Maninona Raha mba Miaraka Amin’izy Ireo?

I NDJAUKUA ULIMBA dia 73 taona, ary tamin’ny herintaona, dia nanao dia lavitra misy 450 kilaometatra eo ho eo izy. Nandehanany an-tongotra io halavirana io manontolo, ary 16 andro no nanaovany azy.

Io lehilahy zokiolona io dia nanao io dia lavitra io, mba hanatrehana ny iray amin’ireo fivoriamben’ny Vavolombelon’i Jehovah, fanao isan-taona. Taorian’ilay fivoriambe, dia faly be izy, nohatanjahina teo amin’ny ara-panahy, ary nandeha nody indray — 16 andro hafa. Mendrika ny nanaovana azy ve ilay ezaka? Eny tokoa! Nanao io dia lavitra io efa hatramin’ny taona vitsivitsy i Ndjaukua Ulimba.

Io lehilahy afrikana io dia iray amin’ireo olona maherin’ny 15 tapitrisa, avy amin’ny tany maherin’ny 230, nanatrika ny fivoriamben’ny Vavolombelon’i Jehovah, tamin’ny herintaona. Mazava ho azy, fa tsy voatery nandeha an-tongotra nandritra ny andro maromaro ny ankamaroan’izy ireo mba hankanesana tany amin’ny toerana nanaovana fivoriambe. Ny maro taminy dia nandeha fiara, na aotobisy, na fiarandalamby, na fiaramanidina. Iray tamin’izy ireo ve ianao?

Amin’ny 1998, dia hisy fivoriambe indray hatao maneran-tany, ka ny ankamaroany dia hatao mandritra ny main-tany. Raha mamela azy ny fahasalamany, dia azo inoana fa hanao ilay dia an-tongotra lavitra indray i Ndjaukua Ulimba, mba hanatrehana azy io. Izy sy ny olona an-tapitrisany maro hafa, dia handre fandaharana azo ampiharina sy manatanjaka finoana ary manome hery. Ho an’izay rehetra manatrika, ilay fivoriambe dia ho zava-miavaka amin’ny taona. Asaina amim-pitiavana koa ianao mba hanatrika. Ho faly ireo Vavolombelon’i Jehovah ao amin’ny faritra misy anao hilaza aminao ny toerana hanaovana ny fivoriambe akaiky indrindra ny misy anao.