Izay Alahelovany An’i New York

NASEHO ho mora tazana eo amin’ny iray amin’ireo fitambaran-tranon’ny Fikambanana Watchtower any Brooklyn, any New York, nanomboka tamin’ireo taona 1950, io soratra eo ambony io. Ampahatsiahivina mba hamaky ny Baiboly isan’andro ny mpiasa sy ny mpizaha tany ary ny hafa koa, izay mandalo eo. Ity taratasy manaraka ity, izay voaray avy tamin’ny tovovavy Vavolombelona iray, dia mampiseho fa mandaitra ilay fampahatsiahivana.

“Niresaka tamin’ny ankizy iray mpiara-mianatra tamiko aho mahakasika izay tiako hatao, rehefa vita ny fianarako eto amin’ny lise. Ny Betela, ny foiben’ny Vavolombelon’i Jehovah, no nanombohako ny resaka, ka nientam-po aoka izany izy. Nilaza tamiko izy fa teto New York foana no nipetraka hatramin’izay. Tsy dia nivavaka loatra ny fianakaviany, kanefa isa-maraina, rehefa nitazana teo am-baravarankeliny izy, dia nahita ny soratra hoe ‘Vakio Isan’andro ny Tenin’Andriamanitra, ny Baiboly Masina’. Noho izany, dia namaky ny Baiboliny isan’andro izy, talohan’ny nandehanany nianatra.

Nilaza izy fa ny zavatra nalahelovany an’i New York, rehefa tsy nipetraka teto intsony izy, dia ny tsy nahitany intsony, rehefa mifoha avy eo am-parafarany izy, an’ilay fampahatsiahivana azy hamaky ny Baiboliny. Noho ilay soratra eo amin’ny tranon’ny Watchtower anefa, dia tonga fahazarana ho azy ny mamaky Baiboly, hany ka manohy manao izany isan’andro izy!”

Inona tokoa moa no fomba tsara kokoa hanombohana ny andro noho ny famakiana ampahany amin’ny Tenin’Andriamanitra! Amin’ny fanaovanao izany, dia tsy isalasalana fa hanjary hankasitraka ity tenin’ny apostoly Paoly ity ianao: ‘Ny Soratra Masina dia mampahahendry anao ho amin’ny famonjena amin’ny finoana izay ao amin’i Kristy Jesosy.’​—2 Timoty 3:15-17.