ny 1934, ny fiangonana evanjelika dia nanantitrantitra fa tsy maintsy ‘raisin’ny Fiangonana Loterana an-tanan-droa’ ny Nazia, ary nisaotra ‘ny Tompo Andriamanitra’ ny fiangonana evanjelika noho ny nanomezany ‘mpanapaka fara tampony tia fivavahana sy azo itokiana’, ho an’ny Alemà. (...) Nanoratra toy izao ho an’ny klerjiny ny mpitondra fivavahana protestanta iray: ‘Nirahin’Andriamanitra ho atỳ amintsika [i Hitler].’ ” Nanohy ny teniny toy izao i Weiss: “Ny fiangonana metodista alemà (...) dia niombon-kevitra tamin’ny Eveka Dibelius fa namonjy an’i Alemaina tamin’ny revolisiona bôlsevika efa nanantomotra i Hitler, ka nitondra fiadanana sy filaminana. (...) Nampahafantatra ny mpikambana tao aminy ny fiangonana mormon fa fandikana ny lalàna mormon ny fanoherana an’i Hitler.” Ary nanampy teny toy izao izy: “Nilazana ny Katolika hoe adidy masina ny mankatò ilay fanjakana vaovao, adidy izay tsy nesorina mihitsy na dia taorian’ny nahafantaran’ny klerjy ireo zava-nampihoron-koditra izaitsizy tany atsinanana aza.”
Fa ahoana kosa ny amin’ny Vavolombelon’i Jehovah? Nohazavain’ny Profesora Weiss fa “tamin’ny naha-antokon’olona azy, dia ny Vavolombelon’i Jehovah ihany no nanohitra ny Nazia”. Nisy an’arivony maro tamin’izy ireo naiditra am-ponja, hoy ny Profesora Weiss nanohy ny teniny, “kanefa izay rehetra nety ho Vavolombelona nalefa tany amin’ny toby fitanana dia ho azo nafahana raha nanao sonia fotsiny taratasy natao handavany ny finoany”.
Momba ny tsy fivadihan’ny Vavolombelon’i Jehovah, dia nanazava toy izao ny Profesora Weiss: “Ny ohatr’izy ireo dia manazava tsara ilay hery tsy nety nilefitra sy feno herim-po tsy nanan-tsahala nananan’ny Kristianisma tany am-boalohany, talohan’ny nijoroany ho fikambanana sy ny nitsofohany ho isan’ny fiaraha-monina ka nanotofan’izany an’ilay faniriana hanana fiainana tsy nisy fanekena lembenana. Araka ny nosoratan’ny pastora protestanta iray momba azy ireo, dia ‘tsy ireo fiangonana lehibe, fa ireo olona nendrikendrehina sy novingavingaina ireo no olona nijoro voalohany hanohitra ny faharomotan’ny demonia nazia, ary sahy nanao fanoherana araka ny finoany’.”