Nahoana no Mamela Heloka?

“IREO mpahay siansa dia nanao fikarohana mba hampisehoana voalohany indrindra fa manatsara ny fahasalamana ara-pihetseham-po​—ary mety ho ny ara-batana mihitsy aza​—ny famelan-keloka”, hoy ny tatitra nataon’ny The Toronto Star any Kanada. Kanefa, ny profesora Carl Thoresen, lehiben’ny mpanao fikarohana ho an’ny Tetik’asa Momba ny Famelan-keloka ao Stanford, Oniversiten’i Stanford, any Etazonia, dia nanamarika fa “vitsy kely ny olona mahafantatra ny atao hoe famelan-keloka sy ny fomba fiasan’izy io”.

Heverina ho lafiny iray tena lehibe amin’ny Kristianisma ny famelan-keloka marina. Ny tatitra nataon’ny The Toronto Star dia mamaritra azy io ho ny “fanekena fa nasian-dratsy ianao, famelana handeha izay mety ho lolompo rehetra vokatr’izany, ary amin’ny farany dia fitondrana ilay olona nanafintohina amim-pangoraham-po sy amim-pitiavana mihitsy aza”. Samy hafa be amin’ny hoe manala tsiny, tsy manome tsiny, manadino, na mandà ny fisian’ny fanafintohinana, izy io; tsy midika koa izy io hoe mody tsy mahita toe-javatra mampalahelo iray. Milaza ilay tatitra fa ny “fanilihana ny fahatezerana sy ny fihetseham-po ratsy” no fanalahidin’ny famelan-keloka marina.

Milaza ireo mpikaroka fa ilaina ny handinihana lalina kokoa ny soa ara-batana entin’ny famelan-keloka. Ny soa ara-tsaina anefa no tena anaovan’izy ireo tatitra, tafiditra amin’izany “ny fahakelezan’ny fihenjanana sy ny tebiteby ary ny fahaketrahana”.

Ny antony ambony iray hamelana heloka dia hita mazava ao amin’ny Efesiana 4:32, izay milaza hoe: “Aoka samy halemy fanahy amin’ny namany avy hianareo, ka hifampiantra sy hifamela heloka, tahaka ny namelan’Andriamanitra ny helokareo ao amin’i Kristy.” (Izahay no manao sora-mandry.) Ampirisihina mafy isika mba hanahaka an’Andriamanitra eo amin’ny lafiny famelan-keloka sy eo amin’ny lafin-javatra hafa koa.​—Efesiana 5:1.

Hisy fiantraikany ratsy eo amin’ny fifandraisantsika amin’Andriamanitra ny fandavana tsy hamela ny heloky ny hafa, rehefa misy fototra tokony hanehoana famindram-po. Antenain’i Jehovah ny hifamelantsika heloka. Avy eo isika dia afaka mivavaka mba hamelany ny helotsika koa.​—Matio 6:14; Marka 11:25; 1 Jaona 4:11.