Misy Vidiny Maharitra ny Hatsaran-tarehy Anaty

“AMPITOVIN’NY TOVOLAHY AMIN’NY HATSARAN-TOETRA NY HATSARAN-TAREHY”, HOY NY NOMARIHIN’NY KRISTIANINA ZOKIOLONA MAHATOKY IRAY.

Efa hatramin’ny ela tokoa ny olona no nirona hanindrahindra tafahoatra ny hatsaran-tarehy ivelany, ka matetika izany no nitarika ho amin’ny fiheveran-diso ny amin’ny atao hoe hatsaran-toetra anaty. Ilay Mpamorona antsika kosa anefa, dia mijery izay ao anatintsika lalina, na manao ahoana na manao ahoana endritsika ivelany. Manome ohatra tsara indrindra ny amin’ny fahaiza-mitsara zavatra amim-pahamatorana izy, amin’izany fomba izany. Araka ny Baiboly, dia Andriamanitra mihitsy no nilaza hoe: “Tsy mba toy ny fijerin’ny olona no fijerin’i Jehovah; fa ny olona mijery ny miseho eo ivelany, fa Jehovah kosa mijery ny fo.”​—1 Samoela 16:7.

Andriamanitra no Loharanon’ny tena hatsaran-tarehin’olombelona, ary ahariharin’ny Teniny fa ny toetra ara-panahy no zava-dehibe indrindra, rehefa manombana ny tena hasarobidin’ny olona iray. Milaza ny Baiboly hoe: “Fitaka ny fahatsaram-bika, ary zava-poana ny fahatsaran-tarehy; fa ny vehivavy matahotra an’i Jehovah ihany no hoderaina.” (Ohabolana 31:30). Ny hatsaran-tarehy ivelany tokoa dia mety hanafina haratsian-tarehy anaty. (Estera 1:10-12; Ohabolana 11:22). Ho lefy ny hatsaran-tarehy ivelany rehefa mandeha ny fotoana, fa ny hatsaran-tarehy anaty kosa, izany hoe ny toetra tsaran’ny fo, dia afaka mitombo sy maharitra.

Fahendrena tokoa àry ny mamboly toetra toy ny fitiavana, fifaliana, fiadanana, fahari-po, hatsaram-panahy, hatsaram-po, finoana, fahalemem-panahy, ary fifehezan-tena! (Galatiana 5:22, 23). Amin’izay isika dia afaka mahazo hatsaran-tarehy anaty, izay tena misy vidiny maharitra.​—1 Petera 3:3, 4.