Fiatrehana Ireo Zava-tsarotra Amin’ny Fitaizana

ZAVA-TSAROTRA mahavelom-panahiana ny ray aman-dreny ny fitaizan-janaka amin’izao andro izao, indrindra fa ireo zatovo. Manao tatitra ny The Gazette any Montréal, any Kanada, fa nanjary “filamatra eo amin’ny zatovo” ny fanandramana zava-pisotro misy alkaola sy zava-mahadomelina. Antitranteriny fa “manana andraikitra ho mailo amin’ireo fiovana eo amin’ny fitondran-tenan’ireo [zanany efa] zatovo” ny ray aman-dreny.

Inona no zavatra mety hilaza ny fisian’ny zava-manahirana toy izany eo amin’ny zatovo, ka tokony hozahan’ireo ray aman-dreny? Hitan’ny Akademia Amerikanina Momba ny Fitsaboana Aretin-tsaina eo Amin’ny Ankizy sy ny Zatovo fa misy famantarana eo amin’ny ara-batana sy ara-pihetseham-po ary ara-piaraha-monina, ka efa fampitandremana izany. Anisan’izany famantarana izany ny hoe vizana lava, miova ny toetra maha izy azy sy ny lafin-toetra mampiavaka azy, mihidy an-trano ela loatra ao amin’ny efitrano fandriana, mila ady, voarohirohy amin-javatra tsy ara-dalàna.

Ahoana no azon’ireo ray aman-dreny iarovana ny zanany tsy hanandrana zavatra manimba toy izany sy tsy hiharan’ny vokatra ratsy aterany? Mihevitra ny Pr. Jeffrey L. Derevensky, ao amin’ny Oniversite McGill, fa mety hampihena ho faran’izay kely ireo zava-manahirana any aoriana, ny fifampiresahana malalaka sy ny fanaovana izay hisian’ny fifanajana mandritra ireo taona voalohandohany amin’ny fiainan’ny ankizy. Nanampy teny ny The Gazette fa, na dia mipoitra mandritra ny fotoana maha zatovo aza ny faniriana hahaleo tena bebe kokoa, dia mila hatrany “ny tari-dalana sy ny fanohanana ary ny sori-dalana sy ny fitiavana omen’ny ray aman-dreniny” ny zatovo. Ireo fanamarihana ireo dia mamerina ohabolana iray ao amin’ny Baiboly izay milaza hoe: “Zaro amin’izay làlana tokony halehany ny zaza, ka na rehefa antitra aza izy, dia tsy hiala amin’izany.” (Ohabolana 22:6). Toroan’Andriamanitra hevitra ireo ray aman-dreny mba ho tonga ohatra sy namana ary mpiresaka sy mpampianatra. — Deoteronomia 6:6, 7.