Miomàna ho Amin’ilay Arivo Taona Tena Lehibe!
HITONDRA fitahiana tsy hay lazaina ho an’ny fianakavian’olombelona ny Fanjakana Arivo Taonan’i Kristy. Eo ambany fitarihana feno fitiavan’i Jesosy, ny olombelona dia hasandratra avy amin’ny toe-piainana mampahonena misy azy ankehitriny, ho amin’ny fahalavorariana be voninahitra. Eritrereto ange ny mety ho dikan’izany ho anao e! Fahasalamana manome taratry ny fahasambarana! Alao sary an-tsaina ny hoe mifoha isa-maraina ka mahatsiaro tena ho metimety kokoa noho ny omalin’iny. Lehilahy sy vehivavy ary ankizy an-tapitrisany maro no manantena hiaina mandritra izany fotoana mahafaly izany. Miandrandra izany sy mangataka izany amin’ny vavaka izy ireo. Ny fianarany ny Baiboly dia nahatonga azy ireo hiaiky fa afaka mahazo izany fitahiana izany ny tenany.
Alohan’ny hanombohan’i Jesosy Kristy ny Fanjakany Arivo Taona anefa, dia tsy maintsy esoriny tsy ho eto amin’ny tany ireo rehetra manohitra ny fanapahany. Hanao izany izy ao amin’ilay ady antsoina ao amin’ny Baiboly hoe Haramagedona. (Apokalypsy 16:16). Tsy hiady ao amin’izany ady izany akory ireo tena Kristianina marina eto an-tany. Adin’Andriamanitra izy io. Ary tsy ho voafetra ho eo amin’ny toerana iray manokana ilay izy. Milaza ny Baiboly fa hahatratra ny faran’ny tany izy io. Haringana ireo fahavalon’ny fanapahan’i Kristy. Tsy hisy ho afa-mandositra izy ireo na dia iray aza! — Jeremia 25:33.
Hifantoka amin’i Satana Devoly sy ny demoniany i Jesosy, avy eo. Alao sary an-tsaina ilay fisehoan-javatra, araka ny nahitan’ny mpanoratra ny bokin’ny Apokalypsy azy: “Hitako fa, indro, nisy anjely [Jesosy Kristy] nidina avy tany an-danitra, nanana ny fanalahidin’ny lavaka tsy hita noanoa sy gadra lehibe eny an-tànany; dia nisambotra ilay dragona izy (dia ilay menarana ela, ny devoly sy Satana izany) ka namatotra azy arivo taona”. (Apokalypsy 20:1, 2). Horinganina mandrakizay i Satana sy ireo demoniany, any aoriana. — Matio 25:41.
Hisy “olona betsaka tsy tambo isaina” ho tafita velona amin’i Haramagedona. (Apokalypsy 7:9). Hitarika azy ireo i Kristy mba handraisan’izy ireo soa feno avy amin’ny “loharanon’ny ranon’aina”, toy ny itarihan’ny mpiandry ondry iray ny ondriny ho amin’ny rano mamonjy aina. (Apokalypsy 7:17). Tsy ho voasakantsakan’i Satana sy ny demoniany ny fandrosoana ara-panahin’ireo ho tafita velona amin’i Haramagedona, ka hampiana tsikelikely mba handresy ny fironany hanota izy ireo mandra-pahatongany ho lavorary!
Hihatsara tsy an-kijanona ny toe-piainana eo ambanin’ny fanapahana feno fitiavan’i Kristy. Hanafoana ny antony rehetra mahatonga fanaintainana sy alahelo i Jehovah Andriamanitra, amin’ny alalan’i Jesosy Kristy. “Hofafany ny ranomaso rehetra amin’ny mason[’izy ireo]; ary tsy hisy fahafatesana intsony, sady tsy hisy alahelo, na fitarainana, na fanaintainana”. (Apokalypsy 21:4). Nameno ilay sary tamin’ny filazana toy izao, ny mpaminany Isaia: “Dia hampahiratina ny mason’ny jamba, ary hampahaladìna ny sofin’ny marenina. Dia hitsambikina tahaka ny diera ny mandringa, ary hihoby ny lelan’ny moana”. (Isaia 35:5, 6). Ary haverina ho amin’ny fiainana ny maty, “na ny lehibe na ny kely”, ka hanana fahafahana ny tsy ho faty intsony izy ireo! — Apokalypsy 20:12.
Efa angonina ny “olona betsaka” izay ho tafita velona amin’i Haramagedona na dia amin’izao fotoana izao aza. Eo am-piomanana ho amin’ny Fanjakana Arivo Taonan’i Kristy izy ireo. Na dia tsy fantatr’izy ireo aza ny fotoana hanombohan’izany fanapahana izany, dia matoky izy ireo fa amin’ny fotoana mety amin’Andriamanitra, dia ho tonga izany. Azonao atao ny ho anisan’izy ireo, kanefa tsy maintsy miomana koa ny tenanao — tsy amin’ny fivarotana ny fanananao sy amin’ny fandehanana any amin’ny toerana iray manokana akory, fa amin’ny fandraisana fahalalana marina momba an’i Jehovah Andriamanitra sy ny fikasany, amin’ny alalan’ny fianarana ny Baiboly. Ho faly ny Vavolombelon’i Jehovah hampiseho aminao fa afaka mitondra soa ho anao sy ny fianakavianao ny fianarana ny Baiboly, ary izany dia tsy misy fandoavam-bola na faneriterena. Ho faly hanome fanazavana fanampiny ireo mpampanonta ity gazety ity.
[Efajoro, pejy 7]
Ara-bakiteny sa Ara-panoharana Ilay Arivo Taona?
Koa satria nosoratana tamin’ny fiteny an’ohatra ny ankamaroan’ny bokin’ny Apokalypsy ao amin’ny Baiboly, dia misy fanontaniana iray mipoitra. Ahoana ny amin’ilay Fanjakana Arivo Taonan’i Kristy izay voalaza ao amin’ny Apokalypsy? Fe-potoana ara-bakiteny ve izy io sa ara-panoharana?
Tena azo inoana fa arivo taona ara-bakiteny no tiana holazaina. Hevero izao: Noresahin’ny apostoly Paoly ho toy ny andro iray ny Fanjakana Arivo Taonan’i Kristy, izay fe-potoana hitsarana ny olombelona. (Asan’ny Apostoly 17:31; Apokalypsy 20:4). Nosoratan’ny apostoly Petera fa ny iray andro (24 ora) amin’i Jehovah dia arivo taona. (2 Petera 3:8). Manaporofo izany fa arivo taona ara-bakiteny ny halavan’io “andro” fitsarana io. Fanampin’izany, ao amin’ny Apokalypsy 20:3, 5-7 (NW ), dia inefatra isika no mamaky hoe “ilay arivo taona”, fa tsy hoe “arivo taona”. Izany dia toa manondro fe-potoana iray voafaritra tsara ny halavany.